சிவத்தமிழோன்

தைத்திருநாளும் திருநெறிச்சால்பும்

2012-01-14T23:46:00.001+03:00

சூரியவழிபாடு தொன்றுதொட்டு மனிதக்குடியில் இருந்தவந்த ஒன்றே! எந்தவொரு தனிப்பண்பாட்டுக்கும் உரிய அலகாக சூரியவழிபாடு இருந்ததில்லை!!! ஆயினும் பிற்காலந்தில் எழுந்த மதங்கள் முன்னர் இருந்த வழிபாடுகளை அழிப்பதிலும் தடுப்பதிலும் இருந்ததனால் உலகில் சூரியவழிபாடு மறையத்தொடங்கிற்று. ஆயினும் இந்தியப் பெருங்கண்டத்தில் சமயத்துறையில் எந்தவொரு தெய்வவழிபாடும் வெறுக்கப்படவில்லை! எனவே சூரியவழிபாடும் சைவ-வைணவ சமயத்துறைகளில் சிறப்பான இடம்பெற்றன!

அந்தவகையில்;
சூரியதேவனை சிவபெருமானின் அட்டமூர்த்தவடிவங்களில் ஒன்றாக சிறப்பித்து சூரியவழிபாட்டை சைவசமயம் சிறப்படையச்செய்துள்ளது என்றால் மிகையில்லை!!!

தைப்பொங்கல் திருநாள் என்பது சூரியனுக்கும் உழவர்களுக்கும் உழவுக்கு உதவுகின்ற பசு,காளை மாடுகளுக்கும் நன்றியைத் தெரிவிக்கும் பொருட்டு தமிழர்கள் தமது வாழ்வில் தொன்றுதொட்டு கொண்டாடிவருகின்ற திருநாளாகும். இன்று சில அரசியல் விசமிகள் இந்த திருநாளுக்கும் மதவழிபாட்டுக்கும் எந்தத்தொடர்ப்பும் இல்லை என்பதுபோல் ஒருமாயையை ஏற்படுத்தி அதனூடாக தமது கருப்புச்சட்டை அரசியலை அரங்கேற்றி வருகின்றனர்!!! தமிழர்களின் உணர்வோடுகலந்த இந்த இனியநாளிளை சைவநெறிச்சால்பில் இருந்து பிரித்தெடுத்தால்த்தான் மதமாற்றங்களை எளிதே செய்யமுடியும் என்பதனாலும் புறச்சமயத்தவர் இது மதவிழா அல்ல என்பதுபோல் தலையாட்டுகின்றனர்!!!!

சூரியவழிபாட்டை கிருஷ்வமதமும் இஸ்லாமியமதமும் மறுக்கின்றன!!! எருது,பசு வழிபாட்டுக்குரிய மாட்டுப்பொங்கலும் இம்மதங்களின் புனிதநூல்களால் ஒதுக்கப்படும் மிருகவழிபாட்டு நிகழ்வுகளே!!!! எனவே; தைப்பொங்கல் என்பது யதார்த்தமாகவே கிருஷ்தவத்தமிழர்களிடமிருந்தும் இஸ்லாமியத் தமிழர்களிடமிருந்தும் மதரீதியாக அந்நியப்படுகின்றது!!! எனினும் சில தேவசபைகளில் தைப்பொங்கல் கொண்டாட்டங்களை மதமாற்றச்சூழ்ச்சிகளுக்காக தமது மதச்சட்டங்களை கண்டுகொள்ளாது ஏற்பாடுசெய்கின்றமை வழமையாகிவிட்டது.கொடியேற்றம்,மேள-தாள நாதசுவர இசை,தேரோட்டம் ஆகியவற்றை தமது திருச்சபைகளில் புகுத்தியவர்களுக்கு இதுவொன்றும் புதிதல்ல!!! திருவள்ளுவர் கிருஷ்வர் என்று ஆராய்ந்து கண்டுபிடித்தவர்களுக்கும் அதற்கு ஆமாம் போட்ட நாத்தீக அரசியல்வாதிகளுக்கும் இதுவொன்றும் விசித்திரமானதொன்றல்ல!!!

ஆனால்;
தைப்பொங்கலை சைவசமயத்தவர்களிடம் இருந்து அந்நியப்படுத்தும்வகையில் இது மதசார்பற்ற விழா என்று பாண்டித்தியம் பேசும் அறிஞர்களின்(?) உள்நோக்கத்தினை சைவத்தமிழர் உணர்ந்து கொள்ள வேண்டியது அவசியமாகும்!

சைவசமயத்தையும் தமிழையும் பிரித்துப் பார்ப்பதென்பது உயிரையும் உடலையும் பிரிக்க எத்தனிப்பதற்கு நிகரானது!!! இருகண்களில் ஒருகண் மட்டுமே போதும் மனிதனுக்கு என்னும் மடமைக்கு நிகரானது!!!! சைவமும் தமிழும் ஒன்றோடு ஒன்று கலந்த பந்தத்தை உடையது!!!!

அரசியல் ஒருதலைமுறைக்கு சாப்பாடு போடும்!!! தமிழர்சால்பு பல்லாயிரம் ஆண்டுகள் பழமையானது! அதை ஒருதலைமுறைச் சாப்பாட்டுக்காக சீர்குலைக்காதீர்!!!!

இருநிலனாய்த் தீயாகி நீருமாகி
இயமானனாயெறியுங் காற்றுமாகி
அருநிலைய திங்களாய் ஞாயிறாகி
ஆகாச மாயட்ட மூர்த்தியாகிப்
பெருநிலமுங் குற்றமும் பெண்ணும் ஆணும்
பிறருருவும் தம்முருவுந் தாமேயாகி
நெருநலையாய் இன்றாகி நாளை யாகி
நிமிர்புன் சடையடிகள் நின்ற வாறே
பொழிப்புரை :பெரிய பூமியாகியும், நீராகியும், தீயாகியும், எறியும் காற்றாகியும், ஆகாயமாகியும், ஞாயிறாகியும், அழிவில்லாத நிலையையுடைய திங்களாகியும், இயமானனாகியும் இங்ஙனம் அட்ட மூர்த்தியாகியும், பெருமையுடையதாகிய நன்மையும், சிறுமை உடையதாகிய குற்றமும், பெண்ணும், ஆணும் ஏனைய தேவருடைய வடிவங்களும் அருவம், உருவம், அருவுருவம் என்னும் தம் மூவகைத் திருமேனிகளும் தாமே ஆகியும், நேற்று ஆகியும், இன்று ஆகியும், நாளை ஆகியும் நீண்ட செஞ்சடையுடைய எம்பெருமான் நின்றவாறு வியக்கத் தக்கதாகும்.

"இருநிலனாய்த் தீயாகி நீருமாகி இயமானனாயெறியுங் காற்றுமாகி அருநிலைய திங்களாய் ஞாயிறாகி ஆகாச மாயட்ட மூர்த்தியாகி"என்று அப்பர் பெருமான் அருளிய நின்ற திருத்தாண்டகத்தில் எம்பெருமானின் அட்டமூர்த்த வடிவங்கள் சிறப்பிக்கப்படுகின்றது.ஆக; சூரியதேவன் சிவபெருமானின் அட்டமூர்த்த வடிவமாமையால் தைப்பொங்கல் சைவநிகழ்வுகளில் முதன்மையான தொன்றாகும்.

பொங்கலோ பொங்கல்!!!!
தைத்திருநாள் வாழ்த்துகள்!!!!!

பேரூராதீனம் சீர்வளர்சீர் சாந்தலிங்கஇராமசாமிஅடிகளார் அவர்கள் உழவர்திருநாளாம் பொங்கல் திருநாளை முன்னிட்டு வழங்கிய அருளாசிச்செய்தி

குறிப்பு:- மின்னஞ்சல் ஊடாககிடைக்கபெற்ற சுவாமிகளின் வாழ்த்துச்செய்தியை இங்கு இணைந்துள்ளேன். திருமடத்தின் வலைப்பூவிலும்(http://peruradigalar.blogspot.com/2012/01/blog-post_13.html) இவற்றைக் காணலாம். நன்றி.

திருவெம்பாவை முழுப்பாடலும் காணொளியில்

2012-01-01T20:58:00.002+03:00

திருவெம்பாவை நோன்பு 30ம் திகதி ஆரம்பமாகியுள்ளது, வருகின்ற 8ம் திகதி ஆதிரை நாளில் முடிவுறுகின்றது. திருவெம்பாவை நோன்பை நோற்கும் சைவப்பெருமக்கள் கேட்டு மகிழும் பொருட்டு; திருவெம்பாவை முழுப்பாடலையும் யூடியூப்பில் இருந்து இங்கு இணைத்துள்ளேன். எல்லாம் திருவருட் சம்மதம்

திருவெம்பாவை பாடல் முழுவதையும் பொருளுரையுடனும் குறிப்புரையுடனும் படித்து மகிழுவதற்கு கீழுள்ள "திருவெம்பாவை பாடல்கள்" என்னும் இணைப்பை அழுத்துக. நன்றி
திருவெம்பாவை பாடல்கள்

திருவெம்பாவை,திருப்பள்ளியெழுச்சி என்பவற்றை தரவிறக்கம் செய்வதற்காக கீழுள்ள வலைத்தளங்களுக்கு செல்ல வேண்டுகிறேன். சைவமக்கள் யாவரும் பயன்பெறும் வண்ணம் ஏராளமான சைவசமய திருமுறைப் பாடல்களை தரவிறக்கம் செய்யும் வசதியுடன் இவ்வலைத்தளங்களில் இணைக்கப்பட்டுள்ளது. அருமையான ஒரு சிவப்பணி! ஈடு இணையற்ற சைவப்பெரும்பணி இது. சைவ உலகமே பயன்பெறும் வண்ணம் சிவப்பணியாற்றும் குறித்த வலைத்தள சைவ அன்பருக்கு எளியேனின் பணிவான நன்றிகள்.

மாணிக்கவாசகர் அருளிட்செய்த திருவெம்பாவை, திருப்பள்ளியெழுச்சி , மார்கழி மாத உற்சவ பாடல்கள்

திருவெம்பாவை , திருப்பள்ளியெழுச்சி- மார்கழி உற்சவம்

எல்லாம் திருவருட் சம்மதம்

சைவசித்தாந்தமும் சங்கரர் அத்வைதமும் -சைவ சித்தாந்தம் கற்றதும் பெற்றதும் பாகம் - 7

2011-12-21T05:45:00.004+03:00

பாரதசமய பண்பாடு என்பது சமய ஆராய்வுகளால் எழுப்பப்பட்டது. வெறுமனே ஒருவர் தோன்றி இதுதான் சமயம்,இதுதான் கடவுள்,இதுதான் சமயநூல்,இதுதான் கடவுளுக்கும் உயிருக்குமான தொடர்ப்பு என்று ஆணையிடப்பட்டு அடிமைப்படுத்தப்பட்டது பாரதசமயப் பண்பாட்டு அல்ல! அது பாரதசமயப் பண்பாட்டுக்கு முரணானது!

விஞ்ஞானிகள் ஆராய்வுகளை மேற்கொண்டு கருதுகோள்களை வெளிப்படுத்தி பரிசோதித்து பார்ப்பதுபோல், பாரதசமயப் பண்பாட்டு மெஞ்ஞானிகள் ஒவ்வொருவரும் இறைவனுக்கும் ஆன்மாவுக்கும் என்ன தொடர்பு என்பதை தமது அனுபவ உணர்வுகள் வாயிலாக ஆராய்ந்து தத்துவநூல்களுடாக மானிடருக்கு வெளிப்படுத்தினர்.

விஞ்ஞானிகளிடம் பல கருதுகோள்கள் எழுவதுபோல் ஒவ்வொருவரும் தமது மெஞ்ஞான சித்திக்கு அமைவாக தமது அனுபவ உணர்வுகளை வெளிப்படுத்தினர். அவற்றை அவர்களுடைய சீடர்கள் மேலும் மேலும் அனுபவ வாயிலாக உணர்ந்து மெருகூட்டினார்கள். இப்படி வளர்ந்ததுதான் பாரதப்பண்பாட்டு சமயத்தத்துவங்கள்.

முன்னைய பகுதிகள்:-
சைவசித்தாந்தம் கற்றதும் பெற்றதும் பாகம் 1
சைவசித்தாந்தம் கற்றதும் பெற்றதும் பாகம் 2
சைவசித்தாந்தம் கற்றதும் பெற்றதும் பாகம் 3
சைவசித்தாந்தம் கற்றதும் பெற்றதும் பாகம் 4
சைவசித்தாந்தம் கற்றதும் பெற்றதும் பாகம் 5
சைவசித்தாந்தம் கற்றதும் பெற்றதும் பாகம் 6

இந்த சமயதத்துவ ஆய்வில் வெளிப்பட்டவையே அத்துவிதம்,துவைதம் என்பனவாம். இதில் அத்துவித தத்துவத்தை அதிகமாக பலர் அனுபவ உணர்வுகளுடாக பலஞானிகள் தமது ஞானசித்திக்கு அமைவாக கண்டறிந்து வெளிப்படுத்தினர். அவையாவன;

சங்கரரின் அத்துவிதம்
விஷிட்டாத்துவிதம்
மெய்கண்டார் அத்துவிதம்

துவைதம்,சங்கரரின் அத்வைதம்,விஷிட்டாத்வைதம் ஆகியவற்றை வேதாந்தம் என்பர். பிரம்மசூத்திரத்துக்கு விளக்கவுரை வழங்குவதனாலேயே வேதாந்தம் என்று கூறுவர். மெய்கண்டாரின் அத்வைதம் சைவசித்தாந்தம் என்று போற்றப்படும். தென்னாட்டுச் சைவசமயத்தின் சால்பாக சைவசித்தாந்தம் விளங்குகின்றது.

சங்கரரின் அத்துவிதம் ஏகன்மவாதத்தை கொண்டது. அதாவது கடவுளும் ஆன்மாவும் ஒன்றே எனும் கருத்தை வலியுறுத்துவது. விஷிட்டாத்வைதம் ஆன்மா கடவுளிடம் இருந்து வெளிப்பட்டது என்கின்றது.

மெய்கண்டார், நாயன்மார்களால் இலைமறை காயாக சைவசமய திருமுறைகளில் சொல்லப்பட்ட அத்துவிதத்தை அகச்சந்தானகுரவராகிய சத்தியஞானதரிசினிகள் வாயிலாக தெளிவுற்று, அதனை வளர்ப்பதற்கு சிவஞானபோதம் என்னும் சைவசித்தாந்த தமிழாகமநூல் எழுதி குருபரம்பரையை நிறுவினார். இதன் காரணமாக சைவசித்தாந்த அத்துவிதத்தை மெய்கண்டார் அத்துவிதம் என்றும் அழைப்பர்.

சங்கரர், இராமனுசர் போன்றோரின் அத்துவிதக் கருத்துகளில் இருந்து முரண்பட்டு அத்துவிதத்திற்கு சைவத்திருமுறைகளில் காணபட்ட அருமையான விளக்கத்தை உணர்ந்து மெய்கண்டார் சிவஞானபோதமாக வெளிப்படுத்தினார். அதுவே சைவசித்தாந்த அத்துவிதமாகும்.

உலகம்,ஆன்மா ஆகியவை யாவுமே பிரம்மம் என்றால் பிரம்மத்தினை ஆன்மாவாகும் உலகமாகவும் ஆக்கியது எது என்னும் கேள்விக்கு சங்ரரின் அத்வைதம் மாயை என்கின்றது. அப்படியானால் மாயையால் பாதிக்கப்படக்கூடிய பிரம்மம் முழுமுதற்தன்மை உடையதல்ல என்பது உறுதியாகின்றது. குறையுடைய பொருள் என்று ஆகிவிடுகின்றது.

பிரம்மத்தில் இருந்தே ஆன்மாக்கள் வந்தன என்றால் முக்தி என்பது (பிரம்மத்துடன் சேருவது) நிலையற்றதாகின்றது. நிலையற்றதான முக்தியை நாடவேண்டிய அவசியம் என்ன?

ஆக; இவ்வாறான முரண்பாடுகளை.....ஐயங்களை அகற்றும்படி அத்துவிதத்துக்கு சைவசித்தாந்தம் அழகாக விளக்கம் அளிக்கின்றது.

இறைவன் ஆன்மாவுடன் ஒன்றாயும் வேறாயும் உடனாயும் நிற்கின்றான் என்பது சைவசித்தாந்த கொள்கையாகும்.
அதாவது சைவசித்தாந்தம் என்பது முப்பொருள் உண்மையை வலியுறுத்துகின்றது. பதி(இறைவன்),பசு(ஆன்மாக்கள்),பாசம்(மும்மலங்கள்-ஆணவம்-கன்மம்-மாயை).ஆன்மாக்கள் தொன்றுதொட்டு இருப்பவையாகும். யாராலும் தோற்றுவிக்கப்படாதவை. ஆணவமலத்துள் கட்டுண்டு இருக்கும் ஆன்மாக்களை ஆணவமலத்திலிருந்து விடுவித்து முக்தி அளிப்பதற்காக இறைவன் தனு,கரண,புவன போகங்களைப் படைத்து அவற்றை ஆன்மாக்கள் அனுபவிக்கச் செய்து பக்குவப்படவைத்து மும்மலங்களையும் அறுத்து வீடுபேற்றை நல்குகின்றான் என்கிறது சைவசித்தாந்தம். வீடுபேற்றை பெற்ற ஆன்மாக்கள் மீண்டும் பிறப்பெடுப்பதில்லை.ஆக; நிலையான முக்தி!

ஆணவமலத்துள் கட்டுப்பட்டுள்ள ஆன்மா இறைவனை அடையும் வரை தானே இயங்கும் என்று சொன்னால் அது இறைவனின் முழுமுதற்தன்மைக்கு இழுக்கு! தானே யாவற்றையும் அறியும் என்று சொன்னால் அதுவும் இறைவனின் முழுமுதற்தன்மைக்கு இழுக்கு ஆகிவிடுகின்றது! தானே இயங்கும்.....தானே அறியும் அறிவுடையது என்றால் இறைவன் எதற்கு? அவை கடவுளை அண்டியிருக்க வேண்டிய தேவையில்லையே!!!!

தானோ இயங்கும் தானே சிந்திக்கும் எந்திர மனிதர்களை உருவாக்க விஞ்ஞானிகள் முயலுவது பற்றியும் அதனது விபரிதங்கள் பற்றியும் இன்று பரவலாக பேசப்படுகின்றது. மனிதனுக்கு சவாலாக இத்தகைய எந்திர மனிதர் அமைந்துவிடுவர் என்பதே மிகப்பெரிய விபரீதமாக பேசப்படுகின்றது. அதுபோல் இயக்கத்துக்கும் அறிவுக்கும் இறைவனிடத்தில் ஆன்மா தங்கியில்லை என்றால் அது இறைவனின் முழுமுதற்தன்மைக்கு இழுக்காகவே அமையும்!

எனவே சைவசித்தாந்தம் உயிர்கள் தானே அறியும் ஆற்றல் அற்றவை என்றும் இறைவன் அறிவிக்க அறிவன என்றும் கூறுகின்றது. அதுபோலவே இறைவன் உயிர்களோடு உடனாக இருந்து இயக்குகிறான் என்கிறது.கடவுள் உயிர்களோடு ஒன்றாயும் வேறாயும் உடனாகவும் இருந்து உயிர்களை இயக்குகின்றான்.உயிர்களுக்கு அறிவிக்கின்றான். உயிர்கள் இறைவன் அறிவிக்க இறைவனால் அறிந்து கொள்கின்றன.

கடவுளே தன்னில் இருந்து உயிர்களைப் படைத்தார் என்றால்,அவை மீண்டும் தன்னை வந்தடைய வேண்டும் என்று கருதுகின்றார் என்றால், எதற்காக உயிர்களைப் படைத்தார் என்கின்ற கேள்வி உருவாகின்றது?

ஆனால் இங்கு கடவுளோடு சேருவதே முக்தி ஆகையால்; தன்னோடு வந்து சேருவதற்காக உயிர்களைப் படைக்க வேண்டிய நோக்கம் ஏன் எழுந்தது?

எனவே உயிர்களும் அநாதியானவை என்கின்றது சைவசித்தாந்தம்!!!!

பதிபசு பாசம் எனப்பகர் மூன்றில்
பதியினைப் போல்பசு பாசம் அநாதி - திருமந்திரம்

அருளுடைய பரமென்றோ அன்று தானே யானுளன் - தாயுமானவர்

முக்தியில்; தன்னோடு நிலையாக இணைத்துக் கொண்டபோதும்; சீவனை சிவமாக்கியபோதும் சீவனால் சிவன்போல் ஐந்தொழில்கள் ஆற்ற முடியாது. சிவனோடு கலந்து சிவமாகி சிவானந்தத்தை நுகருமே ஒழிய; சிவன்போல் தொழில்கள் ஆற்ற முடியாது.

"முத்திநெறி அறியாத மூர்க்கரொடு முயல்வேனைப்
பத்திநெறி அறிவித்துப் பழவினைகள் பாறும்வண்ணஞ்
சித்தமலம் அறுவித்துச் சிவமாக்கி எனையாண்ட
அத்தனெனக் கருளியவா றார்பெறுவார் அச்சோவே." -மாணிக்கவாசகர்

இப்பாடலை நெஞ்சுக்குள் நிறுத்தி உள்ளத்தால் உருகி படித்தால் இப்பாடலில் சூட்சுமமாக சொல்லப்பட்டுள்ள உண்மை புலனாகும்.

முத்திநெறி அறியாத மூர்க்கரொடு முயல்வேனை -முக்திநெறி அறியாத மூர்க்கரோடு இருந்த என்னை என்பது பொருளாகும். அதாவது ஆணவமலத்துள் அழுத்தி கண்ணில்லாத தேனீபோல் தத்தளித்து துன்பப்பட்டுக்கொண்டிருந்த என்னை என்று பொருள் கொள்க.

பத்திநெறி அறிவித்துப் -பக்தி வழியைக் காட்டி -தனு,கரண,புவன போகங்களைப் படைத்தருளி அதனை அனுபவிக்கச் செய்து மண்ணில் நல்ல வண்ணம் வாழ வழிதந்து பக்தி மார்க்கம் தந்து அதனூடாக

பழவினைகள் பாறும்வண்ணஞ் சித்தமலம் அறுவித்து-பழைய வினைகள் எல்லாம் கெட்டொழியும்படி அறிவை பற்றியுள்ள மூலமலத்தை(ஆணவமலத்தை) போக்கி

சிவமாக்கி எனையாண்ட - சிவமாக்கி என்னை ஆட்கொண்ட - சிவத்தன்மையாக்கி என்னை ஆட்கொண்ட

அத்தனெனக் கருளியவா றார்பெறுவார் அச்சோவே - இறைவன் பெருங்கருணையினால் தானே வந்து தனக்கு அருளிய அத்தகைய அருமையை யார் தான் பெறுவர்!

ஆணவமலத்துள் சிக்கித்தவித்துக் கொண்டிருந்த தன்னை அதிலிருந்து விடுவிக்கும் பொருட்டு இறைவன் ஆன்மாவாகிய தன்மீது கொண்ட பெருங்கருணையின் நிமித்தம் தன்னை தனு,கரண,புவன போகங்களை அனுபவிக்கச் செய்து பிறவிகள் தந்து அதனூடாக பக்குவப்படவைத்து இன்பம்-துன்பம் இரண்டையும் சமமாக பாவிக்கின்ற அருமையை ஏற்படவைத்து கன்மம்,மாயை ஆகியவற்றை உதரியபின் மூலமலமாகிய ஆணவமலத்தை தானே முன்வந்து நீக்கி சிவமாக்கி நிலையான பேரின்பத்தை தந்தருளிகின்றான் என்பதை சூட்சுமமாக இப்பாடலில் உணர்த்துகின்றார் மாணிக்கவாசகர்.

சிவமாக்கி என்னை ஆண்ட என்ற பதமும் அத்தன் எனக்கு அருளியவாறு என்கின்ற பதமும் நமக்கு தெளிவாக ஒருசெய்தியை உணர்த்துகின்றது. அது யாதாயின்; இறைவனே நமக்குள் இருக்கின்ற சிவத்தன்மையை உணரவைத்து(ஒன்றாய்,வேறாய்,உடனாய் ஆன்மாக்களோடு இறைவன் கலந்திருக்கின்ற தன்மையை) நமக்கு வீடுபேறு அருளி நிலையான முக்தியை தந்தருளிகின்றான் என்பதையாகும்.

வேதாந்த அத்வைதத்துக்கும்(கேவலாத்வைதம்) சைவசித்தாந்த (சுத்தாத்வைதம்) அத்வைதத்தும்மும் உள்ள வேறுபாடுதான் என்ன?

வேதாந்திகள் அத்வைதத்துக்கு சொல்லும் பொருள் இரண்டின்மை( இரண்டு இன்மை). சைவ சித்தாந்தம் அத்வைதத்துக்கு சொல்லும் பொருள் இரண்டன்மை ( இரண்டு அன்மை).

ஒன்றா காமல் இரண்டா காமல்
ஒன்று மிரண்டு மின்றா காமல் - இருபா இருபது

யாழ்ப்பாணப் பல்கலைக்கழகத்தின் மெய்யியல்த்துறையின் மூத்த விரிவுரையாளர் டாக்டர் நா.ஞானகுமாரன், எட்டாவது உலகத்தமிழ் மாநாட்டுச் சிறப்பு வெளியீடாக வந்த தனது நயந்தரும் சைவசித்தாந்தம் என்னும் நூலில் இரண்டின்மை, இரண்டன்மை என்னும் சொற்களில் உள்ள வேறுபாட்டை குறள் கொண்டு அழகாக தெளிவுபடுத்துகிறார்.

பொருள் அல்லவற்றைப் பொருளெண்றுணரும்
மருளானா மாணப்பிறப்பு -திருக்குறள்
-"அல்ல என்பதன் வழி பொருளின் இன்மைத்தன்மை எடுத்தாளப்படவில்லை. இதற்குப் பதிலாக பிரிதொரு பொருளின் இருப்பு உள்ளீடாக ஏற்கப்படுவதாகின்றது"

பொருள் இல்லை என்றால் இன்மையை வெளிப்படுத்துகின்றது. பொருள் அல்ல என்றால் அது மறைமுகமாக இன்னொரு பொருள் இருப்பதை வெளிப்படுத்துகின்றது.

நன்கொடை வாங்கும்போது "பொருள் அல்லது பணமாக தாருங்கள்" என்பர்! இது பொருள் இல்லை பணமாக தாருங்கள் என்று சொற்றொடர் அமைக்க முடியாது. ஏனெனில் இல்லை என்பது இன்னொரு பொருளை மறைமுகமாக சுட்டாது. ஆனால் அல்ல என்பது இன்னொரு பொருளை மறைமுகமாக சுட்டும்.

எனவே இரண்டின்மை என்பது ஒன்றுதான் என்பதை சுட்டுகின்றது. ஆனால் இரண்டன்மை என்பது "ஒன்றுமல்ல;இரண்டும் அல்ல!" என்பதை சுட்டுகின்றது.

வேதத்தில் ஏகமேவ அத்துவதீயம் பிரமம் என்னும் அடியில் ஏகம்,அத்வைதம் என்னும் இரு சொற்களும் ஒன்று என்பதாகாது என்பதை சித்தாந்தம் தெளிவுபடுத்துகின்றது. ஏகம் என்பது ஒன்றென்பதையும் அத்வைதம் என்பது இரண்டல்ல என்பதையும் சுட்டுகின்றது என்று சித்தாந்தம் தெளிவுபடுத்துகின்றது.

இரண்டன்மை நிலை என்றால் என்ன?

கலப்பினால் ஒன்றாயும் பொருள் தன்மையால் வேறாயும் செயல்படுதன்மையில் உடனாயும் இறைவன் ஆன்மாவுடன் இருக்கும் தன்மையே அத்துவிதம் என்று சைவசித்தாந்தம் கண்டது. அதாவது ஒன்றும் அல்ல! இரண்டும் அல்ல! இப்படி இருக்கும் தன்மையே உண்மையான அத்துவிதத்தின் பொருள் என்று தெளிவுபடுத்தி விளக்குவதே சைவசித்தாந்தம்.

வேதாந்திகள் தத்துவம் அசி -அதுவே நீ என்கின்றனர். ஆனால் சைவசித்தாந்தம் "நீ அதுவாக வேண்டும்" என்று தத்துவம் அசி என்னும் மகாவாக்கியத்துக்கு பொருளுரைக்கின்றது.

பண்ணையும் ஓசையும் போலப் பழமதுவும்
எண்ணுஞ் சுவையும்போல் எங்குமாம் - அண்ணல்தாள்
அத்துவிதம் ஆதல் அருமறைகள் ஒன்றென்னா
தத்துவிதம் என்றறையும் ஆங்கு -சிவஞானபோதம்

"பண்ணும் ஓசையும் போலவும் பழமுஞ் சுவையும் போலவும் இறைவன் எங்கும் கலந்திருக்கின்றான். இத்தன்மையை மறைகள் ஒன்றுமல்ல இரண்டுமல்ல அத்துவிதம் என்கின்றன" என்கின்றது சிவஞானபோதம்

சரி; ஆன்மாவோடு இறைவன் ஒன்றாய்,வேறாய்,உடனாய் கலந்துள்ளான் என்கிறதே சைவசித்தாந்தம்....அது என்ன? சற்று விரிவாக பார்ப்போம்!

ஒன்றாய்,வேறாய்,உடனாய் இறைவன் ஆன்மாவோடு இருக்கும் தன்மையை திருஞானசம்பந்தர் அழகாய் தெளிவுபடுத்துகின்றார்.

ஈறாய்முத லொன்றாயிரு பெண்ணாண்குண மூன்றாய்
மாறாமறை நான்காய்வரு பூதம்மவை யைந்தாய்
ஆறார்சுவை யேழோசையொ டெட்டுத்திசை தானாய்
வேறாயுட னானானிடம் வீழிம்மிழ லையே.

பொழிப்புரை :
ஊழிக் காலத்தில் அனைத்தையும் ஒடுக்குவோனாய், ஒடுங்கிய உடலைத் தானொருவனே முதற்பொருளாய் நின்று தோற்றுவிப்பவனாய், சக்தி சிவம் என இருவகைப்பட்டவனாய், முக்குண வடிவினனாய், எக்காலத்தும் மாறுபடாத நான்மறை வடிவினனாய், ஐம்பெரும்பூதங்கள், ஆறுசுவை, ஏழு ஓசை, எட்டுத்திசை ஆகியவற்றில் நிறைந்தவனாய், உயிரோடு ஒன்றாகியும், வேறாகியும், உடனாகியும் விளங்கும் இறைவனது இடம் திருவீழிமிழலை.
நன்றி:-http://www.thevaaram.org/thirumurai_1/onepage.php?thiru=1&Song_idField=1011

ஒன்றாய் - உடலும் உயிரும் கலந்து இருப்பதுபோல் ஒன்றாய் - (கலப்புத்தன்மையில்)

வேறாய் - உடலும் உயிரும் பொருட்தன்மையில் வேறுவேறுபோல்; பொருட்தன்மையில் கண்ணொளியும் சூரிய ஒளியும் வேறுவேறுபோல் - (பொருட்தன்மையில்)

உடனாய் - கண்ணொளியும் ஆன்மபோதமும் போல்- (இயங்குதன்மையில்)

              "சிவனருளாலே சிவன் தாள் வணங்கி" - மாணிக்கவாசகர்
                            விளக்கொளி பொருளைக் காட்டினாலும் கண்ணொளி அதைக் கண்டுவிடாது காணும்போது உயிரறிவும் உடன்நின்று காணுதல் வேண்டும். அதாவது தெருவில் யாரேனும் தெரிந்தவர் நம் எதிரே வந்துகொண்டு இருப்பர். ஆனால் நமது சிந்தனை ஓட்டம் வேறு எங்கோ இருக்கும். ஆனால் நாம் நடந்துகொண்டிருப்போம். வந்தவர் "என்னப்பா எதிரே வருகிறன்...தெரியாமல் மாதிரி போகிறியே!" என்பார். இது கண்ணில் விழுந்த காட்சியை உயிரறிவு பெற்றுக் கொள்ளாமையினால் வந்ததாகும். உயிரறிவு கண்ணொளியுடன் உடனாக செயற்படாமையால் வந்ததாகும்.

ஆக; இறைவன் ஆன்மாவோடு என்றுமே பிரிக்கப்படாதவராக; ஆன்மாவுடன் ஒன்றாய்,வேறாய்,உடனாய் அத்துவிதமாய் இருப்பார்.
முக்தி நிலையிலும் சரி; முக்திக்கு முன்னரும் சரி இந்தநிலையில் மாற்றமில்லை!!!

எனக்குள்நீ என்றும் இயற்கையாப் பின்னும்
உனக்குள்நான் என்ற உறுதிகொள்வ தெந்நாளோ - தாயுமானவர்

    (பொ - ள்.) (ஆருயிர்கள் கட்டு நிலையில் இருவினைத் தொழில்களை ஈட்டலுந்துய்த்தலும் செய்து கட்டறுத்தற்பொருட்டு முதல்வன் அவ்வுயிர்களினுள் மறைந்து நின்றருள்வன்) அம் முறையில் (ஆருயிர்கள்) எனக்குள் நீயென்று நிற்கும் இயற்கைபோல் (ஒட்டு நிலையில் திருவடித்துய்ப்பின் பொருட்டு அவ்வுயிர்களைத் தன்னுள்ளடக்கித் தான் முன்னருள்வன் சிவன்) ஒட்டு நிலையில் உனக்குள் நான் என்ற உறுதிகொள்வ தெந்நாளோ?

இப்படி இறைவன் ஆன்மாவின் பொருட்டு; ஆன்மாவோடு ஒன்றாய்,வேறாய்,உடனாய் புணர்ந்திருக்கும் புணர்ப்பே இரண்டன்மை ஆகும்.

சைவசித்தாந்தம் கூறும் அத்துவித விளக்கமாகிய இரண்டன்மையே உண்மையான அத்துவிதபொருள் என்பதை எப்படித் துணியலாம்?

வேதாந்தத் தெளிவாம் சைவ
சித்தாந்தத் திறன்இங்குத் தெரிக்கலுற்றாம்.- சிவப்பிரகாசம்

வேதத்தின் முடிவிற் தெளிவாகியுள்ள சைவசித்தாந்தம் - மதுரை சிவப்பிரகாசர்
வேதத்தின் முடிவிலே சொல்லப்பட்ட தெளிவான சைவசித்தாந்தம் - சிறி சிதம்பரநாதமுனிவர்
பதி,பசு,பாசம் என்னும் முப்பொருள்களைப் பிரதிபலிக்கும் வேதாந்தத்தின் தெளிவுப் போதமாகிய சைவசித்தாந்தம் - காசிவாசி செந்திநாதையர்
வேதாந்தத்தைத் தெளிந்து உரைக்கும் சைவசித்தாந்தம் - திருவிளங்கம் அவர்கள்
இவ்வாறு சமய அறிஞர் வேதாந்தத் தெளிவாம் சைவசித்தாந்தம் என்பதற்கு பொருள்காண்கின்றனர்.

வேதாந்தம் சுத்தம் விளங்கிய சித்தாந்தம்
நாதாந்தம் கண்டோர் நடுக்கற்ற காட்சியர்
பூதாந்த போதாந்த மாகப் புனஞ் செய்ய
நாதாந்த பூரணர் ஞானநே யத்தரே -திருமந்திரம்
பொழிப்புரை :
வேதத்தின் முடிந்த பொருள் இன்னது எனத் தெளிவாக விளங்குவதாகிய சித்தாந்த சைவத்தில் நின்று, நாத முடிவான தத்துவங்களைக் கண்டு கழித்தோரே, பின் ஒரு காலும் அசைவில்லாத திண்ணிய மெய்யுணர்வைப் பெற்றவராவர். பின்னும் அவர் `நான்` என்னும் தற்போதமும் கழலும்படி உணர்வு திருந்தப் பெறுவாராயின், நாதமுடிவில் விளங்கும் நிறை பரம் பொருளாகிய சிவமாந்தன்மையைப் பெறுவர். அதனைப் பெற்றோரே உண்மை ஞானத்தால் உண்மை ஞேயத்தை எய்தினோராவர்.
நன்றி:- http://www.thevaaram.org/thirumurai_1/onepage.php?thiru=10&Song_idField=10501

கற்பன கற்றுக் கலைமன்னு மெய்யோகம்
முற்பத ஞானம் முறைமுறை நண்ணியே
சொற்பதம் மேலித் துரிசற்று மேலான
தற்பரங் கண்டுளோர் சைவசித் தாந்தரே -திருமந்திரம்
பொழிப்புரை :
கற்கத் தக்கனவாகிய சிவாகமங்களைக் கற்று, அவைகளிலே சிறப்பாகப் பொருந்தியுள்ள பிராசாத யோகத்தின் வழிப் பிரணவ ஞானத்தைப் படிமுறையால் பொருந்தி, சாலோகம் முதலாகச் சொல்லப்பட்ட பதமுத்திகளையும், அடைந்து, இவை யெல்லாவற்றின் விளைவாகவும் அதிதீவிரபரிபாகமும், அதிதீவிர சத்திநிபாதமும் வரப்பெற்று, அனைத்துப் பொருளுக்கும் மேலாய், ஆன்ம வியாபகத் திற்கும் மேலான வியாபகப் பொருளாகிய பரசிவப் பொருளைத் தலைப்பட்டவரே `சைவ சித்தாந்திகள்` எனப் படுகின்றனர்.
நன்றி:- http://www.thevaaram.org/thirumurai_1/onepage.php?thiru=10&Song_idField=10501

அத்துவித மென்ற அந்நியச்சொற் கண்டுணர்ந்து
சுத்த சிவத்தைத் தொடருநாள் எந்நாளோ -தாயுமானவர்

(பொ - ள்) இரண்டிணை ஒன்றென்னும் உண்மையே அத்துவிதம் என உணராது ஒன்றே அத்துவிதம் என்னும் வேற்று நெறியினர் சொல்லைக் கண்டகன்று தூயசிவத்தை யடையுநாள் எந்நாளோ?

சுத்தாத்துவிதம் (சுத்தாத்வைதம்) என்றால் என்ன?

கலப்பால் ஒன்றாய், அறிவாளும் பொருட்தன்மையாலும் வேறாய் (பதி-முற்றறி; பசு -சிற்றறிவு;அறிவித்தால் அறிவது) இயங்குதன்மையில் உடனாய் பதி பசுவோடு வேறறப் புணர்ந்திருக்கும் புணர்ப்பே தூய்மையான(சுத்தமான) அத்துவிதம்! இரண்டன்மை!

பொய்கண்டார் காணாப் புனிதமெனும் அத்துவித
மெய்கண்ட நாதன்அருள் மேவுநாள் எந்நாளோ -தாயுமானவர்

(பொ - ள்) புன்னெறியாம் பொய்ச்சமயம் கூறியவற்றை உண்மையென மயங்கி உழலும் முக்கூற்றுப் புறச்சமயத்தாரும் காணமுடியாத அடைமுதலியன சேர்க்கப்படாத தூய அத்துவிதத்தை மொழிந்தருளிய மெய்கண்ட நாதனருன் பொருந்துநாள் எந்நாளோ?

வேதாந்தத்துக்கும் சித்தாந்தத்துக்கும் உள்ள தொடர்பு என்ன?

வேதாந்த சித்தாந்த தொடர்பை குமரகுருபரர் பண்டாரமும்மணிக் கோவையில் தெளிவுபடுத்துகின்றார்.

"வேதாந்த மென்றுச்சியிற் பழுத்த ஆரா இன்பம்
அருங்கனி பிழிந்து சாரங் கொண்ட
சைவசித்தாந்தத் தேனமு தருத்தினர்"

தெவிட்டாத சுவையுடைய பழமாக வேதாந்தத்தையும் அந்த வேதாந்தப் பழத்தை பிழித்தெடுத்த சாரமாகச் சைவசித்தாந்தத்தையும் சுட்டுகின்றார்.

ஆக; வேதாந்தத் தெளிவே சைவசித்தாந்தம்!

ஆக; வேதாந்தம் வேறு; அதற்கு சங்கரர் கொடுத்த அத்துவித விளக்கமாகிய கேவலாத்துவிதம் வேறு! இந்த நுனி இழை வேறுபாட்டை உணர்ந்து கொள்வது சைவசமயத்தவர்களுக்கு அவசியமான ஒன்றாகும். வேதாந்தத்துக்கு சங்கரர் பிழையான வியாக்கியானம் கொடுத்துள்ளார். அதுதான் அந்த நுனியிழை வேறுபாடு!!!!

சங்கரரின் அத்வைதத்தை பின்பற்றின் என்ன குறை?

நான் கடவுள் என்பது ஆணவம்! போலிச்சாமியார்கள் கடவுள்களாகி பெருமாளிகை கட்டி; தங்கத்தை தலையணையில் வைத்துபடுத்துறங்க வசதியேற்படுத்திய அபச்சாரமே நான் கடவுள் தத்துவம்! அதனால்த்தான் "நான் கடவுள்" என்பவர் அனைவரும் சங்கரரின் அத்வைதத்தை தமது கருத்துகளாலாக முன்வைக்கின்றனர்! நான் கடவுள்....நீ கடவுள் என்று கூறி தான்மட்டும் பணம் சம்பாதிக்கின்றனர்! நான் கடவுள்....நீயும் கடவுள் என்றால் பிறகு நீ ஏன் என்னை வழிபட வருகிறாய் என்று இவர்கள் இதுவரை கேட்டதாய் சரித்திரம் இல்லை!

நான் கடவுள் என்றால் ஆணவம்!
நீ கடவுள் என்றால் அபச்சாரம்!
நம்முள் கடவுள் என்றால் அழகு!

நாம்பிரம மென்றால் நடுவேயொன் றுண்டாமால்
தேம்பிஎல்லா மொன்றாய்த் திகழுநாள் எந்நாளோ -தாயுமானவர்

(பொ - ள்) ஏகான்மவாதக் கொள்கைப்படி நானே பிரமம் என்று கூறிக்கொண்டால் நான் என்னும் அகங்காரமே தோன்றும். அது பசுஞானம் என்றே சொல்லப்படும்; எல்லாம் ஒன்றாகத் திருவருளால் உணர்ந்து மெய்ப்புணர்ப்புற்று நிறைந்து நிற்கும்நாள் எந்நாளோ?

எனவே; ஆணவமலத்தை ஊட்டும் இயல்புடையதால் சங்கரரின் அத்வைதக்கொள்கை கேவலாத்வைதம் எனப்படும்.

சிவோகம் பாவணை என்றால் என்ன?

ஆன்மாவோடு இறைவன் ஒன்றாயும் வேறாயும் உடனாயும் நிறைந்திருக்கின்ற தன்மை - அதாவது ஒன்றல்ல.....அதேசமயத்தில் இரண்டும் அல்ல என்கின்ற இரண்டன்மை புணர்வே தூய்மையான அத்துவிதம்.
இது அநாதி தொட்டு நிலவிவரும் புணர்ப்பு!

இத்தகைய அநாதிகாலமாய் இருந்துவரும் இரண்டன்மை புணர்ப்பை ஆன்மா உணரும்போது சிவோகம் பாவணை வாய்க்கப் பெறும்.
நான் என்னும் நினைப்பு ஒழியும்போது தன்னுணர்வை இழக்கும் ஆன்மா தன்னோடு இரண்டன்மையாய் இருக்கும் சிவத்தை மட்டுமே உணரும்! சிவமாய் உணரும்!
நவமாய செஞ்சுடர் நல்குதலும் நாம் ஒழிந்து
சிவமான வாபாடித் தெள்ளேணம் கொட்டாமோ - திருத்தெள்ளேணம் (திருவாசகம்)

சிந்தைதனைத் தெளிவித்துச் சிவமாக்கி எனையாண்ட - கண்டப்பத்து (திருவாசம்)

சித்தமலம் அறுவித்துச் சிவமாக்கி எனையாண்ட - அச்சோப் பதிகம் (திருவாசம்)

    ஒருவனவன் யானைகெடக் குடத்துட் செங்கை
        ஓட்டுதல்போல் நான்பேதை உப்போ டப்பை
    மருவவிட்டுங் கர்ப்பூர மதனில் தீபம்
        வயங்கவிட்டும் ஐக்கியம் உன்னி வருந்தி நிற்பேன்
    அருளுடைய பரமென்றோ அன்று தானே
        யானுளனென் றும்மெனக்கே ஆணவாதி
    பெருகுவினைக் கட்டென்றும் என்னாற் கட்டிப்
        பேசியதன் றேஅருள்நூல் பேசிற் றன்றே - தாயுமானவர்
எளியேனுக்கு அருள்பாலிக்கின்ற இறைவன் என்றுள்ளானோ அன்றுதொட்டு நானும் உள்ளேன். எனவே அநாதி காலம் தொட்டு உப்பும் நீரும் கலந்த உப்புத்தண்ணீர் போன்றும் கற்பூரமும் நெருப்பும் கலந்திருக்கும் கலப்புப்போலவும் அநாதிகாலம் தொட்டு இறைவனோடு கலந்து நிற்கையில், புணர்ப்பாகிய ஐக்கியத்தை வேண்டி வருந்துகிறேனே!
                                                     வேடனொருவன் தான்கண்ட யானை மறைந்துவிட அதனைத் தேடி அலைந்து அலுத்து சோர்வுற்ற நிலையில் ஏற்படும் மயக்க உணர்வால் யானை இருப்பதற்கு எள்ளளவுக்கும் வாய்ப்பில்லாத குடத்துக்குள் கூட கைவிட்டு தேடுவான். அப்படியான ஒருநிலையில் உனது ஐக்கியத்தை தேடி அலையும் நான் நிற்கின்றேன். இந்த மயக்கம் எனக்கு ஏன் வந்தது என்றால் ஆணவம்,வினை ஆகிய மலங்களினால் வந்தது. இந்த மலங்களோடு இருப்பதால் உன்னோடான எனது இரண்டன்மை நிலையை நான் உணராமல் வருந்துகிறேன்; இது எளியேனது கருத்தல்லவே? அருள்நூல்(மறைநூல்/சிவாகமநூல்/திருமுறை/சித்தாந்தநூல்) அல்லவா கூறுகின்றது!

இப்படியான சிவோகம் பாவணையே சிவனடியார்கள் பூணுவது. தானெனும் உணர்விழந்து சிவத்தை மட்டுமே உணருகின்ற உன்னதநிலை!!!! சிவம் மட்டுமே புலப்படுகின்ற முக்திநிலை!!!! சுத்தாத்துவித நிலை!!!!

குறிப்பு:-"ஒருவனவன் யானைகெடக்..." என்னும் பாடல் தவிர்த்து ஏனைய தாயுமானவர் சுவாமிகளின் திருப்பாடல்களுக்கு சித்தாந்த பண்டிதர்,சைவசித்தாந்த நூற்பதிப்புக் கழகப்புலவர் ப.இராமநாத பிள்ளை ஐயாவின் உரை பயன்படுத்தப்பட்டுள்ளது.
நன்றி:-http://www.tamilvu.org/library/l5F40/html/l5F40ind.htm

இந்தப் பகுதியில் சைவசித்தாந்தமே உண்மையான அத்வைதம் என்பதை பார்த்தோம். அடுத்த பகுதி இப்பகுதியின் நீட்சியாக அமையும்; அது என்ன நீட்சி? அடுத்த பகுதியில் பார்ப்போம்! எல்லாம் திருவருட் சம்மதம்!

திருவண்ணாமலை -கார்த்திகைத் திருவிழா

2011-12-11T03:49:00.001+03:00

திருவண்ணாமலை பற்றிய காணொளி காட்சி

கார்த்திகைத் திருவிழா நிழற்படக் காட்சிகளைக் காண்பதற்கு கீழ் உள்ள சுட்டியை அழுத்துமாறு பணிவோடு வேண்டுகிறேன்.

கார்த்திகைத் திருவிழா
பிடாரி அம்மன் உற்சவம்
முதலாம் நாள்(கொடியேற்றம்)
இரண்டாம் நாள்
மூன்றாம் நாள்
நான்காம் நாள்
ஐந்தாம் நாள்
ஆறாம் நாள்
ஏழாம் நாள்
எட்டாம் நாள்
ஒன்பதாம் நாள்
பத்தாம் நாள்(மகா தீபம்)
தீர்த்தத் திருவிழா

எல்லாம் திருவருட் சம்மதம்

சைவநெறி என்று பறைவோம்
திருநெறித் தமிழராய் வாழ்வோம்

திருச்சிற்றம்பலம்

சகலகலாவல்லி மாலை-பொருளுரை

2011-10-05T15:02:00.002+03:00

ஸ்ரீகுமரகுருபரர் காசிக்கு சென்றபோது அங்கு மீண்டும் சைவாலயம் அமைத்திட விரும்பினார். அதற்கு காசி உட்பட்ட பிரதேசங்களில் பாதுஷாவின் பிரதிநிதியாக இருந்த தாரா ஷிக்கோஹ் என்பவரிடம் அனுமதி பெறவேண்டியிருந்தது. கொடுங்கோல் ஆட்சி செய்த அவர்களிடம் அனுமதி பெறுவதென்பது முயல் கொம்பு காரியம் என அனைவரும் அறிவுறுத்தியிருந்தனர். எனினும் ஸ்ரீ குமரகுருபர சுவாமிகள் அவரிடம் சென்று ஹிந்துஸ்தானி மொழிபெயர்ப்பாளரை அழைத்துச் சென்று காசியில் ஆலயம் அமைக்க நிலம் கேட்டபோது ஹிந்துஸ்தானி தெரியாத காரணத்தினால் அவமதிக்கப்பட்டார். கோரிக்கையும் நிராகரிக்கப்பட்டது! எனினும் சிந்தை கலங்காது, கலைவாணியைத் துதித்து சகலகலாவல்லி பாமாலை இயற்றிச் சூட்டி ஹிந்துஸ்தானி , உருது மொழியாற்றல்களை ஒரேநாளிலேயே பெற்றுக்கொண்டார்.

தனது தவச்சிறப்பால் சிங்கத்தை தன்வசப்படுத்தி அதன்மேல் அமர்ந்து தாரா ஷிக்கோஹ்யின் அவைக்குச் சென்று தனது கோரிக்கையை ஹிந்துஸ்தானியில் கேட்டு, ஹிந்துஸ்தானியிலே அவனுடன் சரளமாக கதைத்து நாணச்செய்து அவனிடம் இருந்து இடத்துக்குரிய அனுமதியைப் பெற்று காசிமடம் ஆகியவற்றை அமைத்துக் கொண்டார்.

இவையாவும் கலைவாணியின் அருள்மழையால் ஸ்ரீகுமரகுருபர சுவாமிகளுக்கு கைகூடியது.எனவே, நாமும் கலைவாணியின் அருள்மழையைப் பெற்றிட இயற்றிய தமிழ்மழையை கலைவாணிமேல் பொழிகின்ற சகலகலாவல்லி பாமாலையை பாடுவோமாக!

"சொல்லிய பாட்டின் பொருள் உணர்ந்து சொல்லுவார்
செல்வர் சிவபுரத்தின் உள்ளார் சிவன் அடிக்கீழ்ப்
பல்லோரும் ஏத்தப் பணிந்து' என்று மாணிக்கவாசகப் பெருமான் பொருளுணர்ந்து பாட வேண்டியதன் சிறப்பை திருவாசகத்தின் சிவபுராணத்தில் தெளிவுபடுத்தியுள்ளார். எனவே பொருளுணர்ந்து பாடுவோமாக!

1)வெண்டா மரைக்கன்றி நின்பதந் தாங்கவென் வெள்ளையுள்ளத்
தண்டா மரைக்குத் தகாதுகொ லோசக மேழுமளித்
துண்டா னுறங்க வொழித்தான்பித் தாகவுண் டாக்கும்வண்ணம்
கண்டான் சுவைகொள் கரும்பே சகல கலாவல்லியே.

பதம் பிரித்து அமைந்த பாடல்:

வெண் தாமரைக்கு அன்றி நின்பதம் தாங்க என்வெள்ளை உள்ளத்
தண் தாமரைக்குத் தகாது கொலோ சகம் ஏழும்அளித்து
உண்டான் உறங்க ஒழித்தான் பித்தாக உண்டாக்கும் வண்ணம்
கண்டான் சுவைகொள் கரும்பே சகல கலாவல்லியே.

சகலகலாவல்லியே -
எல்லாக் கலைகளையும் அளிக்கின்ற வல்லமை உடையவளே

சகம் ஏழும்அளித்து உண்டான் உறங்க -
காக்கும் கடவுளாகிய திருமால், ஊழிக்காலத்தில் ஏழுலகையும் காப்பதற்காக அவற்றை உண்டு, (ஆலிலைமேல்) துயின்றான்.
ஊழிக் காலத்தில் உலகங்கள் அனைத்தையும் உண்டு காத்த வண்ணம் ஆல் இலைமேல் துயில்வார் என்பது புராணச்செய்தி.

ஒழித்தான்பித் தாக - அழிக்கும் கடவுளாகிய சிவபெருமான் பித்தனைப் போல் சுடலையில் ஊழிக் கூத்தாடினான்.

உண்டாக்கும் வண்ணம் கண்டான் சுவைகொள் கரும்பே - உயிர்கள் அனைத்தையும் படைக்கும் பிரம்மதேவனுக்கு கரும்புபோல் இனிப்பவளே!

வெண்தாமரைக்கு அன்றி நின்பதம் தாங்க என் வெள்ளை உள்ளத் தண்தாமரைக்குத் தகாதுகொலோ - உனது திருவடிகளைத் தாங்கும் பேறு வெண்தாமரையைத் தவிர்த்து எனது உள்ளமாகிய வெண்தாமரைக்கு வாய்க்கப்பெறாதது முறையா?

காக்கும் கடவுளாகிய திருமால், ஊழிக்காலத்தில் ஏழுலகையும் காப்பதற்காக உண்டு, ஆலிலைமேல் துயின்றான். அழிக்கும் கடவுளாகிய சிவபெருமான் பித்தனைப் போல் சுடலையில் ஊழிக் கூத்தாடினான். ஆனால், உயிர்கள் அனைத்தையும் படைக்கும் பிரமன், கலைமகளாகிய உன்னை மனைவியாகப் பெற்று மகிழ்ந்தான். பிரம்மதேவனுக்கு கரும்புபோல் இனிப்பவளே! சகலகலா வல்லியே! உனது திருவடிகளை வெள்ளைநிறத் தாமரையே தாங்கியுள்ளது! வஞ்சனையற்ற குளிர்ந்த எளியேனின் மனம் வெண்தாமரை போல் ஆகிவிட்டது. எனவே எளியேனின் வெண்தாமரை போன்ற மனதினை உனது திருவடிகளை தாங்கும் ஆசனம் ஆக்கிக்கொள்ளக்கூடாதா? இன்னும் அத்தகு தகுதியான வெண்மையுள்ளம் வாய்க்கப்பெறவில்லையா? இது தகுமா?

"வெள்ளைநிற மல்லிகையோ?

வேறெந்த மாமலரோ?

வள்ளல் அடியிணைக்கு

வாய்த்த மலரெதுவோ?

வெள்ளைநிறப் பூவுமல்ல!

வேறெந்த மலருமல்ல!

உள்ளக் கமலமடி

உத்தமனார் வேண்டுவது!" - என்ற சுவாமி விபுலானந்த அடிகளின் பாடலையும்

'மலர்மிசை ஏகினான் மாணடி சேர்ந்தார்
நிலமிசை நீடுவாழ் வர்' என்னும் திருக்குறளின் மலர்மிசை ஏகினான் என்பதன் பொருளையும் இங்கு பொருத்து உணர்க!

2)நாடும் பொருட்சுவை சொற்சுவை தோய்தர நாற்கவியும்
பாடும் பணியிற் பணித்தருள் வாய்பங்க யாசனத்திற்
கூடும் பசும்பொற் கொடியே கனதனக் குன்றுமைம்பாற்
காடுஞ் சுமக்குங் கரும்பே சகல கலாவல்லியே.

பதம் பிரித்து அமைந்த பாடல்:
நாடும் பொருட்சுவை சொற்சுவை தோய்தர நாற்கவியும்
பாடும் பணியில் பணித்தருள் வாய் பங்கயாசனத்தில்
கூடும் பசும்பொற் கொடியே கனதனக் குன்றும் ஐம்பால்
காடும் சுமக்கும் கரும்பே சகல கலாவல்லியே.

பங்க யாசனத்திற் கூடும் பசும்பொற் கொடியே- தாமரை மலராகிய ஆசனத்தில் வீற்றிருப்பவளே! பசும்பொன்கொடி போன்றவளே!
கனதனக் குன்றும்-குன்றுபோன்ற பெரிய தனங்களை உடையவளே!

ஐம்பால்- ஐந்து கால் எடுத்துப் பின்னப்பட்டிருக்கும் பெண்-கூந்தல் ஒப்பனை
ஐம்பால் காடும் சுமக்கும் கரும்பே - ஐந்து பகுதிகளாக பகுத்து ஒப்பனை செய்யப்பட்ட காடுபோல் அடர்ந்த கூந்தலை தாங்கியுள்ளவளே! கருப்பாக இனிப்பவளே!

நாடும் பொருட்சுவை சொற்சுவை தோய்தர நாற்கவியும் - அறிஞர் நாடி ஆராய்ந்து அறிவதற்குரிய பொருள் சுவையும் சொல் சுவையும் பொருந்திய நான்கு வகைக் கவிகளையும் ( ஆசுகவி,மதுரகவி,சித்திரக்கவி,வித்தாரக்கவி)

பாடும் பணியில் பணித் தருள்வாய்- இடையறாது பாடும் பணிக்கு எளியேனை பணித்து அருள் செய்வாயாக!

ஆசுகவி - யாரும் இதுவரை பாடியிராத வகையில் யாரும் பாடியிராத பொருளின்பத்தை தரும் வண்ணம் புதிய புதியதாக பாடல்களை இயற்றும் கலை

மதுரகவி- இசைநடையில் கவி எழுதும் கலை

சித்திரக்கவி - தேர் போன்ற சித்திரத்தில் அடுக்கி வைக்கலாம் போன்ற அமைப்பில் சொற்களை அழகுற அடுக்கி பாடுகின்ற கலை

வித்தாரக் கவி - பலவிதமான அமைப்புகளில் அமைத்து பாடுவது

வெண்தாமரையை ஆசனமாகக் கொண்டிருப்பவளே! பசும்பொன் கொடி போன்றவளே! குன்றுபோலுள்ள் பெரிய தனங்களை உடையவளே! ஐந்து பகுதிகளாகப் பகுத்து அழங்கரிக்கப்பட்ட காடுபோல் அடர்த்தியான கூந்தலை தாங்கியிருப்பவளே! கரும்பாக இனிப்பவளே! சகலகலாவல்லியே! அறிஞர் நாடி ஆராய்ந்து அறிவதற்குரிய பொருட்சுவையும் சொற்சுவையும் பொருந்திய நான்கு வகைக் கவிதைகளை இடையறாது பாடும் பணிக்கு எளியேனைப் பணித்து அருள் செய்வாயாக!

3)அளிக்குஞ் செழுந்தமிழ்த் தெள்ளமு தார்ந்துன் னருட்கடலிற்
குளிக்கும் படிக்கென்று கூடுங்கொ லோவுளங் கொண்டுதெள்ளித்
தெளிக்கும் பனுவற் புலவோர் கவிமழை சிந்தக்கண்டு
களிக்குங் கலாப மயிலே சகல கலாவல்லியே.

பதம் பிரித்து அமைந்த பாடல்:
அளிக்குஞ் செழுந்தமிழ்த் தெள்அமுது ஆர்ந்துஉன் அருள்கடலில்
குளிக்கும் படிக்குஎன்று கூடும்கொ லோஉளம் கொண்டுதெள்ளித்
தெளிக்கும் பனுவல் புலவோர் கவிமழை சிந்தக்கண்டு
களிக்கும் கலாப மயிலே சகல கலாவல்லியே.

உளம் கொண்டு தெள்ளித் தெளிக்கும் பனுவல் புலவோர் கவிமழை சிந்தக்கண்டு களிக்கும் கலாப மயிலே சகல கலாவல்லியே -
எப்படி மழை பொழிவதை அறிந்து தோகைவிரித்து மயில் ஆடி மகிழ்கின்றதோ அதுபோன்று பல நூல்களையும் கற்றுத் தெளிந்த புலவர்கள் பொழிகின்ற கவிமழையில் களிப்படையும் சகலகலாவல்லியே!

உளம் கொண்டு - விருப்பம் கொண்டு
களிக்கும் கலாப மயிலே - மகிழ்ச்சியடையும் மயில் போன்றவளே
சிந்தக்கண்டு - பொழியக்கண்டு

அளிக்குஞ் செழுந்தமிழ்த் தெள்அமுது ஆர்ந்து -நீ எளியேனுக்கு அருளோடு அளித்த செழுமையான தெளிந்த தமிழ் அமுதத்தை சுவைப்பதனூடாக

உன் அருள்கடலில் குளிக்கும் படிக்குஎன்று கூடும் கொலோ - உன் திருவருட்கடலில் மூழ்கித் திளைக்கும் நிலை எளியேனுக்கு வாய்க்கப்பெறுமா?

எப்படி மழை பொழிவதை அறிந்து தோகைவிரித்து மயில் ஆடி மகிழ்கின்றதோ அதுபோன்று பல நூல்களையும் கற்றுத் தெளிந்த புலவர்கள் பொழிகின்ற கவிமழையில் களிப்படையும் சகலகலாவல்லியே!
நீ எளியேனுக்கு அருளோடு அளித்த செழுமையான தெளிந்த தமிழ் அமுதத்தை சுவைப்பதனூடாக ஆன்மீக அனுபவத்தை பெற்று உன் திருவருட்கடலில் மூழ்கித் திளைக்கும் நிலை எளியேனுக்கு வாய்க்கப்பெறுமா? அவ்வாறான அரும்பெரும் பேறை அருளுவாயாக!

4)தூக்கும் பனுவற் துறைதோய்ந்த கல்வியுஞ் சொற்சுவைதோய்

வாக்கும் பெருகப் பணித்தருள் வாய்வட நூற்கடலுந்

தேக்குஞ் செழுந்தமிழ்ச் செல்வமுந் தொண்டர்செந் நாவினின்று

காக்குங் கருணைக் கடலே சகல கலாவல்லியே.

பதம் பிரித்து அமைந்த பாடல்:

தூக்கும் பனுவல் துறைதோய்ந்த கல்வியும் சொற்சுவைதோய்

வாக்கும் பெருகப் பணித்து அருள்வாய் வடநூல் கடலும்

தேக்கும் செழுந்தமிழ்ச் செல்வமும் தொண்டர் செந்நாவில் நின்று

காக்கும் கருணைக் கடலே சகல கலாவல்லியே.

வடநூல் கடலும் தேக்கும் செழுந்தமிழ்ச் செல்வமும் தொண்டர் செந்நாவில் நின்று காக்கும் கருணைக் கடலே சகல கலாவல்லியே - கடல் போன்ற வடமொழி நூல்களின் கருத்துக்களையும் செழுமை மிகுந்த செல்வமாகிய தமிழ்நூல்களின் கருத்துக்களும் அடியார்களின் நல்ல நாவினின்று எக்காலத்திலும் நீங்காது காத்து அருளும் கருணைக் கடலே! சகலகலாவல்லியே!

செந்நாவில் நின்று - நல்ல நாவினின்று

தூக்கும் பனுவல் - அனைவரும் விரும்பும் வண்ணம் சிறப்புடைய பாடல்களை இயற்றும் திறனும்

துறைதோய்ந்த கல்வியும் - எல்லாத்துறைகளிலும் ஆளுமைதருகின்ற கல்வியும்

சொற்சுவை தோய் வாக்கும் - சொற்சுவை நிரம்பிய வாக்கும்

பெருகப் பணித்துஅருள் வாய்- பெருகி வளர்ந்திடு நிலைக்கு எளியேனை ஆளாக்கி அருள்வாயாக

கடல் போன்று விரிந்த எண்ணிலாத வடமொழி நூல்களின் கருத்துக்களையும் செழுமை மிகுந்த அருஞ்செல்வமாகிய தமிழ்நூல்களின் கருத்துக்களும் அடியார்களின் நல்ல நாவினின்று எக்காலத்திலும் நீங்காது காத்து அருளும் கருணைக் கடலே! சகலகலாவல்லியே!

அனைவரும் விரும்பும் வண்ணம் சிறப்புடைய பாடல்களை இயற்றும் திறனும் எல்லாத்துறைகளிலும் ஆளுமைதருகின்ற கல்வியும் சொற்சுவை நிரம்பிய வாக்கும் நாள்தோறும் பெருகி வளர்ந்திடு நிலைக்கு எளியேனை ஆளாக்கி அருள்வாயாக!

5)பஞ்சப் பிதந்தரு செய்யபொற் பாதபங் கேருகமென்

நெஞ்சத் தடத்தல ராததென் னேநெடுந் தாட்கமலத்

தஞ்சத் துவச முயர்த்தோன்செந் நாவு மகமும்வெள்ளைக்

கஞ்சத் தவிசொத் திருந்தாய் சகல கலாவல்லியே.

பதம் பிரித்து அமைந்த பாடல்:

பஞ்சுஅப்பு இதம்தரு செய்ய பொற்பாத பங்கேருகம் என்

நெஞ்சத் தடத்து அலராதது என்னே நெடுந் தாள் கமலத்து

அஞ்சத்துவசம் உயர்த்தோன் செந்நாவும் அகமும் வெள்ளைக்

கஞ்சத்து அவிசு ஒத்து இருந்தாய் சகல கலாவல்லியே.

நெடுந் தாள் கமலத்து - (திருமாலின் உந்தியில் இருந்து எழுந்த) நீண்ட தண்டிடைக் கொண்ட தாமரை மலரில் வீற்றிருப்பவனும்

அஞ்சத்துவசம் உயர்த்தோன்- அன்னக்கொடியை உயர்த்திப் பிடித்திருப்பவனும்

செந்நாவும் - சிறந்த நாவினையும்

அகமும் -மனதினையும்

வெள்ளைக் கஞ்சத்து அவிசு ஒத்து இருந்தாய்- ஆசனமான வெண்தாமரையாக கருதி அங்கு வீற்றிருப்பவளே!

பஞ்சுஅப்பு இதம்தரு செய்ய - செம்பஞ்சுக் குழம்பினை பூசி அழகுடன் விளங்கும்

பொற்பாத பங்கேருகம் - பொன்போன்ற தாமரை போன்ற உனது திருவடிகள்

என் நெஞ்சத் தடத்து அலராதது என்னே - எனது மனமாகிய பொய்கையில் இன்னும் மலராதது ஏன் தானோ?

தாள் - கால், கயிறு, முயற்சி,படி,காகிதம்,வைக்கோல்,கடையாணி,தாழ்ப்பாள்,திறவுகோல் (கழகத் தமிழ்க்கையகராதி) சிலர் நீண்ட இதழை உடைய தாமரை என்று பொருள் சொல்கின்றனர். அது பொருந்துமா என்று தெரியவில்லை! கழக அகராதிப்படி தாள் என்பது தாமரையின் தண்டையே பெரிதும் குறிக்கும்!

திருமாலின் உந்தியில் இருந்து எழுந்த நீண்ட தண்டிடைக் கொண்ட தாமரை மலரில் வீற்றிருப்பவனும் அன்னக்கொடியை உயர்த்திப் பிடித்திருப்பவனுமாகிய நான்முகனின் சிறந்த நாவினையும் மனதினையும் ஆசனமான வெண்தாமரையாக கருதி அங்கு வீற்றிருப்பவளே! சகலகலாவல்லியே!

செம்பஞ்சுக் குழம்பினை பூசி அழகுடன் விளங்கும் செம்மையான பொன்போன்ற தாமரை போன்ற உனது திருவடிகள், எனது மனமாகிய பொய்கையில் இன்னும் மலராதது ஏன் தானோ?

பொய்கைகளில் தாமரை மலர்வது இயல்பு. எனது மனமும் நீர்போன்று மென்மையாக உள்ளது. குளிர்மையாக உள்ளது. நீர்நிலைகளில் எப்படித் தாமரை மலர்வது இயல்போ மென்மையாலும் குளிர்மையாலும் நீர்நிலை போல் ஆகிவிட்ட எனது மனமெனும் பொய்கையில் தாமரை என்னும் உனது திருவடிகள் இன்னும் மலராது இருப்பது முறையோ என்று வருந்துகின்றார் குமரகுருபரர்.

6)பண்ணும் பரதமுங் கல்வியுந் தீஞ்சொற் பனுவலும்யான்

எண்ணும் பொழுதெளி தெய்தநல் காயெழு தாமறையும்

விண்ணும் புவியும் புனலுங் கனலும்வெங் காலுமன்பர்

கண்ணுங் கருத்து நிறைந்தாய் சகல கலாவல்லியே.

பதம் பிரித்து அமைந்த பாடல்:

பண்ணும் பரதமும் கல்வியும் தீஞ்சொல் பனுவலும் யான்

எண்ணும் பொழுது எளிதுஎய்த நல்காய்! எழுதா மறையும்

விண்ணும் புவியும் புனலும் கனலும் வெங்காலும் அன்பர்

கண்ணும் கருத்தும் நிறைந்தாய்! சகலகலாவல்லியே!

எழுதா மறையும் - எழுதாமறையாகிய வேதத்திலும்

விண்ணும் புவியும் புனலும் கனலும் வெங்காலும் -வானம்,நிலம்,நீர்,நெருப்பு,காற்று

அன்பர் கண்ணும் கருத்தும் நிறைந்தாய் - அடியார்களின் கண்ககளிலும் கருத்திலும் நிறைந்திருப்பவளே!

பண்ணும் பரதமும் கல்வியும் தீஞ்சொல் பனுவலும் - பண், பரதம்,நற்கல்வி, இனிய சொற்களால் கொண்டு கவிகள் (நூல்கள்)

எண்ணும் பொழுது எளிதுஎய்த நல்காய் - விரும்பும் காலத்தில் எளிதில் அடையும் வண்ணம் திருவருள் பாலிப்பாயாக

வானம்,நிலம்,நீர்,நெருப்பு,காற்று என்னும் ஐம்பூதங்களிலும் எழுதாமறையாகிய வேதத்திலும் அடியார்களின் கண்ககளிலும் கருத்திலும் நிறைந்திருப்பவளே! சகலகலாவல்லியே! பண், பரதம்,நற்கல்வி, இனிய சொற்களால் கொண்டு கவிகள் (நூல்கள்) இயற்றும் ஆற்றல் ஆகியனவற்றையெல்லாம் விரும்பும் காலத்தில் எளிதில் எளியேன் அடையும் வண்ணம் திருவருள் பாலிப்பாயாக!

7)பாட்டும் பொருளும் பொருளாற் பொருந்தும் பயனுமென்பாற்

கூட்டும் படிநின் கடைக்கணல் காயுளங் கொண்டுதொண்டர்

தீட்டுங் கலைத்தமிழ்த் தீம்பா லமுதந் தெளிக்கும்வண்ணம்

காட்டும்வெள் ளோதிமப் பேடே சகல கலாவல்லியே.

பதம் பிரித்து அமைந்த பாடல்:

பாட்டும் பொருளும் பொருளால்பொருந்தும் பயனும் என்பால்

கூட்டும்படி நின்கடைக்கண் நல்காய்! உளம்கொண்டு தொண்டர்

தீட்டும் கலைத்தமிழ்த் தீம்பால் அமுதம் தெளிக்கும் வண்ணம்

காட்டும் வெள் ஓதிமப் பேடே! சகலகலாவல்லியே!

உளம்கொண்டு தொண்டர் தீட்டும் கலைத்தமிழ்த் தீம்பால் அமுதம் தெளிக்கும் வண்ணம் - அடியார்கள் விரும்பி எண்ணிப் புனைகின்ற முத்தமிழ்க் கலை நூல்களில் காணப்படுகின்ற தீம்பால் அமுதம் (போன்ற மெஞ்ஞானத்தை) தெளிவிக்கின்ற

ஓதி/ ஓதிமம்-அன்னம்

பேடு -பெண்

பாட்டும் பொருளும் - பாட்டும் பாட்டுக்குரிய பொருளும்

பொருளால்பொருந்தும் பயனும்- பாடலில் பொருந்து நிற்கின்ற பயனும்

என்பால் கூட்டும்படி - எளியேனிடத்து வந்தடையும் வண்ணம்

நின்கடைக்கண் நல்காய் - உனது கடைக்கண் பார்வையை அருள்வாயாக!

அன்னம் நீரையும் பாலையும் பிரித்தறிந்து கொள்ளும் என்பர் கவிஞர். பேரின்பத்தை தருவனவற்றை உலகியல் இன்பங்களில் இருந்து பிரித்தறிந்து கொள்ளும் ஆற்றலை தனது அடியாருக்கு கலைமகள் வழங்கி அருள்பாலிப்பாள் என்பதை கலைமகளை வெண்மையான பெண் அன்னம் என்று சுட்டுவதன் வாயிலாக குமரகுருபரர் நமக்கு உணர்த்துகின்றார்.

அடியார்கள் நல்மனதால் எண்ணிப் புனைகின்ற நூல்களில் காணப்படுகின்ற வீடு பேற்றின்பமாகிய பாலையும் உலகியல் இன்பமாகிய நீரையும் தனித்தனியாக பிரித்தறிகின்ற தன்மையை உலக மக்களுக்கு உணர்த்தும் வெண்மையான பெண் அன்னம் போன்றவளே!

சகல கலாவல்லியே! பாட்டும் பாட்டுக்குரிய பொருளும் பாடலில் பொருந்து நிற்கின்ற பயனும் எளியேனிடத்து வந்தடையும் வண்ணம் எளியேனுக்கு கலைமகளே.....உமது கடைக்கண் பார்வையை அருள்வாயாக!

8)சொல்விற் பனமு மவதான முங்கவி சொல்லவல்ல

நல்வித்தை யுந்தந் தடிமைகொள் வாய்நளி னாசனஞ்சேர்

செல்விக் கரிதென் றொருகால முஞ்சிதை யாமைநல்கும்

கல்விப் பெருஞ்செல்வப் பேறே சகல கலாவல்லியே.

பதம் பிரித்து அமைந்த பாடல்:

சொல் விற்பனமும் அவதானமும் கவி சொல்லவல்ல

நல்வித்தையும் தந்து அடிமை கொள்வாய் நளின ஆசனம்சேர்

செல்விக்கு அரிதுஎன்று ஒருகாலமும் சிதையாமை நல்கும்

கல்விப் பெருஞ்செல்வப் பேறே சகல கலாவல்லியே.

நளினஆசனம்சேர் செல்வி- செந்தாமரையில் வீற்றிருக்கும் திருமகள்

ஒருகாலமும்- எக்காலத்திலும்

சிதையாமை நல்கும் -காலத்தால் அழியாத

கல்விப் பெருஞ்செல்வப் பேறே- கல்வி என்னும் பெரும் செல்வத்தை தந்து அருள்பவளே!

சொல் விற்பனமும்-சொல்வன்மையும்

அவதானமும்-அட்டாவதானம் தசாவதானம் சதாவதானம் எனப் போற்றப்படுகின்ற கூர்ந்து கவனிக்கின்ற ஆற்றல்களும்( நினைவாற்றல் சக்தி)

கவி சொல்லவல்ல நல்வித்தையும் - சிறப்புடைய கவிதைகளை பாடக்கூடிய வல்லமையுடைய வித்தகத்தன்மையும்

தந்து அடிமைகொள் வாய்நளின - அருளி எளியேனை உனது அடிமையாக்கி கொள்வாயாக!

செந்தாமரையில் வீற்றிருக்கும் திருமகளின் அருள் நமக்கு வாய்க்கப்பெறவில்லையே என்று வருந்துகின்ற நிலை எக்காலத்திலும் ஏற்படாவண்ணம் காலத்தால் அழியாத கல்வி என்னும் பெரும் செல்வத்தை தந்து அருள்பவளே! சகல கலாவல்லியே!

சொல்வன்மையும், அட்டாவதானம் தசாவதானம் சதாவதானம் எனப் போற்றப்படுகின்ற கூர்ந்து கவனிக்கின்ற ஆற்றல்களும்( நினைவாற்றல் சக்தி) சிறப்புடைய கவிதைகளை பாடக்கூடிய வல்லமையுடைய வித்தகத்தன்மையும்

எளியேனுக்கு அருளி எளியேனை உனது அடிமையாக்கி கொள்வாயாக!

9)சொற்கும் பொருட்கும் உயிராம்மெய்ஞ் ஞானத்தின் தோற்றம்என்ன

நிற்கின்ற நின்னை நினைப்பவர் யார்நிலம் தோய்புழைக்கை

நற்குஞ் சரத்தின் பிடியோடு அரசன்னம் நாணநடை

கற்கும் பதாம்புயத் தாளே சகல கலாவல்லியே.

பதம் பிரித்து அமைந்த பாடல்:

சொற்கும் பொருட்கும் உயிராம் மெய்ஞ்ஞானத்தின் தோற்றம்என்ன

நிற்கின்ற நின்னை நினைப்பவர் யார்? நிலம்தோய் புழைக்கை

நற்குஞ்சரத்தின் பிடியோடு அரசன்னம் நாண நடை

கற்கும் பதாம்புயத் தாளே! சகலகலா வல்லியே!

நிலம்தோய் புழைக்கை நற்குஞ்சரத்தின் பிடி - நிலத்தை தொடும்படி உடைய நீண்ட துதிக்கையை உடைய நல்ல பெண் யானை

அரசன்னம்- அரச அன்னமும்

நாண-நாணும்படி

நடை கற்கும் பதாம்புயத் தாளே-அழகாக நடைபயிலுகின்ற தாமரைபோன்ற திருவடிகளை உடையவளே

சொற்கும் பொருட்கும் -சொல்லுக்கும் பொருளுக்கும்

உயிராம் மெய்ஞ்ஞானத்தின் - உயிராக விளங்குகின்ற மெஞ்ஞானவடிவத்தின்

தோற்றம் என்ன நிற்கின்ற - (தோற்றமென நிற்கின்ற) - தோன்றி நிற்கின்ற

நின்னை நினைப்பவர் யார் - நினைப்பவர்கள் யாரும் இல்லை

நிலத்தை தொடும்படி உடைய நீண்ட துதிக்கையை உடைய நல்ல பெண் யானையும் அரச அன்னமும் நாணும்படி அழகாக நடைபயிலுகின்ற தாமரைபோன்ற திருவடிகளை உடையவளே! சகலகலாவல்லியே! சொல்லுக்கும் பொருளுக்கும் உயிராக விளங்குகின்ற மெஞ்ஞானவடிவமாக தோன்றி நிற்கின்ற உன்னை நினைத்து உணர்ந்து கொள்ளும் பக்குவம் பெற்றவர்கள் யாரும் இல்லை! (அவ்வாறு உணர்ந்து கொள்வது எளிதான ஒன்றல்ல என்று சுட்டுகிறார் குமரகுருபரர் ) அவ்வாறான பக்குவ ஆற்றலை எளியேனுக்கு அருள்வாயாக!

10) மண்கண்ட வெண்குடைக் கீழாக மேற்பட்ட மன்னரும்என்

பண்கண்ட அளவில் பணியச்செய் வாய்படைப் போன்முதலாம்

விண்கண்ட தெய்வம்பல் கோடிஉண் டேனும் விளம்பில்உன்போல்

கண்கண்ட தெய்வம் உளதோ சகல கலாவல்லியே.

பதம் பிரித்து அமைந்த பாடல்:

மண்கண்ட வெண்குடைக் கீழாக மேற்பட்ட மன்னரும் என்

பண்கண்ட அளவில் பணியச் செய்வாய்! படைப்போன் முதலாம்

விண்கண்ட தெய்வம் பல்கோடி உண்டேனும் விளம்பில் உன்போல்

கண்கண்ட தெய்வம் உளதோ? சகலகலாவல்லியே!

படைப்போன் - படைக்கும் தெய்வம் நான்முகன்

முதலாம் விண்கண்ட தெய்வம் - முதலாக சிறப்புடைய தெய்வங்கள்

பல்கோடி உண்டேனும் - பலகோடி இருந்தாலும்

விளம்பில்- தெளிந்து கூறில்

உன்போல் கண்கண்ட தெய்வம் உளதோ - உன்னைப்போன்று கண்கண்ட தெய்வம் வேறு இல்லை

மண்கண்ட வெண்குடைக் கீழாக- மண்ணுலகம் முழுவதையும் தன் வெண்கொற்றக்குடையின் கீழ்

மேற்பட்ட மன்னரும்- சிறப்புடைய மன்னரும்

பண்கண்ட அளவில் - பாடலைக் கேட்ட மாத்திரத்தில்

பணியச் செய்வாய்- பணிந்து வணங்க அருள்செய்வாயாக!

படைக்கும் தெய்வம் நான்முகன் முதலாக சிறப்புடைய தெய்வங்கள் பலகோடி இருந்தாலும் உன்னைப்போன்று கண்கண்ட தெய்வம் வேறு இல்லை என்று தெளிந்து கூறும்படியாக விளங்குபவளே! சகலகலாவல்லியே!

மண்ணுலகம் முழுவதையும் தன் வெண் கொற்றக்குடையின் கீழ் கொண்டு ஆட்சிசெய்யும் மன்னரும் எளியேனின் இனிய தமிழ்ப் பாடலைக் கேட்ட மாத்திரத்தில் பணிந்து வணங்க அருள்செய்வாயாக!

குறிப்பு:- தமிழ்ப் பெரியசாமி என்னும் அறிஞரின் உரையை எளியேனின் பதவுரையில் பெருமளவில் பயன்படுத்திக் கொண்டேன். அறிஞர் தமிழ்ப் பெரியசாமி அவர்கட்கு நன்றி. இணையத்தில் சகலகலாவல்லி மாலைக்கு பொருள் விளக்கம் பெருமளவில் உண்டெனினும் அவற்றில் பெருமளவு பொருட்பிழைகளும் உண்டு. பொருட்பிழைகள் இல்லாத விளக்கவுரையை இணையத்தில் எளியேனால் காணமுடியவில்லை! எனவேதான் தமிழறிஞர் ஒருவரின் உரையைத் தேடினேன். தமிழ்ப் பெரியசாமி என்னும் நல்லறிஞரின் உரையை கண்டேன். அவருடைய உரையை பெருமளவு பயன்படுத்தியே எளியேன் விளக்கவுரை எழுதியுள்ளேன்.

முறையான பொருளுரையுடன் கூடிய சகலகலாவல்லி மாலை இணையத்தில் இடம்பெற வேண்டும் என்ற அவா எளியேனின் நெஞ்சுள் பெருக்கெடுத்து."சகலகலாவல்லி மாலை-பொருளுரை" ஆகியுள்ளது! இங்கு ஏதேனும் இலக்கணக்குற்றம் இருக்கும் என்றால் எளியேனுக்கு எடுத்தியம்புக. இருந்தால் திருத்த வேண்டியது கடமையல்லவா?

நன்றி

சைவசித்தாந்தம் கற்றதும் பெற்றதும் பாகம்-6

2011-08-31T18:55:00.007+03:00

ஐந்தொழில் தத்துவத்தை விளக்கும் சிவபெருமானின் கூத்தைக் கண்டு விஞ்ஞானிகள் மெய்சிலிர்த்து நிற்கும் அருமையை கடந்த பதிவில் பார்த்தோம். இப்பகுதியில் ஐந்தொழில்களை சுருக்கமாகவும் தெளிவாகவும் பார்ப்போம்.

வழமைபோலவே ஒரு வேண்டுகோள்! முன்னைய பகுதிகளை படித்து தெளிவுபெற்றுக் கொண்டு இப்பதிவை படித்தால் பூரணமான தெளிவு ஏற்பட வாய்ப்புண்டு.

சைவசித்தாந்தம் கற்றதும் பெற்றதும் பாகம் 1

சைவசித்தாந்தம் கற்றதும் பெற்றதும் பாகம் 2

சைவசித்தாந்தம் கற்றதும் பெற்றதும் பாகம் 3

சைவசித்தாந்தம் கற்றதும் பெற்றதும் பாகம் 4

சைவசித்தாந்தம் கற்றதும் பெற்றதும் பாகம் 5

சைவநெறி கூறும் ஐந்தொழில்களாவன படைத்தல், காத்தல், அழித்தல், மறைத்தல்,அருளல் என்பனவாகும். முழுமுதற்கடவுளாகிய சிவபெருமான் தானே இவையனைத்தையும் செய்வதும் உண்டு. பிரம்மா திருமால் உருத்திரனைக் கொண்டு செய்விப்பதும் உண்டு. இவர்கள் தமது புண்ணிய விசேடத்தால் முழுமுதற்பொருளாகிய சிவப்பரம்பொருளிடம் அதிகாரசக்தியை அவருடைய ஏவலால் பெற்று படைத்தல்,காத்தல்,அருளல் ஆகியவற்றை ஆற்றுவர்.

மறைத்தலை மகேசுவரனும் அருளலை சதாசிவனும் ஆற்றுவர்.

இறைவனாகிய சிவப்பரம்பொருள் எந்தவொரு கருவி காரணங்களும் இன்றி நினைத்த மாத்திரத்தில் ஐந்தொழில்களை மேற்கொள்வார்.

வேதமரபுப்படி படைத்தல்,காத்தல்,அழித்தல் ஆகிய மூன்று தொழில்களே பேசப்படும். ஆனால் சிவாகம மரபுப்படி ஐந்தொழில்கள் சொல்லப்படுகின்றன.
காக்கும்போது மறைந்து நிற்றலால் மறைத்தல் காத்தலிலும் உயிர்கள் இளைப்பாறும் பொருட்டு அழித்தல் நடைபெறுவதால் அருளல் அழித்தலிலும் அடங்கும்.

படைத்தல் - உள்ளதைத் தோற்றுவித்தல் (இல்லாததை தோற்றுவித்தல் எனப்பொருள் படமாட்டாது. உதாரணமாக பனிக்கட்டியைத் தோற்றுவித்தனர் என்றால் அங்கு நீர் பனிக்கட்டியாக மாறியுள்ளது என்றுதான் பொருள்படும். அதுபோலவே சூக்குமநிலையில் இருந்ததை(மாயையில் இருந்து) தூலநிலைக்கு கொண்டு வருதலே படைத்தல் எனப்படும்.அதாவது காரணநிலை(சூக்குமநிலை)யில் இருந்து காரியநிலைக்கு(தூலநிலைக்கு) கொண்டு வருதல். மாயையில் இருந்து தனு,கரண,புவன போகங்களைப் படைத்தல்.

காத்தல் - தூலநிலைக்கு கொணர்ந்தவற்றை அந்தநிலையில் தொடர்ந்தும் நிலைபெறச்செய்தல். அதாவது தனு,கரண,புவன போகங்களை உயிர்களின் வினைப்பயனுக்கு ஏற்ப அனுபவிக்கும் வரை நிலை பெறச்செய்தல்

அழித்தல் - தூலநிலையில் இருந்ந்து சூட்சும்ச் நிலைக்கு வருதல், அழித்தல் என்பது முற்றாக இல்லாமல் செய்தல் என்று பொருள் அன்று.
பிறவிச்சுழற்சியால் உயிர்களுக்கு ஏற்படும் களைப்பு நீங்கும் பொருட்டு படைத்தவகைகளை மீளவும் மாயையில் ஒடுக்குதல்.

மறைத்தல் - பற்றுக் கொண்ட உயிர்கள் பக்குவம் பெறுவதற்காக இறைவன் தன்னை மறைத்து உலகத்தையே அவ்வுயிர்கள் காணுமாறு காட்டுதல்.

ஆணவம் காரணமாக இறைவனே உயிர்களுக்கு கன்மம்,மாயை ஆகியவற்றை கூட்டுவித்தான். அதாவது ஆணவ நோய்க்கு மருந்தாக ஏனைய இருமலங்களை கூட்டுவித்தான். மும்மலங்களும் சடப்பொருட்கள். தாமாகத் தொழிற்படாது. இறைவன் அவற்றைத் தொழிற்பட வைத்து அவற்றின் சக்தியை குறைவடையச் செய்கின்றான். சடப்பொருள் தொழிற்பட அதன் சக்தி தேயும் என்பது பௌதீக விஞ்ஞானம்! அதை இங்கு பொருத்தி உணர்க.

அருளல் - பக்குவம் பெற்று தன்னை நோக்கும் உயிர்களுக்கு தன்னைக் காட்டித் தன்னுடைய திருவடியில் சேர்த்தல்.

எனவே படைத்தல், காத்தல்,அழித்தல் என்பன மாயையிலும் மறைத்தல்,அருளல் உயிர்களிடத்திலும் நிகழ்கின்றன.

சிவபெருமான் ஐந்தொழில்களை தனது திருநடனத்தின் வாயிலாக வெளிப்படுத்துகின்றார்.சிவப்பரம்பொருளின் திருநடனத்தை மூன்று வகையாக நோக்கலாம்.
1.ஊன நடனம்
2.ஞான நடனம்
3.ஆனந்த நடனம்

ஊன நடனம்
ஊன நடனத்தினூடாக உயிர்களுக்கு கட்டுண்ட உலகவாழ்வை அளிக்கின்றார். அதாவது உயிர்களுக்கு பிறப்பை வழங்குவது. இவ்நடனத்தின் வழியாக உயிர்கள் உலகச்சிற்றின்பத்தை துய்க்கின்றன. ஊன நடனத்தை குறை கூத்து என்றும் வழங்குவர். குறைவான கால அளவுடைய இன்பங்களை(உலகியல் சிற்றின்பங்கள்) தருவதால் குறைகூத்து என்ப்ர்.

தூல ஐந்தொழில் - உலகத்தை படைத்து காத்து அழித்து மறைத்து அருளுகின்ற ஐந்தொழில்.

சூக்கும ஐந்தொழில் - சர்வ சங்கார காலத்தில் உலகம் முழுவதையும் அழித்த பின்னர் மீண்டும் தோற்றுவிக்க ஆற்றும் ஐந்தொழில்.

அதிசூக்கும ஐந்தொழில் - உயிர்களின் அறிவுக்கு அறிவாய் இருந்து அறிவைத் தோற்றுவித்தல் ஒடுக்குதல் செய்தல். இறைவன் உயிருக்கு உயிராக உள்நின்று உணர்த்துவதனாலேயே உயிருக்கு அறிவு நிகழுகின்றது.

ஞான நடனம்
உயிர்களுக்கு வீட்டைத் தருவது.
ஊன நடனத்தால் உலக இன்பங்களை உயிர்கள் அனுபவிக்கின்றன.படிப்படியாக உலக இன்பம் நிலையற்றது என்பதை உணர்ந்து பக்குவப்பட்டு; சிவபெருமானை அடைய நாடிநிற்கும்போது அவ்வுயிர்களின் மலங்களை நீக்கும்பொருட்டு ஆற்றும் ஐந்தொழில்.

ஞான நடனத்தில் இறைவனின் ஐந்தொழில்கள்
படைத்தல் - மாயையை உதறுதல்
காத்தல் - வல்வினையைச் சுடுதல்
அழித்தல் - மலம் சாய அமுக்கல்
மறைத்தல் - உலகத்தை மறைத்தல்
அருளல் - உயிர்களை ஆனந்த ஒளியில் அழுத்துதல்

ஆனந்த நடனம்
ஞான நடனத்தால் பேரின்பத்தை நுகர தலைப்பட்ட சுத்த ஆன்மாக்கள் தொடர்ந்து பேரின்பத்தை நுகரும் பொருட்டு, அவர்களின் அறிவு இச்சை செயல்களைத் தன்னையே பொருளாகப்பற்றி அழுந்தி இன்பத்தை நுகருமாறு செய்தற்கு ஆற்றும் ஐந்தொழில்.

ஆனந்த நடனத்தில் இறைவனின் ஐந்தொழில்கள்

படைத்தல் - சிவானந்த அனுபவத்தை தோற்றுவித்தல்

காத்தல் - அந்த அனுபவத்தை காத்தல்
அழித்தல் - தற்போதத்தை அழித்தல்
மறைத்தல் - உயிர்,சிவம் இரண்டு என்பதை மறைத்தல்
அருளல் - பேரின்பத்தை அழுந்தி அனுபவித்தல்

சிவபெருமான் ஆடுகின்ற நடனம் ஒன்றுதான். ஆனால் உயிர்களின் பக்குவத்தன்மைக்கு ஏற்ப அது ஊன,ஞான,ஆனந்த நடனமாக அவ்வுயிர்களுக்கு தோன்றுகின்றது.

இறைவனின் ஐந்தொழிலை விளக்கும் இறைவனின் திருக்கூத்துப்பற்றி விரிவாக அறிந்து கொள்வதற்கு தமிழர் கண்ட தாண்டவக்கோன் என்னும் கட்டுரையைப் படிக்க. அடுத்த பகுதியில் அத்துவிதம் என்றால் என்ன? சங்கரரின் அத்துவிதத்தை கேவலாத்துவிதம் என்று ஏன் சொல்வர்? சுத்தாத்துவிதம் என்றால் என்ன? இவற்றை சற்று விளக்கமாகவும் விரிவாகவும் பார்ப்போம்.

சைவசித்தாந்தம் கற்றதும் பெற்றதும் பாகம்7

சைவசித்தாந்தம் கற்றதும் பெற்றதும் பாகம்-5

2011-08-15T22:14:00.008+03:00

பகுத்தறிவுள்ளோர் சைவசித்தாந்திகளா? அன்றி பகுத்தறிவுப்பகலவன் என்று கொளுத்துகின்ற கடும் வெய்யிலிலும் கருப்புச்சட்டை போட்டு விஞ்ஞான அறிவுக்கு முரணாக திரிகின்றவர்களா? விடையை இந்தப்பதிவை முழுமையாகப் படித்தால் பெற்றுக்கொள்ள முடியும்.சரி; நாங்கள் பகுதி ஐந்துக்குள் நுழைவோம். சைவசித்தாந்தத்தை அறிந்து கொள்வோம்.

சிவபெருமான் அருவம்,உருவம்,அருவுருவம் ஆகிய வடிவங்களைக் கடந்தவன் என்றும், அருவம்,உருவம்,அருவுருவம் ஆகிய வடிவங்களை ஏன் பூணுகின்றார் என்றும் கடந்த பகுதியில் பார்த்திருந்தோம். ஐந்தொழில்கள் பற்றி அறிந்து கொள்வதற்கு முன்னர், இறைவனின் வடிவங்கள்பற்றி இன்னும் கொஞ்சம் தெரிந்து கொள்வது நல்லது என்று கருதுகிறேன். பூரணமான தெளிவை ஏற்படுத்த அவை உதவும்.

உருவத்திருவடிவங்கள் மூன்றுவகையாக கருதப்படுகின்றன.

1.போக வடிவம்:
உயிர்களுக்கு உலக இன்பத்தை வழங்கும் பொருட்டு, மணக்கோலம் பூண்டிருப்பது.உயிர்களின் பொருட்டு கல்யாண சுந்தரவடிவம் தாங்கினும் சிவபெருமான் போகம் நுகருபவதில்லை.

உ+ம் - கல்யாண சுந்தர மூர்த்தி வடிவம்

2.யோக வடிவம் - உயிர்களுக்கு ஞானத்தை வழங்கும் பொருட்டு, குருவடிவம் கொண்டிருப்பது.

உ+ம் :- தென்முகக்கடவுள் வடிவம்

3. வேக வடிவம் - இறைவனை நினைத்து வழிபடும் அன்பர்களின் துன்பத்தைப் போக்கும் பொருட்டு வேகம் கொண்டவராக போர்க்கோலம் பூண்டிருப்பது. உயிர்களின் வினையைப் போக்குவதற்கு தாங்கும் வடிவம் இதுவாகும்.
அட்ட வீரட்டச் செயல்கள் ஆற்றியபோது எடுத்த வடிவங்கள் இவற்றுக்கு உதாரணங்களாகும்.காலனை உதைத்தது,சலந்திரனைத் தண்டித்தது,திரிபுரம் எரித்தது என்பன உதாரணங்களாகும்.

உ+ம் - காலசம்கார மூர்த்தி

இறைவன் பூணுகின்ற தாதான்மிய சம்பந்தத்தில் மூவகை வடிவங்களாகிய அருவம்,அருவுருவம்,உருவம் தாங்குதலையும்; உருவவடிவத்தின் மூவகைத்தன்மைகளையும் பார்த்தோம். இனி; தாதான்மிய சம்பந்தத்தினால் இறைவன் ஆற்றும் ஐந்தொழில் பற்றி பார்ப்போம்.

சிவபெருமானின் ஐந்தொழிலை சிவபெருமானின் திருநடனத்தினூடு காண்பது சைவசமயமாகும்.எனவே; இறைவனின் ஐந்தொழில்களை உணர்த்தும் இறைவனின் கூத்தை வெளிநாட்டாரும் அறிஞர்களும் விஞ்ஞானிகளும் கண்டு வியப்படைந்துள்ளர். விஞ்ஞானத்தை விஞ்சிய மெஞ்ஞான திருநடனத்தைக் கண்டு எமது பண்பாட்டுச்சிறப்பை பாராட்டாதோர் எவரும் இலர்.

முதலில்; இறைவனின் ஐந்தொழில் ஆற்றும் கூத்தினைக் கண்டு விஞ்ஞானிகளும் அறிஞர்களும் கூறிய கருத்தைக் காண்போம்.

FRITJOF CAPRA எனும் மேலைத்தேய இயற்பியல் வல்லுனர்; நவீன இயற்பியலையும் நடராசப் பெருமானின் திருநடனத்தையும் அழகாக தொடர்புபடுத்தி "every subatomic particle not only performs an energy dance, but also is an energy dance; a pulsating process of creation and destruction…without end…For the modern physicists, then Shiva's dance is the dance of subatomic matter. As in Hindu mythology, it is a continual dance of creation and destruction involving the whole cosmos; the basis of all existence and of all natural phenomena." என்கிறார்.

பண்டைய கால இந்திய மக்கள் ஆக்கல்,காத்தல்,அழித்தல் அடங்கிய தாண்டவத்தை இறைவடிவாகக் கண்டு சிலைகளாய் வடித்ததாக அமெரிக்க விண்வெளி ஆராய்ச்சியாளர் CARL SAGAN குறிப்பிடுகின்றார்.

பிரபஞ்சம் படைக்கப்பட்டபோது முதற்சில கணங்களில் நடந்த நிகழ்வுகளை ஆராயும் பொருட்டு அமைக்கப்பட்டுள்ள ஜெனிவாவில் உள்ள ஐரோப்பிய அணு இயற்பியல் ஆராய்ச்சிக்கூடத்தின்(EUROPEAN CENTER FOR PARTICLE PHYSICS RESEARCH-CERN) முகப்பில் ஆறு அடி உயரமுள்ள நடராசர் சிலை நிறுவப்பட்டிருக்கின்றது. இது தமிழர் பண்பாட்டுக்கு வழங்கப்பட்டுள்ள மகுடம் என்றால் மிகையில்லை. இச்சிலையடியில் ஆங்கில மொழிபெயர்ப்புடன் கூடிய நடராசரின் சமசுகிரத துதியுடன் "Hundreds of years ago, Indian artists created visual images of dancing Shivas in a beautiful series of bronzes. In our time, physicists have used the most advanced technology to portray the patterns of the cosmic dance. The metaphor of the cosmic dance thus unifies ancient mythology, religious art and modern physics." எனும் CAPRA இன் வசனம் பொறிக்கப்பட்டிருக்கின்றது.

இப்போது சொல்லுங்கள் பகுத்தறிவுள்ளோர் சைவசித்தாந்திகளா? அன்றி கொளுத்துகிற கடும் வெய்யிலும் கருப்புச்சட்டை போட்டு விஞ்ஞான அறிவுக்கு முரணாக திரிகின்றவர்களா?

சரி; அடுத்த பகுதியில் ஐந்தொழில் பற்றி சுருக்கமாகவும் தெளிவாகவும் பார்ப்போம்.

சைவசித்தாந்தம் கற்றதும் பெற்றதும் பாகம் 6

சைவக்காவலர் சிவத்திரு.இ.நமசிவாயம் ஐயா சிவபதம் பெற்றார்!

2011-07-31T08:03:00.000+03:00

திருக்கேதீசுவரத் திருத்தலத்தின் தலைவரும் ஈழத்து சைவக்காவலருமான சிவத்திரு இராசப்பிள்ளை நமசிவாயம் ஐயா 99ம் அகவையில் சனிக்கிழமை காலை கொழும்பில் தனது பூதவுடலை விட்டு நீங்கி சிவபதம் பெற்றார்.

யாழ்ப்பாணம் அச்சுவேலியை பிறப்பிடமாகக் கொண்ட சிவனடியார் நமசிவாயம் ஐயா, 1912ஆம் ஆண்டு சித்திரை மாதம் 11ஆம் நாள் பூவுலகில் இராசப்பிள்ளை, சிதம்பரனாச்சியார் தம்பதிகளுக்கு மகனாக பிறந்தார். ஐயா ஆரம்பக்கல்வியை வடமராச்சியில் உள்ள விக்டோரியா கல்லூரியிலும் உயர்கல்வியை யாழ்.சென்.பற்றிக்ஸ் கல்லூரியிலும் கற்றார். சட்டத்துறையில் தனது மேற்படிப்பை மேற்கொண்டு 1941 இல் சட்டத்தரணியாக பணியாற்ற தொடங்கினார். விஜயலஷ்மி அம்மையாரை திருமணம் செய்தார். இவர்கள் நான்கு பிள்ளைகளுக்கு பெற்றோராயினர்.

ஈழத்தில் மட்டுமற்றி தமிழகத்திலும் சைவப்பணிகள் ஆற்றி 64ஆம் நாயனாராக போற்றத்தக்க பேறைப்பெற்ற ஸ்ரீலஸ்ரீ ஆறுமுகநாலவரால் ஆரம்பிக்கப்பட்ட திருக்கேதீசுவரத் திருப்பணி சைவப்பெரியார் சிவபாதசுந்தரம் அவர்களாலும், சேர். கந்தையா வைத்தியநாதன் அவர்களாலும் தொடரப்பட்டு சிவத்திரு.இ.நமசிவாயம் ஐயாவால் பெரிதும் வளர்த்தெடுக்கப்பட்டது.

பல்வேறு கட்டுரைகளை தமிழிலும் ஆங்கிலத்திலும் எழுதி சைவசமயத்தின் மேன்மைகளை ஊடகங்களூடாக நிலைநாட்டினார். திருநெறிச்சைவ சித்தாந்த வளர்ச்சிக்கு ஈழத்தில் பெரும்பங்காற்றினார். இந்து என்ற சொல்லால் சைவம் என்ற சொல் மழுங்கடிக்கப்படுவதையும்,ஸ்மார்த்த மதம் இந்துமதம் என்ற பெயரில் சைவர்களுக்குள் புகுத்தப்படுகின்றதென்பதையும் சைவமக்களுக்கு உணர்த்தி சைவத்திருநெறிக் காவலராக விளங்கினார். சைவநெறிக்கு முரணான வழிபாடுகளையும் அவ்வழிபாடுகளை நடத்துகின்ற சிவாச்சாரியார் அந்தணர்களையும் கண்டித்தார். எவருக்கும் அஞ்சாது உண்மையை உள்ளபடி உரைத்தார்.சைவத்திருநெறியை பாதுகாக்க தன்னாலான தன்சக்திக்கு மீறிய பணிகளையெல்லாம் ஆற்றினார்.

சிவனடியார் நமசிவாயம் ஐயாவின் பணிகளை நன்குணர்ந்துகொண்ட தமிழக திருவாவடுதுறை ஆதீனம் 2002ஆம் ஆண்டு பொன்னாடை போர்த்தி தங்கமோதிரம் அணிவித்து பொற்கிழி வழங்கி கௌரவித்தமை அனைவருக்கும் மகிழ்வை ஊட்டியது.
ஸ்ரீலஸ்ரீ ஆறுமுகநாவலருக்கு பின்னர் ஈழத்தவர் ஒருவருக்கு திருவாவடுதுறை ஆதீனம் வழங்கிய கௌரவம் என்றால் அது சிவனடியார் சிவத்திரு.இ.நமசிவாயம் அவர்களுக்கே என்பது பொன்னெழுத்துகளால் பொறிக்கப்படவேண்டிய விடயமாகும்.

இராச இராச சோழனுக்கும் நம்பியாண்டார் நம்பிக்கும் திருக்கேதீசுவர ஆலயத்தில் சிலை அமைத்தார். இவர்களுக்கு முதன் சிலை அமைத்த சைவப்பெரியார் சிவத்திரு .இ.நமசிவாயம் அவர்களே என்றால் மிகையில்லை! கல்கி சஞ்சிகையும் இராச இராச சோழனுக்கு சிலை அமைக்கப்பட்டதை தமிழகத்தில் பதிவுசெய்தது.

போர்த்துக்கேயரால் இடித்தழிக்பட்ட தேவார முதலிகளான திருஞானசம்பந்தப்பெருமான்,சுந்தரமூர்த்தி நாயனார்
ஆகியோரால் பாடல்பெற்ற தலமாக விளங்கிய திருக்கேதீசுவர
ஆலயத்துக்கு கட்டிடப்பணி, சிலை உருவாக்கப்பணி,தேர் உருவாக்கப்பணி என்று எண்ணற்ற பணிகளை சிவனடியார் இ.நமசிவாயம் ஐயா மேற்கொண்டிருந்தமையை பாராட்டி திருக்கேதீசுவர ஆலய திருப்பணிச்சபையின் ஆயுட்காலத்தலைவராக மன்றம் தமக்கு நியமித்து ஐயாவை கௌரவப்படுத்தியது. சபையினால் முதன்முதலில் இவ்வாறான கௌரவம் ஐயாவுக்கே வழங்கப்பட்டமை குறிப்பிடப்படவேண்டிய விடயமாகும்.

சிவனடியார் இ.நமசிவாயம் ஐயாவின் இழப்பானது சைவத்தமிழ் உலகிற்கு ஈடுகட்டமுடியாத பேரிழப்பே!
திருக்கைலாயத்திற்கு ஐயாவின் ஆன்மாவை திருநந்திதேவர் அழைத்துச் சென்றிருப்பார் என்பதும் சிவானந்தப்பேறை நிலையாக நுகரும் திருப்பேறு ஐயாவுக்கு வாய்க்கபெற்றது என்பதும் சிவனடியாரின் துணிபு.

ஐயாவின் பூதவுடல் இன்று(ஞாயிற்றுக்கிழமை) 4 மணிக்கு பொரளை மயானத்தில் தகனஞ்செய்யப்படும்.சிவனடியார் நமசிவாயம் ஐயாவின் பூதவுடலை இறுதியாக வணங்க விரும்பும் சைவ ஆர்வலர்கள்,சைவமக்கள்,சிவனடியார் திருக்கூட்டத்தவர்கள் இலக்கம் 2,அடம்ஸ் அவன்யூ,கொழும்பு -04 என்னும் முகவரியிலுள்ள ஐயாவின் இல்லத்திற்கு செல்லுமாறு பணிவோடு வேண்டிக்கொள்கிறேன்.

எல்லாம் திருவருட் சம்மதம்
திருச்சிற்றம்பலம்

சைவசித்தாந்தம் கற்றதும் பெற்றதும் பாகம்-4

2011-06-13T22:04:00.002+03:00

இப்பகுதியில் பௌதீகவிஞ்ஞானத்தின் துணையுடன் சைவசித்தாந்த கருத்து விளக்கப்பட்டுள்ளது. முன்னைய சைவசித்தாந்தம் கற்றதும் பெற்றதும் தொடர்களை படிக்காது; இப்பகுதியை படிக்க முனைய வேண்டாம். ஏனெனில் இப்பகுதியின் அருமையை உணர்ந்துகொள்வதற்கு முன்னைய பகுதிகளில் குறிப்பிடப்பட்ட விடயங்களில் ஓரளவு தெளிவு பெற்றிருத்தல் வேண்டும்.

சைவசித்தாந்தம் கற்றதும் பெற்றதும் பகுதி 1

சைவசித்தாந்தம் கற்றதும் பெற்றதும் பகுதி 2

சைவசித்தாந்தம் கற்றதும் பெற்றதும் பகுதி 3

சொற்பதம் கடந்த சொரூபநிலையில் உள்ள சிவபெருமான் ஆன்மாக்களின் மேற்கொண்ட பெருங்கருணை காரணமாக;

தனது எண்குணங்களில் ஒன்றாகிய பேரருள் உடைமையால்;தடத்தநிலைகளை பூணுகின்றார்.

தடத்தநிலை என்றால் என்ன? குழப்பம் வேண்டாம்! சும்மா இருக்கும் இறைவனின் இயல்புதான் சொரூப இயல்பு என்று முன்னர் பார்த்தோம். அதாவது சிவனே என்று சும்மா இருக்கின்ற நிலை! தடத்தநிலை என்பது இறைவனின் இயங்குநிலை எனலாம்.

தடத்தநிலைகள் மூன்றுவகைப்படும்.அவையாவன;

1.அருவம்,அருவுருவம்,உருவம் என்னும் மூவகை வடிவம் தாங்குதல்

2.ஐந்தொழில் ஆற்றுதல்

3.ஒன்றாய் வேறாய் உடனாய் நிற்றல்

தாய்ப் பன்றியை இழந்த பன்றிக்குட்டிகளுக்கு தாய்ப்பன்றி வடிவெடுத்து பாலூட்டிய பரமனின் பெருங்கருணை, பாலுக்காக அழுத உபமன்யு குழந்தைக்கு பாற்கடலையே வரவைத்து வழங்கிய பெருங்கருணை, குளத்தில் குளிக்கச்சென்ற தந்தையைக் காணாது தவித்த ஞானசம்பந்தக்குழந்தைக்கு ஞானப்பாலை உமையைக் கொண்டு பொற்கிண்ணத்தினால் ஊட்டிவிட்ட பெருங்கருணை, யாவற்றையும் கடந்த அதிசூட்சுமமான சொரூபநிலையையுடைய சிவபெருமான், தடத்தநிலைகளை ஏன் பூணுகின்றார் என்பதை அஞ்ஞானபிடியிலுள்ள நம்மனைவருக்கும் உணர்த்தும் என்பது தெளிவு.

தடத்தநிலைகளின் பொருட்டு; சிவபெருமான் பெருங்கருணையினால் தாதான்மிய சம்பந்தம்,அத்துவித சம்பந்தம் ஆகியவற்றை பூணுகின்றார்.

அது என்ன தாதான்மிய சம்பந்தம்?

தாதான்மிய சம்பந்தம் என்பது; உயிர்களை உய்விக்கும் பொருட்டு மூவகைத் திருவடிவங்களை தாங்கவும்,ஐந்தொழில்களை மேற்கொள்ளவும் சக்தியோடு இறைவன் கொள்ளுகின்ற சம்பந்தம் ஆகும்.

மூவகைத் திருவடிவங்கள் யாவை?
அருவம்,அருவுருவம்,உருவம் என்பவையாகும்.

அருவம் = கண்ணிற்கு புலனாகாது சக்தி வடிவமாக இருந்தே, காரியங்களை செய்வது. இலயசிவன்(நிஷ்கள சிவன்,சத்தர்) என்று அழைக்கபடுவர். சிவபெருமான் ஞானசக்தியுடன் மட்டுமே பொருந்தியிருக்கும் தன்மையால் அருவ வடிவம் தாங்குகின்றார்.

அருவுருவம் = ஞானசக்தியையும் கிரியாசக்தியையும் சம அளவில் கொள்வதன் மூலம் பூணுகின்ற வடிவம். ஒருமுறை புலனாகியும், புலனாகாமலும் இருப்பது இவ்வடிவமாகும். புலனாகும்போது முகம்,கை,கால் போன்ற உறுப்புக்கள் ஏதுமின்றி காட்சியளிப்பது. ஒளி, இலிங்கம் ஆகியன அருவுருவத் திருவடிவங்களாகும்.

உருவம் = ஞானசக்தியைவிட கிரியாசக்தியை மிகுவித்து; அதன்மூலம் கண்களுக்கு புலனாகும்வகையில் முகம்,கை,கால் போன்ற உறுப்புகளுடன் தெளிவாகத் தோன்றுவது உருவத் திருவடிவமாகும். தென்முகக்கடவுள்,சோமஸ்கந்தர்,அர்த்தநாதீசுவரர்,நடராசர் போன்ற மகேசுவர மூர்த்தங்கள் இதற்குள் அடங்கும்.

இறைவன் சக்தியுடன் பொருந்துகின்ற தன்மைகளுக்கு ஏற்ப திருவடிவங்களை தாங்குகின்றமையால் தாதான்மிய சம்பந்தம் ஒருமையுள் இருமை எனப்படும். இறை,சக்தி ஆகியன பொருட்தன்மையில் ஒன்றாயினும்;செயற்பாட்டில் இருதிறப்படுவதால் ஒருமையுள் இருமை என்று தாதான்மிய சம்பந்தத்தை அழைப்பர்.

அதாவது சிவமே சக்தி. சும்மா இருக்கும் நிலையில் சிவன் என்றும் இயங்கும் நிலையில் சக்தி என்றும் இறைவன் அறியப்படுகின்றான். பௌதீகவிஞ்ஞானத்தில் இயக்கசக்தி,அழுத்தசக்தி என்று சக்தி பலவாறு வகைப்படுத்தப்படும்.

உராய்வற்ற இலட்சிய தொகுதியில் பந்தின் நிலையை கீழுள்ள படம் காட்டுகின்றது. இங்கு, சக்தியின் தன்மைக்கு ஏற்ப பொருளின் நிலை வேறுபடுகின்றது. அழுத்தசக்தியாக இருக்கும்போது பொருள் இயங்காது நிற்கின்றது. சாய்தளத்தில் கீழ்நோக்கி உருளுகின்றபோது அழுத்தசக்தி குறைவதுடன் இயக்கசக்தி கூடுகின்றது. கிடையான தளத்தை பந்து அடைந்ததும் பெற்ற வேகத்துடன் பந்து உருண்டபடி இருக்கும். இப்போது இயக்கசக்தி மாத்திரமே உள்ளது. எனவே, சக்தியின் வடிவம்மாற பொருளின் இயல்பும் மாறுகின்றது. இதுபோல்த்தான், சக்தியின் தன்மைக்கு ஏற்ப சிவத்தின் திருவடிவங்கள்(அருவம்,அருவுருவம்,உருவம்) ஏற்படுகின்றன.

தாதான்மிய சம்பந்தத்தின் விளைவால் இறைவன் ஆற்றும் ஐந்தொழில்கள் யாவை? விஞ்ஞானம் எங்கனம் இறைவனின் ஐந்தொழில் தத்துவத்தைக் கண்டு வியந்து நிற்கின்றது?அத்துவித சம்பந்தம் என்றால் என்ன? சைவசித்தாந்தத்தின் அத்துவிதத்துக்கும் சங்கரரின் அத்துவிதத்துக்கும்(கேவலாத்துவிதம்) என்ன் வேறுபாடு? மலர இருக்கின்ற தொடர்களில் ஆராய்வோம்.

சைவசித்தாந்தம் கற்றதும் பெற்றதும் பாகம் 5

சைவசித்தாந்தம் கற்றதும் பெற்றதும் பாகம்- 3

2011-05-20T18:00:00.006+03:00

ஜன்ஸ்டீனை விஞ்சிய சைவசித்தாந்தம் என்று தலைப்பிட்டு, இப்பகுதியை வெளியிடுவோம் என்று நினைத்தேன். பின்னர்; சாதரண மானிடரோடு, தத்துவ ஆய்வைத்தந்த சித்தாந்திகளை ஒப்பிடுவதா? அவர்களின் அரிய முடிந்த முடிவான சிந்தாந்தத்தை ஒப்பிடுவது அழகானதா? இப்படியான எண்ணங்கள் தோன்றியமையால் தவிர்த்துவிட்டேன். சரி; ஜன்ஸ்டீனுக்கு இங்கு என்ன சம்பந்தம்? பார்ப்போம்.

முன்னைய பதிவுகளை படித்தவர்களுக்கு இப்பகுதி இலகுவாக விளங்கும். முன்னைய பகுதிகளை படித்திராவிட்டால்; சிதம்பர சக்கரமாக இப்பகுதி தோன்றிவிடும். எனவே முன்னைய பகுதிகளுக்குரிய சொடுக்கிகளை கீழே தந்துள்ளேன்.

சைவசித்தாந்தம் கற்றதும் பெற்றதும் பகுதி 1

சைவசித்தாந்தம் கற்றதும் பெற்றதும் பகுதி 2

கடந்த பகுதியில் இறைவனின் சொரூபநிலையை/இயற்கை இயல்பைப் பார்த்தோம். இறைவனின் இயற்கை இயல்பே சத்து, சித்து, ஆனந்தம் என்னும் சச்சிதானந்தம் என்று பார்த்தோம். சத்து,சித்து,ஆனந்தம் என்றால் என்ன என்பதையும் பார்த்தோம். இப்பகுதியில் சத்து,சித்து,ஆனந்தத்தை விரித்து எப்படி எண்குணம் உடையவனாக இறைவனை சைவசித்தாந்தம் காணுகின்றது என்பதை பார்க்கவுள்ளோம்.

அதற்கு முதல்; இறைவனின் சொரூப இயல்புக்கும் ஜன்ஸ்டீனின் இறைகோட்ப்பாட்டுக்கும் உள்ள தொடர்ப்பை தெரிந்து கொண்டால் விஞ்ஞானத்தை மிஞ்சிய நெறி சைவநெறி என்பதை உணர்ந்து கொள்ள ஏதுவாக அமையும்.

ஜன்ஸ்டீன் ஆளுமையுள்ள இறைவன் என்பதை ஏற்றுக்கொள்ள முடியாது என்கின்றார்."ஆளுமைத்துவமுடைய இறைவன் இல்லை என நான் உங்களுக்கு நிரூபிக்க முடியாமல் இருக்கலாம். ஆனால் நான் அத்தகைய இறைவனைக் குறித்து பேசுவதாக இருந்தால், என்னைப் பொய்யன் என்றுதான் சொல்லவேண்டும்" என்கிறார்.
சைவசித்தாந்தம் இறைவனின் சொரூப இயல்பை/ இயற்கை இயல்பை அப்படித்தான் காணுகின்றது. ஆனால் ஜன்ஸ்டீனின் கருத்தை கடந்து இன்னும் தெளிவாக இறைவனின் இயற்கை இயல்பை விளக்குகின்றது.

அனைத்து ஆளுமைகளையும் கொண்ட இறைவனின் இயற்கை இயல்பு(சொரூப இயல்பு) எத்தொழிலும் செய்யாது ஆளுமையற்று இருத்தலே என்கின்றது.

சிவன் அருவுருவுமல்லன் சித்தினோடு அசித்தும் அல்லன்
பவமுதல் தொழில்கள் ஒன்றும் பண்ணிடுவானும் அல்லன்
தவமுதலி யோகபோகத் தரிப்பவனும் அல்லன் தானே
இவைபெற இயைந்தும் ஒன்றும் இயைந்திடா இயல்பினானே - சிவஞானசித்தியார்

இப்பாடலையும் அதற்குரிய பொருளையும் கடந்த பகுதியில் பார்த்திருந்தோம். இப்பகுதியில் மீண்டும் ஒருமுறை பார்ப்போம்.

"தனியே சிவபெருமானைப் பற்றிக் கருதினால்; அவர் உருவம்,அருவுருவம்,அருவம் எனும் வடிவங்கள் அற்றவர். அறிவுள்ள பொருட்களாகவும் அறிவற்ற பொருட்களாகவும் உள்ள எந்த உலகப்பொருட்களாகவும் இல்லை. படைப்பு முதலான தொழில்களைத் தானே செய்பவனாகவும் இல்லை. தவம்,யோகம்,போகம் ஆகிய எதனையும் அவர் மேற்கொள்வதில்லை. இவற்றை ஆன்மாக்களுக்கு வழங்குவதன்றி எதையும் அவர் தனக்கு ஏற்பதில்லை. இவை அவரோடு பொருந்தினாலும், இவை எவற்றாலும் அவர் பற்றப்படுவதில்லை" என்பதே சைவசித்தாந்த சாத்திர நூலாகிய சிவஞானசித்தியார் இறைவனின் சொரூப இயல்புக்கு தரும் இலக்கணம்.

ஆக; ஐந்தொழில்கள் பண்ணுகின்ற இயல்பையெல்லாம் கடந்து, "சும்மா" இருக்கின்ற நிலை! "சிவனே என்று சும்மா இருந்த என்னை..........." என்று நாம் பேச்சுவழக்கில் கையாளுக்கின்றோமே.......அதுதான் சைவசித்தாந்தம் கண்ட அருமை! அதனால்த்தான் சித்தாந்தம் என்பதன் பொருள் அனைத்தையும் ஆய்ந்தறிந்து சிந்தித்து ஏற்பட்ட முடிந்த முடிவு என்கின்றோம்.

பிரபஞ்சம் படைக்கப்பட்டபோது முதற்சில கணங்களில் நடந்த நிகழ்வுகளை ஆராயும் பொருட்டு அமைக்கப்பட்டுள்ள ஜெனிவாவில் உள்ள ஐரோப்பிய அணு இயற்பியல் ஆராய்ச்சிக்கூடத்தின்(EUROPEAN CENTER FOR PARTICLE PHYSICS RESEARCH-CERN) முகப்பில் ஆறு அடி உயரமுள்ள நடராசர் சிலை நிறுவப்பட்டிருக்கின்றது.ஏன் என்று தெரியுமா? இறைவனின் ஆனந்த தாண்டவ திருவடிவத்தில் பிரபஞ்சப் படைப்பு தொட்டு, ஒடுக்கம் வரையான அனைத்தும் விளக்கப்பட்டிருக்கும் அருமையை விஞ்ஞானிகள் கண்டு வியந்தமையால் ஆகும்.திருவாசகத்தின் திருவண்டப்பகுதியினைக் கண்டு, விஞ்ஞானம் மலைத்துப்போய் நிற்பது சைவரில் பலருக்குத் தெரியாது. உலகம் உருண்டை வடிவானது என்று கூறியதோடு மட்டுமல்லாது, அண்ட பிரபஞ்சங்களின் காட்சியை அழகாக சொல்லிய அருமையோடு, பிரபஞ்ச ஒடுக்கம் -விரிவையும் தெளிவாக விளக்கியுள்ளார். இவற்றை ஏன் நினைவூட்டுகின்றேன் என்றால், சைவசித்தாந்தம் என்பது தத்துவ ஆராய்வின் முடிவு என்பதை சைவர் யாவரும் உணர்ந்திருக்க வேண்டும் என்பதற்காகவே!

சரி; இனி நாம் இறைவனின் இயற்கைத்தன்மையின்/சொரூப இயல்பின் எண்குணங்களையும் பார்ப்போம்.

தன்வயத்தனாதல் - சுதந்திரம் உடையவனாக இருத்தல். அதாவது பிறர் வயப்பட்டு தொழிற்படாது, அனைத்திலும் சுதந்திரம் உடையவன். இவனது ஆணைவழியே அனைத்தும்.

தூய உடம்புடைமை - உயிரின் இருப்பை எமக்கு அறிய உதவுவது உடம்பு. அதுபோல் இறைவனது இருப்பை அறிந்து கொள்வதற்கு அவனது அருள் உதவுகின்றது. எனவே உவமைகளைக் கடந்த, இப்படிப்பட்டது,இத்தகையது என்ற வர்ணனைகளுக்குள் அடங்காத அருளையே தனது உடலாகக் கொண்டிருப்பவன். அருளே அவனது திருமேனி.

முடிவிலா ஆற்றல் உடையவன் / அளவிலா ஆற்றல் உடையவன் - அறிவித்தாலன்றித் தாமே அறியமாட்டாத உயிர்களையும் அசைவித்தாலன்றி தாமே அசையமாட்டாத பிரபஞ்சங்களையும் ஏககாலத்தில் அறிவித்து, அசைவித்து அனைத்தையும் ஆளுகின்ற ஆற்றல். எச்செயலையும் எக்காலத்திலும் செய்ய வல்லமை உடைவனாக இருத்தல்.

இயல்பாகவே பாசங்களில் இருந்து நீங்கியவன் - இறைவன் இயல்பாகவே ஆணவம்,கன்மம்,மாயை என்னும் பாசத்துக்குள் அகப்படாதவன். ஆணவம்,கன்மம்,மாயை என்னும் பாசம் இறைவனை அணுகும் திறனற்றவை. இறைவனும் இயல்பாகவே அவற்றில் இருந்து விலகி; தூய்மையானவனாக இருப்பவன்.

பேரருள் உடையவன் - பயன் கருதாது அருள் வழங்கும் தன்மையுடையவன். ஆன்மாக்கள் தங்களைப் பிடித்துள்ள ஆணவம்,கன்மம்,மாயை ஆகிய மும்மலங்களாகிய பாசங்களின் நிமித்தம் அறிவு சுருங்கி, பேரின்பத்தை அனுபவிக்கமுடியாது துன்புறுவது கண்டு; அவற்றுக்கு பாசநீக்கம் செய்து பேரின்பம் அனுபவிக்கச் செய்தல் வேண்டும் என்று எழுகின்ற பெரு இரக்கமே இறைவனின் பேரருள். உயிர்களுக்கு பிறவிகள் தந்து, வினைகளைப் போக்கி, ஆன்மாவை மெதுமெதுவாக பக்குவப்படச்செய்து, பாசங்களிலிருந்து நீக்கி விடுவித்து முக்தி வழங்குகின்ற இறைவனின் ஒப்புவமையற்ற பெரு இரக்கம்.

இயற்கை உணர்வினன் - ஆன்மா கருவி கரணங்களின் துணையினால் அறிவிக்க அறிவது.( ஐம்புலன்களின் துணையோடும் ஐம்பொறிகளின் மூலம் அறிந்து கொள்வது) ஆனால் இறைவன் தன்னியல்பால் அறிவுடையவானாக விளங்குதல். அனைத்தையும் இயல்பாகவே தானே அறியும் தன்மை உடையவன்.

முற்றுணர்வினன் - அறிவு இயற்கையாகவே விளங்குவதுடன்; ஏக காலத்தில் அனைத்தையும் உணருகின்ற முற்றறிவு உடையவன்.அதாவது ஒவ்வொரு பொருளையும் ஒவ்வொன்றாக அறியாமல் எல்லாப் பொருள்களையும் ஒரே நேரத்தில் அறிதல்.

வரம்பிலா இன்பம் உடையவன் / அளவிலா ஆனந்தம் உடையன் - பேரின்பம் உடையனாக விளங்குதல். அதாவது யாதொரு குறையும் இல்லாதவன்.

தன்வயத்தனாதல்,தூய உடம்புடைமை,முடிவிலா ஆற்றல் உடைமை,இயல்பாகவே பாசங்களில் இருந்து நீங்கிய தன்மை

ஆகிய நான்கும் இறைவனின் சத்து தன்மைக்குள் அடங்கும்.

முற்றுணர்வு உடைமை, பேரருள் உடைமை, இயற்கை உணர்வுடமை ஆகிய மூன்றும் சித்து தன்மைக்குள் அடங்கும்.

வரம்பிலா இன்பம் உடைமை ஆனந்தத்தன்மைக்குள் அடங்கும்.

எனவே சச்சிதானந்த நிலையாகிய இறைவனின் இயற்கைத்தன்மையை சைவசித்தாந்தம் அழகுற விரித்து தெளிவுபடுத்துகின்றது என்றால் மிகையில்லை!

எம்பெருமான் சிவபெருமான் தனது எண்குணங்களில் ஒன்றாகிய பேரருள் உடைமையால் உயிர்களின் பொருட்டு; தடத்தநிலைகளை பூணுகின்றார்.
அது என்ன தடத்தநிலை? சைவசித்தாந்தம் கற்றதும் பெற்றதும் பகுதி 4 இல் பார்ப்போம்.

சைவசித்தாந்தம் கற்றதும் பெற்றதும் பாகம்- 4

சைவசித்தாந்தம் கற்றதும் பெற்றதும் பாகம்- 2

2011-05-14T11:31:00.004+03:00

இறைவனுக்கு உருவமுண்டு;ஆனால் அந்த இறைவனை யாரும் பார்க்கவில்லை என்பதால் மனிதர் தமது விருப்பத்துக்கு அமைவாக உருவம் வரையக்கூடாது என்கின்றது ஏனைய சமயங்கள். அதே நேரத்தில்; இதுதான் அந்தக்கடவுளின் பெயரென்று ஏதேனும் ஒரு பெயரைத் திட்டவட்டமாக கூறுகின்றன. பெயருள்ள பொருளுக்கு வடிவம் இருக்கும் என்பது வெளிப்படை உண்மை. இதனால் உருவ வழிபாட்டை நிந்திக்கின்ற சமயங்கள்கூட, விஞ்ஞானத்தத்துவ ரீதியில் பூச்சியமாகிவிடுகின்றன. ஆனால் சைவசித்தாந்தம் அருமையான விளக்கத்தை இறைவனுக்கு அளித்து விஞ்ஞானத்தை விஞ்சிய மெய்ஞ்ஞானமாக விளங்குகின்றது.

அப்படியென்ன அருமையான விளக்கத்தை சைவசித்தாந்தம் அளிக்கின்றது?
சிவபெருமானுக்கு சொரூப இயல்பு,தடத்த இயல்பு என்னும் இருவகையான இயல்புகளுண்டு என்கின்றது சைவசித்தாந்தம்.

அதுவென்ன இறைவனின் சொரூப இயல்பு? சரி; இத்தொடரில் சிவபெருமானின் சொரூப இயல்பைப் பார்ப்போம்.
அதற்குமுன்னர் சைவசித்தாந்தம் கற்றதும் பெற்றதும் பகுதி 1ஐ படிக்காதவர்கள் படித்திடுக. ஏனெனில் சைவசித்தாந்தம் பற்றிய அறிமுகத்தை எளிமையாகவும் சுருக்கமான முறையிலும் பெற்றுக்கொள்ள உதவியாக இருக்கும்.

சைவசித்தாந்தம் கற்றதும் பெற்றதும் பாகம்- 1

சைவசித்தாந்தம் இறைவனுக்கு கண்ட அருமையான இலக்கணமே இறைவனின் சொரூப இயல்பு. இறைவனின் சொரூப இயல்பை சிறப்பியல்பு அல்லது இயற்கைத் தன்மை என்றும் அழைப்பர்.

பதியாகிய சிவபெருமான் அருவம்,அருவுருவம்,உருவம் என்னும் முன்றுவகையான தன்மைகளையும் கடந்தவர். உவமைகள் கொண்டு அளக்கப்படக்கூடியவர் அல்லர். யாவற்றுக்கும் அப்பாற்பட்டவர். யாவற்றுக்குள்ளும் இருப்பவர். தூணிலும் இருப்பவர். துரும்பிலும் இருப்பவர். எங்கும் வியாப்பித்து இருப்பவர். எல்லாவற்றையும் கடந்தும் இருப்பவர். இறைவனின் இந்த இயல்பு சொரூப இயல்பு எனப்படும். ஒரு பொருளுக்கு அதன் தன்மையில் இயல்பாக என்றுமுள்ள இயல்பு எனப்பொருள்படும்.

சொரூப இயல்பு என்பது அருவம்,அருவுருவம்,உருவம் என்னும் மூன்று தன்மைகளையும் கடந்த இறைவனின் தன்மையாகும்.அருவம் என்பது உருவத்தின் நுட்பம். கண்ணுக்கு தெரியாத தன்மையை அருவம் என்போம். நுண்ணங்கிகளும் அணுமூலக்கூறுகளும் எமது கண்களுக்கு புலப்படுவதில்லை. எனவே அவற்றுக்கு உருவமில்லை என்று ஆகிவிடுமா? எனவேதான் அருவம் என்பது உருவத்தின் நுட்பம் என்பதை உணர்ந்து, அருவத்தையும் கடந்த நிலையே இறைவனின் சொரூபநிலை என்கின்றது சைவசித்தாந்தம்.

இறைவனின் சொரூப இயல்பை மொழிகளால் பூரணமாக விளங்கிக்கூற முடியாது.சொற்பதம் கடந்த தொல்லோன் என்றும் சொல்பதம் கடந்த அப்பன் என்றும் மாணிக்கவாசகப்பெருமான் இறைவனின் இயல்பை சொற்களுக்குள் அடக்கமுடியாது என்று கூறிவிடுகின்றார். இத்தன்மையே சொரூப இயல்பு என்போம்.

ஒருநாமம் ஒருருவம் ஒன்றும்
இல்லாற்கு - -திருவாசகம்

மூவரும் முப்பத்து மூவரும் மற்று ஒழிந்த தேவரும் காணாச் சிவபெருமான் -திருவாசகம்

பெண் ஆண் அலி எனும் பெற்றியன் - திருவாசகம்

பெண்டிர் ஆண் அலி என்று ஒண்கிலை - திருவாசகம்

இப்படியன் இந்நிறத்தன் இவ்வண்ணத்தன்
இவனிறைவன் என்றெழுதிக் காட்டொ ணாதே - ஆறாம் திருமுறை

சிந்தனைக்கு அரிய சிவமே போற்றி - திருவாசகம்

எவராலும் அறியமுடியாத தன்மையை உடையவர்,ஆண்,பெண்,அலி எனும் பேதங்களைக் கடந்தவர், அருவம்,உருவம்,அருவுருவம் எனும் வடிவங்களைக் கடந்த தன்மையுடையவர், இப்படிப்பட்டவர், இந்த நிறமுடையவர்,இந்த வடிவம் உடையவர் என்று எழுத்தாலோ சொற்களாலோ விபரிக்கமுடியாத தன்மையை உடையவர் என்று இறைவனின் சொரூப இயல்பை திருமுறைகள் தெளிவுபடுத்துகின்றன.

சிந்தனைகளுக்கு அப்பாற்பட்ட தன்மையே இறைவனின் சொரூப இயல்பு என்பதை மாணிக்கவாசகர் "சிந்தனைக்கரிய சிவமே போற்றி" என்று திருவாசகத்தில் உணர்த்துயுள்ளார்.

சிவன் அருவுருவுமல்லன் சித்தினோடு அசித்தும் அல்லன்

பவமுதல் தொழில்கள் ஒன்றும் பண்ணிடுவானும் அல்லன்

தவமுதலி யோகபோகத் தரிப்பவனும் அல்லன் தானே

இவைபெற இயைந்தும் ஒன்றும் இயைந்திடா இயல்பினானே - சிவஞானசித்தியார்

தனியே சிவபெருமானைப் பற்றிக் கருதினால்; அவர் உருவம்,அருவுருவம்,அருவம் எனும் வடிவங்கள் அற்றவர். அறிவுள்ள பொருட்களாகவும் அறிவற்ற பொருட்களாகவும் உள்ள எந்த உலகப்பொருட்களாகவும் இல்லை. படைப்பு முதலான தொழில்களைத் தானே செய்பவனாகவும் இல்லை. தவம்,யோகம்,போகம் ஆகிய எதனையும் அவர் மேற்கொள்வதில்லை. இவற்றை ஆன்மாக்களுக்கு வழங்குவதன்றி எதையும் அவர் தனக்கு ஏற்பதில்லை. இவை அவரோடு பொருந்தினாலும், இவை எவற்றாலும் அவர் பற்றப்படுவதில்லை என்று சிவஞானசித்தியார் இறைவனின் சொரூப இயல்பைத் தெளிவுபடுத்துகின்றது.

இச்சொரூப இயல்பை சச்சிதானந்தம் என்று சொல்வர். சத்தாகியும் சித்தாகியும் ஆனந்தமாகியும் நிற்கின்ற இயல்பு; சத்து+சித்து+ஆனந்தம்= சச்சிதானந்தம் எனப்படும்.

சத்து = என்றும் யாதொரு மாற்றமும் இன்றி நிலைபேறுடையதாய் உள்ள தன்மை.
சித்து = பேரறிவு
ஆனந்தம் = குறைவில்லா நிறையுடைய பேரின்பம்

சத்து,சித்து,ஆனந்தம் ஆகிய மூன்று தன்மைகளையும் விரித்து சிவபெருமானுக்கு எண் குணங்கள் உண்டென்று சைவசித்தாந்தம் அறிவுறுத்துகின்றது.

அதுவென்ன இறைவனின் எண்குணங்கள்? இறைவனின் தடத்தஇயல்பு என்றால் என்ன? சுருக்கமாகவும் தெளிவாகவும் அடுத்த பகுதியில் பார்ப்போம்.

சைவசித்தாந்தம் கற்றதும் பெற்றதும் பாகம்- 3
சைவசித்தாந்தம் கற்றதும் பெற்றதும் பாகம்- 4

சைவசித்தாந்தம்-கற்றதும் பெற்றதும்-பாகம் 1

2011-05-09T21:56:00.004+03:00

சைவசமயம் உள்ளத்தை உள்ளபடி உணர்ந்து பாருக்கு அளித்த அரிய ஞானம் சைவசித்தாந்தமாகும்.

Saivism is the oldest prehistorian religion of South India, essentially existing from pre-Aryan times - Dr.G.U.Pope

The Saiva Philosophy is the choicest product of the Dravidian intellect. It is the most elaborate, influential and undoubtedly the most intrisically valuable of all religions of India. It is peculiarly the South Indian and Tamil Religion. - Dr.G.U. Pope

In real truth, Saiva siddhanta has something to offer which is suited to all minds. its very strength lies in its infinite adaptability to the infinite diversities of human character and human tendencies - Sir Monier William

Saiva Siddhanta attempts to comprehend the universe as a sum total of 36 categories. this exposition is purely a logical account on Scientific principles - Thaos Bernard

இப்படிப்பட்ட சைவசித்தாந்தம் இன்று இந்துமதம் என்னும் பெயரில் சங்கரரின் அத்வைத்தாலும் ஏனைய அந்நிய மதபோதனைகளாலும், அரசியல்-நாத்தீகவாதங்களாலும் மறைக்கப்பட்டு வருகின்றமை தென்னாட்டின் ஊழ்வினையின் விளைவே! தமிழ்நாட்டில் பள்ளிசெல்லும் மாணவர்களுடன் உரையாடியபோதுதான் சைவ நாயன்மார்களையே நான் கலந்துரையாடிவர்களில் எவரும் அறிந்திலர் என்பதை உணர்ந்தேன். ஈழவளநாட்டில் இந்தக்குறை இல்லை! அரசுப பாடசாலைகளிலும் கல்லூரிகளிலும் சைவப்பிள்ளைகளுக்கு சைவசமயத்தை சமயப்பாடமாக கற்பிப்பதால் சைவசமயத்தைப்பற்றிய தெளிவு காணப்படுகின்றது. தமிழகத்தில் இக்குறையைப் போக்க, சைவாதீனங்கள் தமது பணிகளை இன்னும் வீரியமாக்க வேண்டும்.

இன்று பக்தி,சக்தி,ஆன்மீகம், இராமகிருஷ்ண விஜயம் என்று வெளியாகின்ற இதழ்களூடாகவே சமயம் பரப்பப்படுகின்றது. அவையும் சங்கரரின் அத்வைதத்தையே பெரிதும் புகட்டுகின்றது. இதன் தாக்கத்தை இந்துமதம் என்னும் போர்வையில் சுமார்த்த அத்வைதம் போதிக்கபடுவதன் விளைவை, சிவபூமி என்று திருமூலர் சுட்டிய இலங்கையிலும் காணக்கூடியதாகவுள்ளது. எனவே சைவசமயம் பற்றிய தெளிவை ஏற்படுத்தவேண்டியது சைவ சான்றோரின் கடமையாகும்.

இந்துமதம் என்றபதத்தினூடாக இன்று சைவசித்தாந்தம் மழுக்கடிக்கப்படுகின்றதென்பதை சைவர் யாவரும் முதலில் உணரவேண்டும். இரண்டாவது; சைவசித்தாந்தம் பற்றிய தெளிவு சைவர் யாவருக்கும் இருத்தல் வேண்டும்.எனவே; சைவசித்தாந்தம் பற்றிய தெளிவை சைவர் யாவரும் பெறவேண்டும் என்ற நோக்கில் தொடராக 'கற்றதும் பெற்றதும்" என்ற தலைப்பில் தருகின்றேன். அதன் பொருள்; யாம் நூல்களைத் தேடிக் கற்றது. நாடிச் சான்றோரிடமிருந்து பெற்றது.

இத்தொடரில் சைவசித்தாந்தத்தின் முப்பொருள் உண்மையை எளிமையான முறையிலும் சுருக்கமான முறையிலும் தரவிரும்புகிறேன். பயப்படாதீர்கள்.........சின்னத்திரை நாடகங்கள்போல் நீட்சியாக நீளாது இத்தொடர்.

சரி; சைவசித்தாந்தம் பற்றி பார்ப்போம்.

சைவசித்தாந்தத்துக்கு பொதுநூலாக நான்மறையும் சிறப்புநூலாக சிவாகமங்களும் விளங்குகின்றன. சைவசித்தாந்தம் பதினான்கு மெய்கண்ட சாத்திர நூல்களால் விளக்கப்படுகின்றது. இந்நூல்கள் சைவசித்தாந்தத்தின் சாத்திரநூல்கள் எனப்படும். பன்னிரு திருமுறைகள் சைவசித்தாந்தத்தின் தோத்திரநூல்கள் எனப்படும்.

சைவசித்தாந்தம் பதி(இறைவன்),பசு(உயிர்கள்),பாசம் எனும் முப்பொருள் உண்மையை தெளிவாக விளக்குவது சைவசித்தாந்தமாகும். சைவசித்தாந்தம் என்பது வேதாகமங்களின் தெளிவு. சித்தனையின் முடிந்த முடிவு.

வேதாந்தத் தெளிவாம் சைவசித்தாந்தத் திறன் இங்குத் தெரிக்கலுற்றாம் - சிவப்பிரகாசம் (சைவசித்தாந்தநூல்)

பலகலை ஆகம வேதம் யாவையினும் கருத்துப்
பதி பசு பாசம் தெரிதல் - சிவப்பிரகாசம் (சைவசித்தாந்தநூல்)

சைவசித்தாந்தத்தை சிவபெருமான் திருநந்திதேவருக்கு உபதேசித்து அருளினார். திருநந்திதேவரிடம் இருந்து சனற்குமாரர் உபதேசம் பெற்றார். சனற்குமாரரிடம் இருந்து சத்தியஞானதரிசினி உபதேசம் பெற்றார். சத்தியஞானதரிசினியிடம் பரஞ்சோதி முனிவர் உபதேசம் பெற்றார்.

பரஞ்சோதி முனிவர் ஒருமுறை அகத்தியரைக் காண்பதற்காக, ஒளியை விமானமாக்கி வான்வழியாக பொதிகைமலை நோக்கிச் சென்றுகொண்டிருந்தபோது திருவெண்ணெய் நல்லூரில் அவரது விமானம் திடிரென நின்றுவிட்டது. அங்கு சுவேதவனப் பெருமான் என்னும் சிவஞானம் பெருகியிருந்த குழந்தையைக் கண்டார். அக்குழந்தைக்கு மெய்யுணர்வு அருளி மெய்கண்டார் என்று பெயரிட்டார். பரஞ்சோதி முனிவரின் குருநாதராகிய சத்தியஞானதரிசினியின் பெயரையே சுவேதவனப் பெருமானுக்கும் இட்டார். அதாவது சத்தியம் -மெய், ஞானதரிசினி - கண்டார் என்று பொருள்படும்.

மெய்கண்டார் தமது தந்தையாரின் குலகுருவாக விளங்கிய அருள்நந்திசிவாச்சாரியாரை தனது சீடராக; தலை மாணக்கராக ஆட்கொண்டார்.அருணநந்தி சிவாச்சாரியாரிடம் மறைஞான சம்பந்தர் உபதேசம் பெற்றார். மறைஞான சம்பந்தரிடம் உமாபதி சிவாச்சாரியார் உபதேசம் பெற்றார்.

இங்கு திருநந்திதேவர்,சனற்குமாரர்,சத்தியஞானதரிசினி,பரஞ்சோதி முனிவர் ஆகிய நால்வரும் அகச்சந்தானகுரவர் என்று போற்றப்படுவர். மெய்கண்டார்,அருணநந்தி சிவாச்சாரியார், மறைஞானசம்பந்தர், உமாபதி சிவாச்சாரியார் ஆகியோர் புறச்சந்தானகுரவர் எனப்போற்றப்படுவர்.

சைவசித்தாந்த சந்தானகுரவரின் வாழ்க்கையை விரிவாக வேறொரு சந்தர்ப்பத்தில் பார்ப்போம். தற்போது, சைவசித்தாந்தத்தின் முப்பொருள் உண்மையை உணர்ந்து கொள்வதற்கு, சந்தானகுரவர் பற்றிய இத்தரவு போதுமானதாகும்.

சைவசித்தாந்த தொடரில் அடுத்து நாம் பார்க்க இருப்பது பதியாகிய சிவபெருமானின் இயல்புகளைப் பற்றியாகும். சிவபெருமான் உருவம்,அருவுருவம்,அருவம் ஆகிய மூன்றுதன்மைகளையும் கடந்த இயல்புக்குரியவர். அதுவென்ன அருவத்தையும் கடந்த இறைவனின் இயல்பு? கடவுளுக்குச் சொல்லப்பட்ட மிகச்சிறந்த இலக்கணம் சைவசித்தாந்தம் கண்ட இலக்கணமே! அப்படியென்ன இலக்கணத்தை சைவசித்தாந்தம் கண்டது? அடுத்த தொடரில் பார்ப்போம்.

சைவசித்தாந்தம்-கற்றதும் பெற்றதும்-பாகம் 2
சைவசித்தாந்தம்-கற்றதும் பெற்றதும்-பாகம் 3
சைவசித்தாந்தம்-கற்றதும் பெற்றதும்-பாகம் 4

வேத நெறியை புண்படுத்த எண்ணி அவுஸ்ரேலியா பட்ட அவமானம்!

2011-05-07T21:37:00.000+03:00

வேதநெறிக் கடவுள்களின் திருவடிவங்களை நீச்சலுடையில் பொறித்து அதை மங்கைகளுக்கு அணிவித்து நடையழகு காட்சியில் அறிமுகஞ்செய்த அசிங்கமான செயல் அவுஸ்ரேலியாவின் சிட்னி நகரில் கடந்த வியாழக்கிழமை நடைபெற்றுள்ளதென்பதை இணையச்செய்தியூடாக அறியக்கூடியதாக இருந்தது.

ஏனையோரின் சமயத்தை புண்படுத்தி இரசிப்பது சிலருக்கு இனிமையான ஒன்று. அது ஒரு மனநோயின் வடிவம்! இந்த மனநோய் நம்மவருக்கு இல்லாமைக்கு காரணம் பரந்தமனப்பான்மை! இந்த அருமையான சால்பை நமக்கு அளித்த நமது வேதநெறிக்கு நன்றிகூறியே ஆகவேண்டும்.

‘ஏகம் சத் விப்ர பஹூத வதந்தி' - என்கின்றது இருக்கு வேதம். அதாவது ‘உண்மை ஒன்றே, அதை சான்றோர்கள் பலவிதமாக அழைக்கின்றார்கள்" என்கின்றது.

அகளமாய் யாரும் அறிவுஅரிது அப்பொருள்
சகளமாய் வந்து என்று உந்தீபற
தானாகத் தந்தது என்று உந்தீபற
-திருவுந்தியார் சைவசித்தாந்த நூல்

கடவுளாகிய அந்தப் பொருள் உருவமற்றது. யாராலும் அறியமுடியாதது. ஆனால் அன்பால் நாம் நினைத்த வடிவத்தை தனக்கு அமைத்துக்கொண்டு, அந்த வடிவத்தோடு நினைத்தவர் முன்வந்து தோன்றும் என்று திருவுந்தியார் சைவசித்தாந்த நூல் தெளிவுறுத்துகின்றது.

ஒன்றே குலமும் ஒருவனே தேவனும் என்கின்றது திருமந்திரம்.

இவ்வண்ணம் எமது வேதநெறிச் சைவச்சால்பு நன்னெறியில் பாரை வழிநடத்துவதுபோல் உலகிலுள்ள சமயங்கள் யாவும் நன்னெறியில் பாரை இட்டுச்சென்றால் பார் சாந்தமும் சமாதானமும் நிறைந்ததாய் காட்சியளிக்கும்!

ஏனைய சமயத்தவரை பாவிகளாகவும்,சாத்தான்களாகவும் பாவிக்கின்ற கொடூரமான மனநோய்க்குள் வீழ்ந்துவிடாது காத்து அன்பே சிவமென்ற அருமையான தத்துவங்களை கொண்டு ஆன்மீக ஞானத்தை வளர்ப்பதனால்த்தான் உலகத்தில் அகிம்சை என்ற சொல் உயிர்ப்புடன் இருக்கின்றது. அன்பு என்ற சொல் அர்த்தத்தோடு புழக்கத்திலுள்ளது.

நீச்சலுடையில் எமது கடவுள்களின் வடிவங்களைப் பொறித்தமைக்கு உரிய கண்டனங்களை வேத-சைவ உலகம் முன்னெடுக்குமானால் யாவரும் மகிழ்ச்சியடைவர். ஆனால்; காமப் பொப் இசைப்பாடல் இறுவெட்டுகளில் மேற்கத்திய நாடுகளில் பிள்ளையார் சிலை பொறிக்கப்பட்டிருந்தமை, பிரபல நடிகையொருவர் தனது பிறந்தநாள் குதப்பியை (கேக்கை) பிள்ளையார்சிலையாகச் செய்து அதை வெட்டி உண்டு மகிழ்ந்தமை, வீட்டுதளபாடங்களிலும்,கழிவறை உபகரணங்களிலும், செருப்புகளிலும் எமது கடவுள் உருவங்களைப் பொறிக்கின்றமை போன்ற ஏராளமான செயற்பாடுகளை வேத -சைவ உலகம் ஏற்கனவே கண்டு கண்டனங்களை பதிந்தும் எந்தவிதமான உருப்படியான தாக்கத்தையும் நாம் ஏற்படுத்தியிருக்கவில்லை! அதற்கும் நமது சகிப்புணர்வே காரணம்!

எமது கடவுள் வடிவங்களை இவ்வண்ணம் இழிவடையச்செய்யும் நோக்கில் பயன்படுத்துகின்றார்களாயினும் உண்மையில் இழிவடைவது இவர்களும் இவர்கள் வளர்த்த சூழல் காரணிகளுமே!

எனவே; உரியமுறையில் அவுஸ்ரேலிய அரசு அல்லது நிகழ்ச்சி ஏற்பாட்டாளர்கள் மன்னிப்புக்கேட்டு அவுஸ்ரேலியாவுக்கு ஏற்பட்ட அவமானத்தை நீக்குவார்களா? அவுஸ்ரேலியாவின் நலன்விரும்பிகள் கேட்க்கும் கேள்வி இது!

தென்னாடுடைய சிவனே போற்றி
எந்நாட்டவர்க்கும் இறைவா போற்றி

( "ஆபாச காட்சிகள்" தவிர்க்கும் பொருட்டு இணையத்தில் இதுதொடர்பாக உலாவுகின்ற நிழற்படங்கள் தணிக்கைக்கு உட்படுத்தி இங்கு இணைக்கப்பட்டுள்ளது. )

சைவ ஆதீனங்களும் நிறுவனங்களும் பிள்ளையார் சிலை எரிப்பும்

2011-03-19T18:04:00.004+02:00

வணக்கத்துக்குரிய சைவ ஆதீனங்களும் மரியாதைக்குரிய சைவ நிறுவனங்களும் மௌனமாக இருப்பது அழகா?

கடந்த 14ம் திகதி அனுராதபுரத்தில் பிள்ளையார் சிலை இனவெறிக் காடையர்களால் எரிக்கப்பட்டமையை சைவ உலகம் உரியமுறையில் கண்டிக்காமை தமிழ்மக்களை சங்கடத்தில் ஆழ்த்தியுள்ளது. உலகம் முழுதும் பரந்து இயங்கும் சைவ நிறுவனங்களுக்கு இருக்க வேண்டிய பொறுப்பைக் காட்டிலும் தமிழகத்தில் உள்ள சைவ ஆதீனங்களுக்கு பாரிய பொறுப்பு சைவசமூக விடயத்தில் இருப்பதை எளியேன் உரைத்துத்தான் உணர்த்த வேண்டுமா? வணக்கத்துக்குரிய சைவ ஆதீனங்களுக்கு இதுபற்றிய செய்திகள் கிடைக்கவில்லையா?

சைவ ஆதீனங்கள் இந்திய வெளியுறவுத்துறை அமைச்சுக்கு தமது கவலைகளை பதிவுசெய்தால்; இலங்கைத் தூதரகங்களுக்கு இலங்கைச் சைவசமூகம் சார்ந்த தமது ஈடுபாட்டை காட்டினால் சைவ சமூகம் பெருமையடையுமல்லவா? வணக்கத்துக்குரிய ஆதீனங்களின் இலங்கைச் சைவசமூகத்துடனான ஈடுபாட்டை வெளிப்படுத்தினால் இலங்கைச் சைவசமூகம் பாதுகாப்பு உணர்வைப் பெறும் என்பதை வணக்கத்துக்குரிய ஆதீனங்கள் உணர்ந்து கொள்வார்களா?

இலங்கையில் பாரிய போர் நடைபெற்றபோது வணக்கத்துக்குரிய ஆதீனங்களில் சில ஆதீனங்கள் உரிய முறையில் தமது கண்டனங்களை பதிவுசெய்ததுடன் ஆக்கபூர்வமான செயற்பாடுகளையும் முன்னெடுத்து இருந்தனர். ஆயினும் அரசியல் பலமற்ற சைவ ஆதீனங்களால் எதுவுமே சாதிக்க முடியவில்லை என்பது உண்மையே!

அரசியல் பலம் சைவ ஆதீனங்களுக்கு இல்லாமையும் சைவ ஆதீனங்களை இந்து அமைப்புகள் உரியமுறையில் மரியாதை செலுத்தாமையையும் இத்தருணத்தில் உணரக்கூடியதாக இருந்தது. அன்று சங்கரமடம் இதற்கு எதிராக குதித்திருந்தால் நிலமையே வேறு! வடநாட்டு ஊடகங்கள் தொடக்கம் தென்னாட்டு சுமைதாங்கிகள் வரை யாவரும் கொதித்து எழுந்திருப்பர். ஆனால்; இந்த உண்மையை இலங்கையில் சிலர் உணரவில்லை என்பது வருத்தத்துக்குரியதே! அவர்களும் சங்கரமடத்து சுமைதாங்கிகளாக செயற்படுவது அறிவின்மையையே சுட்டுகின்றது.

வணக்கத்துக்குரிய சைவ ஆதீனங்களுக்கு,

போப் பாண்டவரிடம் இருக்கின்ற சர்வதேச அரசியல் பலம் தங்களிடம் இல்லை என்பதையும் சங்கர மடம் போன்ற இந்துத்துவ மடங்களுக்கு இருக்கக்கூடிய இந்திய அரசியல் பலமும் தங்களிடம் இல்லை என்பதையும் சைவசமூகம் ஆதங்க உணர்வுடன் புரிந்து கொள்கின்றது. சைவசமூகம் அரசியல் அநாதைகளாக உள்ளனர் என்பதை துயரத்துடன் விளங்கிக் கொள்கின்றது. ஆனால்; பலமில்லை என்று "சிவனே என்று இருப்பது" பொருத்தமுடைய ஒன்றல்ல! சைவ சமூகம் எங்கு எப்போது பாதிக்கப்பட்டாலும் உரியமுறையில் நடவடிக்கைகள் எடுக்க வணக்கத்துக்குரிய ஆதீனங்கள் முன்வர வேண்டும்.

சைவ நாயன்மார்களின் வரலாறு போதிப்பதும் இதையே! சிவனடியார்களுக்கு பாதுகாப்பில்லை என்றால் சைவ ஆதீனங்கள் மௌனம் சாதிக்கலாமா? சைவ நிறுவனங்கள் பொறுமையுடன் இருக்கலாமா? உலக சைவ பேரவை அமைதி காக்கலாமா? சைவசமூகம் அக்கறையுடன் விடுக்கும் வினாக்கள் இவை!

சைவ மங்கையர் கல்லூரியும் கழகமும் தமிழ்ச்சால்பை எப்போது பெறுவர்?

2011-02-02T11:52:00.001+02:00

"என்னை நன்றாக இறைவன் படைத்தனன் தன்னை நன்றாகத் தமிழ் செய்யுமாறே"
என்ற திருமூலர் நாயனாரால் சிவபூமி என்று சிறப்பிக்கப்பட்ட திருநாடு ஈழவள பொன்னாடாகும். சிவவழிபாட்டை தொன்றுதொட்டு சிறப்பாக பேணிவருகின்ற திருப்பயனால் சிவபூமி என்று ஈழநாட்டை சிறப்பித்தார் நாயனார். அந்தச் சிவனுடன் சம்பந்தமான சைவம் அந்நிய சமயத்தவர்களின் மதமாற்றங்களினாலும் போர்சூழல் ஏற்படுத்திய தாக்கங்களினாலும் மட்டுமல்லாது; சுமார்த்தர் என்கின்ற மதப்பிரிவினரின் ஆதீக்கம் கூடிய இந்துமதம் என்ற பெயரினாலும் இன்று ஈழநாட்டில் மழுங்கடிக்கப்பட்டு வருவது பெருந்துயரை ஏற்படுத்தும் விடயமாகும்.

சுமார்த்தர் என்பவர் ஆதிசங்கரின் வழிவந்தோர். உனக்குள் கடவுள் உள்ளார் என்பதை உணராது நீதான் கடவுள் என்று சொல்லும் சுத்தாத்வைதத்துக்கு முரணான அத்வைதிகள். வர்ணாச்சிரமதர்மத்தை இன்று உள்ளதுபோல் அனுசரிப்போர். நான்காம் வர்ணத்தாராகிய சூத்திரருக்கு வேதமுரைக்க அறுகதை இல்லை என்போர். பிராமணசாதியில் பிறந்தவர்கள் மட்டுமே மடாதிபதிகளாக சமயத்தலைவராக வரமுடியும் என்ற கருத்தை உடைய சங்கரபீடத்தை சார்ந்தோர். தமிழை தீட்டுமொழியாகக் கருதுவோர். ஆதிசங்கரர் நாயன்மார்களைப் போற்றியிருக்க; இவர்களோ அதையும் பொருட்படுத்தாது நாயன்மார்களை புறந்தள்ளி வைக்கும் பழக்கமுடையோர். சிவாகம வழிபாட்டை ஏற்காதோர். வேதங்களையும் சிவாகமங்களை சிவபெருமான் சொன்னதாக ஏற்காதவர்கள். வேதங்கள் தொன்றுதொட்டு இருப்பதாக சொல்வர்.ஆனால் சிவபெருமான் உரைத்தார் என்பதை ஏற்காதவர்கள். இவர்களுக்கு பிரம்மம் தான் கடவுள். இவர்களின் கடவுள் கொள்கைப்படி சிவன்,விஷ்ணு,பிரம்மன் மூவர் மட்டுமல்ல ஆஞ்சநேயர் தொட்டு அருச்சுனன் அடங்கலாக அனைவரும் ஒருவருக்கு ஒருவர் சமமானவர்களே! இவர்கள் தமது சுமார்த்த மதத்தை பரப்புவதற்கு இட்டுக்கதையாக ஆதிசங்கரர் சிவனின் அவதாரம் என்பர். இவர்களுக்கு சைவ தேவாரத் திருமுறைகளாயினும் சரி, வைணவ திவிய பிரபந்தங்களாயினும் சரி அவசியமான புனிதமான ஒன்றல்ல!

சைவநெறி சிவபெருமானை முழுமுதற்கடவுள் என்கின்றது. சிவபெருமானுக்கு ஒப்பாரும் மிக்காரும் இல்லை என்கின்றது.
"ஒப்பு உனக்கு இல்லா ஒருவனே" என்று பாடுகின்ற மாணிக்கவாசகர், "பூமேல் அயனோடு மாலும் புகல் அரிது என்று ஏமாறி நிற்க" என்று முழுமுதற் கடவுளாகிய சிவபெருமானின் திருவருளை போற்றுகின்றார்.

கருவறை வாழ்வு,பிறப்பு,இறப்பு என்பன வினைகளின் பயனாக விளைவது என்பது சைவசமய கொள்கை. எனவே; சிவபெருமான் ஒருதாயின் வயிற்றில் கருவாக இருந்தார்,பிறந்தார்,இறந்தார் என்று சைவசமயம் ஏற்றதே இல்லை. அப்படி கருதுவதையே சிவத்துரோகமாக சிவபாதகச்செயலாக கொள்வது சைவசமயம்.
பிறப்பிலி பிஞ்ஞகன் பேரருளாளன்
இறப்பிலி யாவர்க்கும் இன்பம் அருளும்
துறப்பிலி தன்னைத் தொழுமின் தொழுதால்
மறப்பிலி மாயா விருத்தமு மாமே -திருமந்திரம்

ஆனால்; அப்படிப்பட்ட சிவபெருமானை 'ஆதிசங்கரரின் கொள்கைகளை சைவசமயிகளிடம் கொண்டு செல்லவேண்டும் என்ற நோக்கிலும்; சிவபெருமானை ஏனைய தேவர்களுக்கு சமமானவராக தரவிறக்கம் செய்யவேண்டும் என்ற சூழ்ச்சி நிமித்தமும்" சிவபெருமானின் அவதாரமே ஆதிசங்கரர் என்று விஷமப் பிரச்சாரம் செய்வது சுமார்த்தரின் இழிநிலைக்கு எடுத்துக்காட்டாகும்!

வடமொழியே தெய்வமொழி என்றும் தமிழ் நீசபாசை என்றும் உரைப்பது சுமார்த்தம். ஆனால் சைவசமயம் திருமந்திரத்தினூடாக சிவபெருமான் இருமொழிகளிலும் ஒரேநேரத்தில் சிவாகமங்களை உமைக்கு போதித்தார் என்று தமிழையும் வடமொழியையும் சமமாக பேணுக்கின்ற சால்புடையது.

"தமிழ்ச்சொல் வடசொல் எனும் இவ் விரண்டும்
உணர்த்தும் அவனை உணரலு மாமே"

"ஆரிய முந்தமி ழும் உடனே சொலிக்
காரிகை யார்க்குக் கருணைசெய் தானே"

வடமொழிக்கு எதிரான துவேசத்தையும் சைவம் ஏற்பதில்லை. தமிழுக்கு எதிரான துவேசத்தையும் சைவம் ஏற்பதில்லை.இத்தகு சைவக்கொள்கை சுமார்த்தருக்கு இடைஞ்சலானது!

சைவசமயத்துக்கு வேதம் பொதுநூல். சிவாகமம் சிறப்புநூல். தமிழில் உள்ள பதினான்கு சைவசித்தாந்த நூல்கள் சாத்திர நூல்கள். பன்னிரு திருமுறைகளும் தோத்திரநூல்கள். ஆனால் சுமார்த்தருக்கு இந்த தமிழ்நூல்கள் உப்பில்லாப் பண்டங்கள்! அவர்களுக்கு ஸ்மிருதிகள் மட்டுமே சமய தத்துவநூல்.

சைவப் பிராமணர்களாகிய சிவாச்சாரியார்களை நாவலர் காலத்தில் பதிதர்கள் என்று பழித்தவர்கள் இந்த சுமார்த்தர்கள். சைவ நாயன்மார்களுக்கு குருபூசை செய்வதனால் இவர்களை இவ்வண்ணம் பழித்தனர். அதற்கு நாவலர் சுமார்த்தர்களின் குருநாதராகிய ஆதிசங்கரரே நாயன்மார்களை சௌந்தரியலகரி,சிவானந்தலகரி,சிவபுசங்கம் ஆகியவற்றில் போற்றிப்பாடியுள்ளதை சுட்டிக்காட்டி அவர்களை நாணவைத்து சுமார்த்தர்களின் பழிச்சொல்லில் இருந்து சைவப் பிராமணர்களை காத்தார்.

நாவலர் சுமார்த்தருக்கு தொடுத்த கண்டனம்

ஓ சைவ சமயிகளே, உங்களெதிரே அறுபத்துமூன்று நாயன்மார்களை நிந்திக்கும் ஸ்மார்த்தர்களைக் காணும்தோறும் இந்த ஐந்து வினாக்களைக் கேட்டு,அவர்களைத் தலைகுனிவித்து அவர்கள் வாயை அடக்குங்கள்.அவ்வினாக்கள் இவை.

1. ஓ ஸ்மார்த்தர்களே, உங்கள் மத தாபகரான ஆசாரியர் சங்கராச்சாரியரோ அன்றோ?

2. சௌந்தரியலகரியும் சிவானந்தலகரியும் சிவபுசங்கமும் உங்கள் சங்கராசரியர் செய்த கிரகந்தங்கள் அன்றோ?

3. அறுபத்துமூன்று நாயன்மார்கள்ளுள்ளே திருஞானசம்பந்தமூர்த்தி நாயனாரைச் சௌந்தரியலகரியினும் கண்ணப்பநாயனாரைச் சிவானந்தலகரியினும் இயற்பகை நாயனாரையும் சிறுத்தொண்டநாயனாரையும் சண்டேசுரநாயனாரையும் சிவபுசங்கத்தினும் உங்கள் சங்கராச்சாரியர் துதித்திருக்கின்றாரோ அன்றோ?

4. உங்கள் குருவாகிய சங்கராசாரியராலே துதிக்கப்பட்ட நாயன்மார்களை நீங்கள் நிந்தித்தலினாலே,அச் சங்கராச்சாரியரிடத்திலே அறியாமையையேற்றிக் குருநிந்தர்களானீர்களோ அன்றோ?

5. அறுபத்துமூன்று நாயன்மார்களை வணங்கும் பிராமணர்கள் பதிதர்களாவரெனச் சொல்லும் நீங்கள் அவர்களைத் துதிக்கும் சங்கராசாரியரைப் பதிதரெனச் சொல்லாம் சொல்லி அவரை நீங்கள் வணங்குதலாற் பதிதரிற் பதிதர்களாயினீர்களோ அன்றோ?

இந்துமதம் என்ற சொல்லாடல் சைவசமய பண்பாட்டை சிதைக்கும் விதம்!!!!

இன்று இந்து சமயம் என்னும் பெயரால் சுமார்த்தமதம் இலங்கையில் வெகுவாக மக்கள்மத்தியில் ஊட்டப்பட்டு வருகின்றது. திருநீறு பூசியுள்ள யாவரையும் சிவனடியாராக சைவராக கருதுகின்ற ஏனாதிநாத நாயனாரைப் போன்ற சைவமக்கள், இந்துமதம் என்ற போர்வையில் இருக்கின்ற சுமார்த்தரை சுமார்த்தர் என்று அறியாது சைவர் என்றே கருதி; அவர்களுடைய சமயவழிகாட்டலை சிரமேற்கொண்டு கொண்டு; அச்சுமார்த்தர்களையே சைவசமயத்துக்கு தலைமைதாங்கச் செய்கின்ற அசிங்கங்களும் சிவபூமியில் சைவமக்களிடையே தற்சமயம் ஏற்பட்டவண்ணம் உள்ளன.

சைவ குருமார் பீடம் என்று ஏற்கனவே இலங்கையில் இருக்க; சர்வதேச இந்து குருமார் பீடம் என்று ஒன்று மலர்ந்துள்ளதே! ஏன் இந்த "சர்வதேச இந்து" என்ற பெயரென சைவர்கள் நினைத்தார்களா? சர்வதேசம் என்றால் உலகம் முழுக்கவுள்ள இந்து குருமார்களுக்கு இவர்களா தலைவர்கள்? அப்படியானால் தமிழகத்தில் வைணவ பிராமணர்கள் இவர்கள் சொல்லைக் கேட்பார்களா? ஏன் தமிழகத்தில் உள்ள சுமார்த்த பார்ப்பனர்கள் இவர்களுக்கு கட்டுப்படுவார்களா? இந்திய வடநாட்டுக்கு இப்படி ஒரு அமைப்பு இலங்கையில் உண்டென்று தெரியுமா? யாருக்கு பூச்சாண்டி காட்டுகின்றார்கள் பெயர் வைத்து? தமிழர் கிணற்றுக்குள் இருப்பதுபோல் கருதி இப்படியொரு "நொண்டி" பெயரை வைத்து ஏற்னவே இயங்கும் சைவ குருமார் பீடத்துக்கு மேலானவர்கள் தாம் என்பதை தம்பட்டம் செய்யும் இழிநிலை இவர்களுக்கு ஏன் வந்தது? சைவம் என்ற பெயர் இவர்களுக்கு பிடிக்காமல் போனது ஏன்? எல்லாம் சுமார்த்தம் செய்யும் கோலம்! சங்கரமட பணபேய் ஆட்டும் ஆட்டம்!!!!

இதுவரை காலமும் அரசு வெளியீடுகளாக வெளிவருகின்ற சைவசமய பாடத்திட்ட நூல்களில் இந்து என்கின்ற சொல்லாடல் இருந்ததேயில்லை என்றநிலைபோய், சைவநெறி பாடத்திட்ட நூல்களில் இந்துமதம் என்ற சொல்லாடல் இம்முறை வெளியாகி நடைமுறையில் உள்ள பாடத்திட்டத்துள் வலுப்பெற்று காணப்படுகின்றது சுமார்த்தரின் கை ஓங்கியுள்ளதை தெளிவாக்குகின்றது. இச்சைவநெறி பாடத்திட்டத்துள் வைணவசமய தமிழ்த் தோத்திரமாகிய "நாலாயிர திவ்ய பிரபந்தம்" தனிப்பாடமாக அறிமுகப்படுத்தப்பட்டிருப்பதும் இதன்தாக்கம் என்றே தெளிவுற கூறலாம். நாலாயிரம் திவிய பிரபந்தங்களை தமிழ் மாணவர்களுக்கு அறிமுகஞ் செய்யவேண்டியது கடமையே! அதை தமிழ்மொழி நூலில், தமிழ் இலக்கிய நூலில் வழமையில் உள்ளதுபோல் ஏனைய சமய இலக்கிய நூல்களுடன்(சீறாப்புராணம்,இரட்சணீக யாத்திரிகம்) இணைத்து அறிமுகப்படுத்துவதே முறை!

புறச்சமயமாக சைவசித்தாந்தத்தால் வகுக்கப்பட்ட வைணவசமய இலக்கியத்தை சைவசமய நூலில் அறிமுகப்படுத்துவது சைவசித்தாந்தத்தை உதாசீனம் செய்வதற்கு ஒப்பாகும். அதேநேரத்தில் திவிய பிரபந்தங்களை அறிமுகஞ் செய்ய வேண்டியதும் தமிழர் என்ற அடிப்படையில் சைவருக்கு உரிய கடமையாவதால் தமிழ்மொழி நூல் பாடத்திட்டத்தில் அப்பாடத்தை இணைப்பதுவே முறை.

தற்போது செய்திருக்கும் சாம்பார் போன்ற கலப்படங்களால்; சைவ மாணவர்களுக்கு எது சைவநூல் எது வைணவநூல் என்ற அறிவே இல்லாமல் போகச்செய்கின்ற சூட்சுமம் இருப்பதை சைவர்கள் உணரவேண்டும். இன்று நாலாயிரம் பிரபந்தம். நாளை ஆதிசங்கரரின் வரலாறு. பின்னர் சங்கரமட நூலாகிய தெய்வத்தின் குரல்! இப்படித்தான் மெதுவாக தமது காரியத்தை நகர்த்துவர் சுமார்த்தர் என்ற அறிவை சைவர் பெறவேண்டும்! ஏறத்தாழ பல்லாண்டுகளாக அரசுக்கு சமயபாடத்திட்ட நூல் அச்சிடுவதற்கு நிதியுதவியும் அறிவு உதவியும் செய்துவந்த சுமார்த்த நிறுவனங்களாகிய இந்து நிறுவனங்கள் இப்போது; சுமார்த்த கொள்கையாகிய கலப்படச்சமயத்தை பாடத்திட்டத்தை மெதுவாக சைவநெறி என்ற பெயரில் நுழைத்துள்ளனர். இனி அடுத்த சில ஆண்டுகளின் தமது இலக்கை அடைந்தாலும் ஆச்சரியப்படுவதற்கில்லை!!!!

கௌமாரம்,காணபத்தியம்,சௌரம் என்ற மதப்பிரிவுகள் இருந்ததாக சைவநெறி எங்குமே அறிந்திருக்காதபோது; சைவநெறி சொல்லுகின்ற ஆறுசமயப் பிரிவுகளின் அறிவை மறைத்து "சைவம்,வைணவம்,சாக்தம்,கௌமாரம்,காணபத்தியம்,சௌரம்" என்று ஆதிசங்கரரின் புதிய ஆறுமதப் பிரிவுகளை பழைய சைவசமயப் பாடத்திட்டத்தில் சுமார்த்தர் புகுத்தியிருந்தமையும் இப்படியான இழிநிலை ஏற்படுவதற்கு அறிகுறியாக சுட்டிக்காட்டப்பட்டிருந்தது.
கொழும்பு இராமகிருஷ்ண மடத்தலைவர் சைவசமய நூலுக்கு ஆலோசகராக விளங்குகின்றமையை என்னென்று சொல்வது? சுவாமி இராமகிருஷ்ணர் ஒரு வேதாந்தி. சுவாமி விவேகானந்தர் ஒரு வேதாந்தி. இவர்களைப்பற்றி சைவசமய நூல் பாடத்திட்டத்தில் இணைத்து இருந்தபோதே நாளை கிருஷ்தவ அமைப்பு ஏதேனும் நிதியுதவி செய்தால் யேசுநாதரைப் பற்றியும் சைவசமயப் நூலில் பிரசுரிக்கத் தயங்கமாட்டார்கள் என்று சைவமக்கள் உணர்வு பெற்றிருக்க வேண்டும்.

நாளை, நாவலர் பெருமானுடன் வாதிட்டு; தோல்வி கண்டவரும் சைவசித்தாந்த நெறிக்கு முரணாக சன்மார்க்க சமரச சமயத்தை நிறுவியவருமான வள்ளாலரைப் பற்றியும் சைவநூலில் இணைத்தால் ஆச்சரியப்படுவதற்கில்லை!!!!

சைவ சித்தாந்திகள் இலங்கையில் இல்லையா? அல்லது அவர்களை இந்து மாமன்றம் போன்றவை மதிப்பதில்லையா? சமயப் பாடத்திட்டம் வகுத்தவர்களில் சைவப் புலவர்களை காண முடியவில்லையே? அதுதான் பெருங்குறை!!! அல்லது வேண்டுமென்றே நடக்கும் சதியா?

ஆனால் ஒன்று தெளிவு! சுமார்த்தர் விரும்பியதுபோல் இந்துமதம் என்ற பெயரை பல இடங்களில் தாங்கிய வண்ணம் சைவசமய பாடத்திட்டங்கள் அமைக்கப்பட்டதும் வெளியான புத்தங்கள் யாவற்றில் ஒரு பக்கத்துக்கு ஒரு எழுத்தேனும் என்ற வீதத்தில் தமிழ்கொலை அரங்கேறியுள்ளது!!!! அபசகுணம் பார்த்தீர்களா?

தமிழரிடம் தனித்துவமான சமயப் பண்பாடு இருப்பதை பொறுத்துக் கொள்ளமுடியாத விசமிகள், இன்று இந்துமதம் என்ற பெயரில் சுமார்த்தத்தையே பரப்புகின்றனர். நீயும் கடவுள், நானும் கடவுள் என்ற உதவாத கொள்கையை சைவசமயத்துக்கு முரணான கொள்கையை இந்துமதக் கொள்கையாக போதிக்கின்றனர். இதனால்த்தான் போலிச்சாமியார்கள் உருவாகி பெருகி ஈற்றில் வேதநெறிக்கே அவமானத்தை ஏற்படுத்துகின்றனர்.

பதி,பசு,பாசம் என்கின்ற முப்பொருள் உண்மையை போதிப்பது சைவநெறி. ஆனால் நான் கடவுள் என்று பிழையான பொருளில் அத்வைதத்தை போதிப்பது சுமார்த்தம். இந்துமதம் என்ற பெயர் இந்தியத்தேசியத்துக்கு உதவுமே ஒழிய தமிழ்ச்சால்புக்கு உதவமாட்டாது. தமிழரை ஈற்றில் தனித்துவப் பண்பாடற்ற இனமாக மாற்றவே வழிவகுக்கும்.
வைணவ ஆதீனங்களும் சரி., ஆலயங்களும் சரி இந்தச் சுமார்த்தரை நுழையவே விடுவதில்லை. ஆனால் சைவசமயத்தவர்கள் அறியாமையில் சைவசமயத்தை இந்தச்சுமார்த்தரிடம் இந்துமதம் என்ற பெயரில் அடகுவைத்தவண்னம் உள்ளனர்.

இந்துமதம் என்ற சொல்த்தான் இன்று சுமார்த்த ஊடுருவலுக்கு ஏதுவாகியுள்ளது. இந்த இந்துமதம் என்ற சொல்; தமிழருக்கு ஏற்புடைய சொல்லா? சைவசமயத்தவர்கள் தாங்கக்கூடிய சொல்லா?

இல்லவே இல்லை!!!!!

ஹிந்துவும் சைவநெறியும்

இந்துமதம் என்பது ஹிந்து என்பதன் தமிழ்வழிப்படுத்திய சொல்லாடல். அதாவது ஹிந்து என்ற பெயரை எழுதும்போதுகூட தமிழ்ச்சொற்களின் துணைகொண்டு எழுதமுடியாத ஒருசொல்!!!!

இது பெர்ஷியன்(பாரசீக மொழி) மொழிச்சொல்! சிந்துவெளிக்கு அப்பால் இருந்த மக்களை தமது மொழியில் திருடர் எனப் பொருட்பட அமைத்து அழைத்த சொல்தான் ஹிந்து !

ஆக; இந்தச்சொல் அமங்கலமான பொருளுடையது! மங்கலமான சைவத்துக்கு தலைமை ஏற்கவந்துள்ளது எவ்வளவு வெட்கக்கேடானது பாருங்கள்?

இந்து மதத்தை ஒர் தனித்துவமான மதமாக கருத முடியாது எனவும், பௌத்தம் மற்றும் வைதீக மதத்தின் கலவையே இந்து மதம் எனவும் ,ஏனைய மதங்களைப் போன்று இந்து மதத்திற்கு நீண்ட வரலாறு இல்லை எனவும் இந்து மதத்தை ஓர் கஞ்சியாகவே கருத வேண்டும்" என்று ஜாதிக ஹெல உறுமயவின் பாராளுமன்ற உறுப்பினர் அதுரலியே ரதன தேரர் தமிழர்களை எள்ளி நகையாட வழிவகுத்தது இந்த ஹிந்து என்ற சொல்!

ஈ.வெ.ராமசாமி,மு.கருணாநிதி,வீரமணி போன்ற ஞானக்குறைவுள்ள நாத்தீகவாதிகள் எமது சமயத்தின் தொன்மையையும் தனித்துவத்தையும் ஏளனஞ் செய்ய வழிவகுத்த சொல் இந்த ஹிந்து என்ற சொல்!

"சிவனெனும் ஓசை அல்ல தறையோ உலகில் திருநின்ற செம்மை உனதே" என்றார் நாவுக்கு அரசராகிய திருநாவுக்கரசர் நாயனார். சிவனெனும் ஓசைக்கு அல்லாது வேறு எவற்றுக்கும் செம்மையில்லை.சபதம் பிடிக்கவா? என்கிறார். 'சைவம் சிவனுடன் சம்பந்தமாவது" என்கிறது திருமந்திரம். சைவம் என்பது சிவனெனும் ஓசையுடையது. இந்துவுக்கு எந்த மண்ணாங்கட்டியும் கிடையாது.

சைவப் பெரியார் க.சிவபாதசுந்தரம் ஐயா பேராதனைப் பல்கலைக்கழகத்திற்கு மடல் வரைந்து "இந்து எம்மொழிச் சொல்?" என வினாவி என்ன அர்த்தத்தில் வழங்குகிறது என ஆய்வித்து அந்நியச்சொல் என்பதையும் அதன் அர்த்தம்(திருடர்) அமங்கலமானது என்பதையும் அறிந்து 1956களில் யாழ்ப்பாணத்தில் இருந்த இந்து வாலிபர் சங்கத்தை சைவ வாலிபர் சங்கமாக பெயர் மாற்றம் செய்தமை அறிந்த ஒன்றே!

1906இல் அமெரிக்காவுக்கு அழைக்கப்பட்டிருந்த சேர்.பொன்.இராமநாதனை கப்பலில் சந்தித்த அமெரிக்கர் ஒருவர் "ஐயா நீங்கள் இந்துவா?" எனக் கேட்டபோது சிரித்துவிட்டு நாங்கள் சிவபெருமானை வழிபடுபவர்கள்.அக்கருத்தில் நாங்கள் சைவர்கள்.விபரம் அறியாத வெளிநாட்டவர்கள் எங்களை இந்துக்கள் என்கிறார்கள் அதற்காக நாங்கள் அப்பெயருக்கு உரியவர் ஆகமாட்டோம்" என்றார். "Eastern pictures to Western Students" எனும் நூலில் இன்றும் காணக்கிடைக்கும் செய்தியிது. அன்று விபரம் அறியாதவர்களாக சேர்.பொன்.இராமநாதன் சுட்டுவது வெளிநாட்டவர்களை! இன்று விபரம் அறியாதவர்கள் என்றால் நாங்கள் தானே? வெளிநாட்டவரா என்ன?

அமெரிக்காவில் பெருவெற்றியீட்டி 1987இல் இலங்கை வந்த சுவாமி விவேகானந்தர் "இந்து என்ற பெயர்க்குப் பதில் சைவன் எனக் கூறவேண்டும்" என்றார். சுவாமிக்கு உவகையளிக்கும் என எண்ணி இந்துமதம்....இந்து....என்று பேச்சாளர்கள் பேசியபோதே சுவாமி இவ்வண்ணம் தெரிவித்தார். திருமூல நாயனாரால் சிவபூமி என திருமந்திரத்தில் சிறப்பிக்கப்பட்ட இலங்கையில் சைவம் என்னும் அழகுபொதிந்த அர்த்தம் நிறைந்த சொல்லாடல் சிதையக்கூடாது என அவர் எண்ணினார் போலும். சுவாமிக்கு உவப்பாக இருக்கும் என எண்ணி சுவாமியை வரவேற்றுப் பேசியபோது , "We, the inhabitants of Jaffna professing the Hindu religion, desire to offer our most hearty welcome to our land, the chief centre of Hinduism in Ceylon" என்றெல்லாம் இந்துவைப் போற்றித் துதிபாடினர் எம் சில ஆங்கிலம் மெத்தப்படித்த பண்டிதர்கள். சுவாமி விவேகானந்தர் அவர்கட்கு பதிலளித்துப் பேசும்போது "The word Hindu has lost its meaning, for this word merely meant those who lived on the other side of river Indus.This name was altered by ancient Persians, and all people living on the other side of the river Sindhu were called by them as Hindus... I, therefore, would not use the word Hindu" என்று எம்மவர்களில் அறீவினத்தை சுட்டிக்காட்டினார். சுவாமி விவேகானந்தர் இவ்வண்ணம் சுட்டிக்காட்டியதை Lectures from Colombo to Almora, Advaita Ashram, Delhi, 1995 . 14th edition இல் காணலாம்.(இதனை உலக சைவப் பேரவையின் இணையத்தளப் பிரசுரத்தில் சித்தாந்தரத்தினம் கணேசலிங்கம் ஐயா சுட்டிக்காட்டியுள்ளார். ஐயாவுக்கு நன்றிகள்).

சைவ சமயமே சமயம் எனறார் தாயுமான சுவாமிகள். மேன்மைகொள் சைவநீதி என்றார் கச்சியப்ப சிவாச்சாரியார். சைவ சமயமாம் சமயஞ் சாரும் ஊழ்பெறல் அரிது என்றார் அருணந்தி சிவாச்சாரியார். சைவத்திற் மேற்சமயம் வேறில்லை என்றார் சைவ எல்லப்ப நாவலர். எங்கள் சமயம் சைவம் என்பதில் என்ன கூச்சம்? இந்து என்பதில் எனன பெருமை உண்டு? இந்து எனப்து தமிழரின் சிறுமை. திருகோணமலை என்ற அழகான பெயரை டிரிங்கோமல என்பது அழகாகுமா?

இந்துமதம் என்றசொல் நான்கு வேதத்திலும் இல்லை. இருபத்தெட்டு சிவாகமங்களிலும் இல்லை. சம்பந்தரின் முதலாம் திருமுறை தொட்டு பெரியபுராணம் வரையான பன்னிரு திருமுறைகளிலும் இல்லை. சாத்திரநூல்களாகிய பதினான்கு மெய்கண்ட சாத்திரங்களிலும் இல்லை. பிறகு நமக்கு ஏன் இந்த அமங்கலமான இந்து என்ற சொல் தேவை? சைவர்களே சிந்தியுங்கள்!

அத்வைதம்,துவைதம்,விஷ்ட்டாத்வைதம் என்று இந்துமதக் கோட்பாடுகளாக பாரதம் முழுவதும் பேசப்படுகின்றது. சைவ சித்தாந்தம் என்ற ஒன்று தமிழகத்துக்குள்ளேயே இருட்டடிப்பு செய்யப்படுகின்றது! ஏன்? தமிழில் இந்த இறை கோட்பாடு இருப்பதால்த்தானே ஒழிய வேறொன்று இல்லை!!!

சுமார்த்தர்களுக்கு இந்தச்சொல் இனிப்பதற்கு காரணம் "சைவத்தை மெதுவாக மறைத்து தமது அத்வைதத்துக்கு தவறான புரிதலைக் கொண்ட நான் கடவுள் சமாச்சாரத்தை தமிழருக்கு புகுத்தி; தமிழரின் தனித்துவ தேசிய அடையாளங்களை மறைத்து இந்துத்தேசியத்தை பாரதமெங்கும் வளர்க்க" இந்த இந்துமதம் உதவுகின்றமையால்தான்!

அன்புக்குரிய சைவ சமயத்தவர்களே,

சைவ நாயன்மார்களுக்கு பூசை செய்கின்ற சைவப் பிராமணர்களை பதிதர்கள் என்று இழிந்துரைத்த சுமார்த்தரின் செயல் நியாயம் என்றால்,

தமிழ்நீச மொழி என்பதை ஏற்கும் திடமிருந்தால்,

சாதி வேறுபாடுகளை அனுசரிக்க உடன்பாடிருந்தால்,

தேவாரம்,திருவாசகம்,திருமந்திரம் உட்பட்ட திருமுறைகளும் தமிழில் உள்ள மெய்கண்ட சாத்திரங்களும் அழிந்துபோவதில் உடன்பாடிருந்தால்,

தனக்குவமை இல்லாத சிவபெருமானை சிறுதெய்வ தேவனாக பதவியிறக்கம் செய்யவிரும்பினால்,

தமிழர் சால்பை தொலைக்க உடன்பட்டால்,

சுமார்த்தம் சைவசமயத்தவருள் ஊடுருவுவதை அனுமதிக்க!!!

இல்லையேல்.......
சைவசமயத்தைக் காக்க;ஆவண செய்க!

சுமார்த்த ஊடுருவலைத் தவிர்க்க என்ன செய்ய வேண்டும்?

இந்துமதம் என்பது கூட்டுச்சரக்கு; சைவசமயம் என்பது எமது சமயம் என்பதை முதலில் தெளிவுபடுத்த வேண்டும்! அதற்கு இடைஞ்சலாக இருப்பது இந்து என்ற சொல் பல்கிப் பெருகி கொழுத்து இருப்பதே! இலங்கையில் இந்து சாதனம்,இந்துக் கல்லூரி என்று முளைவிட்டபோது அவை தனிச்சைவ சமயத்தையே பிரதிநிதித்துவப்படுத்தின. ஆனால் இன்று சுமார்த்தருக்கு சைவருக்குள் ஊடுருவி சைவசமயத்தை சிதைக்கு ஊடகமாகிவிட்டன!!! எனவே இந்து என்ற பெயரில் இயங்கும் நிறுவனங்கள்,கல்விக்கூடங்கள் தம்மை சைவ கல்லூரிகளாகவும் சைவ நிறுவனங்களாகவும் பெயர்மாற்றம் செய்ய வேண்டும். சைவப்பெரியார் சிவபாதசுந்தரனாரை போற்றுவோர் காலம் தாமதிக்காது சைவக்கடமையாகக் கருதி இப்பணியை முன்னெடுக்க வேண்டும்.

சேர்.பொன்.இராமநாதன் இந்துக்கள் நாமல்ல;சைவர்களே நாம் என்று வெளிநாட்டவர்க்கு எடுத்துரைத்திருக்க; இராமநாதன் இந்து மகளீர் கல்லூரி என்ற பெயரில் கொழும்பில் பம்பலப்பிட்டியில் சைவக்கல்லூரி இருப்பது இராமநாதனை நாணச் செய்யாதா? எனவே; சேர்.பொன்.இராமநாதனை மரியாதை செய்ய விரும்பின்; கல்லூரி நிர்வாகம் உடனடியாக ஏனைய கல்லூரிகளுக்கு முன்மாதிரியாக பெயர் மாற்றம் செய்ய வேண்டிய கடமையைப் பெற்றிருக்கின்றது! செய்வார்களா? அல்லது இராமநாதனை நாணத்தில் வாட்டுவார்களா? கல்லூரி நிர்வாகம் முடிவு செய்யட்டும்!

அகில இலங்கை இந்து மாமன்றம் தனது பெயரை நாவலரையும்,சைவப் பெரியார் சிவபாதசுந்தரனாரையும் சேர்.பொன்.இராமநாதனையும் மதித்து; இலங்கை வந்த சுவாமி விவேகானந்தர் சொன்னதற்கு ஏற்ப; இந்து என்ற பெயரை சைவம் என்று மாற்றி அகில இலங்கை சைவ மாமன்றம் ஆகுவார்களா? இல்லை இத்தகு பெரியவர்கள் நால்வரையும் தொடர்ந்து அவமானப்படுத்துவார்களா? இந்து ஒளி என்றால் திருடர் ஒளி என்றுதான் பொருள் என்பதை மாமன்றம் உணருமா? நாவலருக்கு அவமானத்தை ஏற்படுத்திவிட்டு நாலவருக்கு குருபூசை செய்வதில் அர்த்தமில்லை! மாமன்றம் இதை உணருமா? மாமன்றத்தை நேசிக்கும் சைவர்களை சுமார்த்தரிடம் அடகுவைக்க மாமன்றம் விரும்பினால் இந்துவாகவே தொடர்ந்து இயங்குங்கள்!!!!

கொழும்பு இந்துக் கல்லூரி இரத்மலானையில்தான் விடைக்கொடிச்செல்வர் சின்னத்துரை தனபாலாவினால் கல்லூரி முதல்வரின் ஆதரவுடன் முதன்முதலில் நந்திக்கொடி ஏற்றும் வைபவம் நிகழ்ந்து அது உலகம் முழுவதும் பரவியது. இராவணன் சிவப்பு மலர்களால் சிவபெருமானை வழிபட்ட இடத்தில் நிகழ்ந்த அருமையினால் விடைகொடி பாரெங்கும் பட்டொளிவீச ஏதுவானது. இந்த அருமையை உணர்ந்து; கொழும்பு இந்துக் கல்லூரி இரத்மலானை தனது கல்லூரி பெயரை சைவம் என்றுமாற்றி; கொழும்பு சைவக் கல்லூரி,இரத்மலானை என்று புதுப்பொலிவு பெற்று இலங்கை சைவ சமூகத்துக்கு முன்னுதாரணம் ஆகுமா?

யாழ்ப்பாணம் சைவ பாரம்பரியத்தை சிறப்போடு பேணும் பூமி என்பர். உண்மை என்பதை நிறுவிக்கும் வண்ணம்; யாழ்ப்பாணம் இந்துக் கல்லூரி, சைவக் கல்லூரி என்று சிவநாமம் பெற்று சைவநாயன்மார்களுக்கு பெருமை சேர்க்குமா?

திருகோணமலையில் உள்ள திருக்கோணேசுவரத்து இறைவனின் திருவருளை உலகறியச் செய்யும் வண்ணம் திருகோணமலையில் உள்ள இந்துக் கல்லூரி சைவக்கல்லூரியாக பெயர் மாற்றம் பெறுமா? தமிழ்ஞானசம்பந்தரின் தேவாரத்துக்கு மந்திரசக்தி உண்டு என்பதை கல்லூரி நிர்வாகம் பாருக்கு உணர்த்துமா?

கடற்கன்னிகள் தமிழ்பாடும் தேன்னாடாகிய மட்டக்களப்பில் பெர்ஷியன் மொழியாகிய இந்துவுக்கு எப்படி இடம் கிடைத்தது? மட்டக்களப்பு இந்து இளைஞர் பேரவை தமிழ்வாசணையுடைய சிவ ஓசையுடைய சைவம் என்ற சொல்லை தரித்து மட்டக்களப்பு சைவ இளைஞர் பேரவை என்று சைவப்பாருக்கே முன்னுதாரணமாக தன்னை மாற்றிக் கொள்ளுமா? அல்லது அமங்கலமான பொருளுடைய பெர்ஷியன் மொழிச்சொல்லை தொடர்ந்து தாங்கி கடற்கன்னிகளின் தமிழ்பாடும் தேன்னாட்டின் சிறப்புக்கு குந்தகத்தை ஏற்படுத்துமா?

சைவ மங்கையர் கழகமும் கல்லூரியும் இப்படி நெறிபிறழலாமா?

இலங்கையில் தலைநகரில் வெள்ளவத்தையில் இருக்கின்ற சைவம் என்ற பெயரில் இயங்குகின்ற பிரபல்யமான ஒரே கழகமும் கல்லூரியும் சைவ மங்கையர் கல்லூரி ஒன்றே!!! இக்கழகத்தையும் கல்லூரியையும் நிறுவியவர்கள், சாலச்சிறப்பான எமது பண்பாட்டுப் பெயரை கழகத்துக்கும் கல்லூரிக்கும் வழங்கியமையால் சைவ மங்கையர் கழகம் என்றும் கல்லூரி என்றும் பொருட்செறிவும் பண்பாட்டு அழகும் கொண்ட திருப்பெயருடன் இன்றுவரை விளங்கிவருவது யாவரும் அறிந்ததே! இக்கல்லூரி நிறுவப்பட முன்னரே இலங்கையெங்கும் இந்து என்ற அமங்கலமான சொல் எமது சமயத்துக்கு வலிந்து வழங்கப்பட்டிருந்தபோதும்; இக்கழகமும் கல்லூரியும் நிறுவப்பட்டபோது உரியமுறையில் பெயர் வழங்கப்பட்டு தமிழுக்கும் சைவத்துக்கும் பெருமை சேர்த்தனர் நிறுவிய சான்றோர். ஆனால்; யார் விட்டகுறையோ இந்து என்ற பெயர் வலிந்துவந்து தொங்கிக் கொண்டுள்ளது இக்கழகத்துக்கும் கல்லூரிக்கும்?

சைவ மங்கையர் கழகம் என்பதன் ஆங்கிலப்பதம் Saivism women's society
என்பதாகும். சைவ மங்கையர் கல்லூரி(வித்தியாலயம்) என்பதன் ஆங்கிலப்பதம் Saivism ladies college என்பதாகும். ஆனால் இந்து என்ற பெயர் ஆங்கிலப் பெயர் பலகையில் வலிய வந்து குந்திக் கொண்டது ஏன் தானே? ஆங்கிலப்புலமையில் ஏற்பட்ட குறைவா? அல்லது இந்து என்ற பெயரில் ஏற்பட்ட காதலா?

சைவசமய சிவாகமங்களுக்கு முரணான வழிபாடுகளுக்கும் இந்தக் கல்லூரி பயன்படுத்தப்படுவதாக சைவசமூகம் கவலை கொண்டிருப்பது கல்லூரி நிர்வாகமும் கழகமும் அறியுமா?

கொழும்பில் உள்ள கல்லூரி ஒன்று ஏற்பாடு செய்திருந்த கல்லூரிகளுக்கிடையிலான சமய அறிவுப் போட்டியொன்றில், அக்கல்லூரி சககல்லூரி ஒன்றின் பெயரை தமிழ்ப்படுத்தி அழைத்ததும் அழைக்கப்பட்ட கல்லூரி மேடையேற மறுத்துவிட்டது. காரணத்தை வினாவியபோது; அது தமது கல்லூரியின் பழங்காலத்து தமிழ்ப் பெயர் என்றும் தற்போது புதிய தமிழ்ப்பதம் தமது கல்லூரிக்கு உருவாக்கப்பட்டுள்ளது என்றும் கூறினர். அவர்களுடைய செயல் சரியா பிழையா என்ற வாதங்களுக்கு அப்பால்; புதிய தமிழ்ப்பதத்தை அன்று அனைத்துக் கல்லூரிகளும் உணரும்படி தெரியப்படுத்த மேடையேறாது தவிர்த்தனர். அவர்களிடம் இருந்த கல்லூரிப் பெயர்மேலான பற்று; விமர்சனங்களை ஒதுக்கிவைத்துவிட்டு பார்க்கும்போது பாராட்டுக்குரியது. இத்தகைய பற்று; சைவ மங்கையர் கல்லூரி மாணவிகளிடம் இருந்ததை எளியேன் அறிந்திலேன். அவர்களை ஏனைய கல்லூரி நிகழ்வுகளில் வெள்ளவத்தை இந்து மகளீர் கல்லூரி என்றும் வெள்ளவத்தை இந்து மங்கையர் கல்லூரி என்றும் கொழும்பு இந்து மகளீர் கல்லூரி என்றும் மாறிமாறி அழைப்பதுண்டு. கல்லூரிப் பெயரில் பற்றுகள் ஏதுமின்றி; அதுவும் பண்பாட்டில் அமைந்த கல்லூரிப் பெயரை உதாசீனம் செய்து; அவர்களும் நிகழ்வுகளில் இயல்பாகவே பங்குபற்றுவதுண்டு. ஏனைய கல்லூரி நிகழ்வுகளுக்கு மாணவிகளை அழைத்துச் செல்லும் பொறுப்ப்சிரியர்களுக்கு இதுபற்றிய அக்கறை இருப்பதில்லை. கழக நிர்வாகமே ஆங்கில மொழிபெயர்ப்பில் கோட்டைவிட்டுள்ளபோது; மாணவிகளை நொந்து கொள்வதில் என்ன நியாயம்?

சைவ மங்கையர் கல்லூரியின் மாண்பில் கொண்டுள்ள ஆதீத அக்கறையின் நிமித்தமே இக்கருத்தை ஆவணப்படுத்துகிறேன்.இதன் பின்னராவது; சைவ மங்கையர் கல்லூரி மாணவிகள் பொறுப்புணர்வுடன் நடக்க வேண்டுமென்று உரிமையுடன் வேண்டுகிறேன்.சைவ மங்கையர் கல்லூரி மாணவிகள் கொழும்பு மாநகரில் சைவ மாணவர் சமுதாயத்துக்கு முன்னுதாரணமாக திகழவேண்டும் என்பது எளியேனின் பெருவிருப்பு. இந்து என்ற பெயரில் இருக்கும் மாணவர் மன்றங்களை சைவம் என்று பெயர் மாற்றம் செய்து கல்லூரிகளில் சைவ மறுமலர்ச்சி செய்ய மாணவர் முன்வர வேண்டும். அதுவும் சைவ மங்கையர் கழகத்தில் இயங்கும் இந்து மாணவர் மன்றம் சைவ மாணவர் மன்றம் என்று பெயர் மாற்றம் பெறுவதில் எத்தடங்கலும் இருக்கப்போவதில்லை!!!! சைவ மங்கையர் கல்லூரி மாணவர் சாதிப்பார்களா? சமயமறுமலர்ச்சிக்கு வித்திடுவார்களா? நாவலர் பெருமானுக்கு பெருமை சேர்ப்பார்களா?

சைவம் சிவ சம்பந்தமான சொல் என்று திருமந்திரம் தெளிவுபடுத்துகின்றது. அத்தகு அருமையான சொல்லை தலைநகரில் தாங்கி நிற்கின்ற சைவ மங்கையர் கழகமும் கல்லூரி நிர்வாகமும் அமங்கலமான பாரசீக சொல்லாகிய இந்துவை ஏற்கவிரும்பினால் இந்து மங்கையர் கழகம் என்றும் இந்து மங்கையர் கல்லூரி என்றும் பெயர் மாற்றம் செய்யுங்கள்! ஆனால் தமிழைச் செம்மொழி என்று என்றுமே உரைக்காதீர்!

ஆனால் கல்லூரியினதும் கழகத்தினதும் ஆங்கிலப் புலமையை கேள்விக்குறியாக்கும் வண்ணம்; அல்லது சைவம் என்பதன் ஆங்கிலப்பதமே இந்து என்று சாதாரண சைவமக்களை அறியாமையில் மூழ்கச்செய்யும் சுமார்த்தர்களின் சதிக்கு துணைபோகும் வண்ணம்; தமிழில் சைவம் என்றும் ஆங்கிலத்தில் Hindu என்றும் பெயர் பலகையை வைக்காதீர்கள்! எளியேனின் எழுத்து; புண்படுத்துமானால் மன்னிக்க. கொழும்பு மாநகரில் இயங்குகின்ற சைவம் என்று பெயர் தாங்கிய ஒரேஒரு கல்லூரி என்று பெருமையை மங்கச்செய்யும் வண்ணம் பெயரில் தெளிவில்லாத மாணவிகளையும் பெயர்பற்றி அக்கறை ஏதுமில்லாத நிர்வாகத்தையும் பார்க்கும்போது உள்ளம் வாடுகின்றது! நிர்வாகமும் மாணவிகளும் இதை உணர்ந்தால் சைவப் பெருமக்கள் பெருமைப்படுவர். கொண்டாடுவர். சிவனருளே என்று போற்றுவர். கல்லுரியும் கழகமும் உணருவார்களா? இல்லை இந்து மோகத்துள் மூழ்கி தமிழையும் சைவத்தையும் அடகு வைப்பார்களா?

சமய நிறுவனங்களும் கல்லூரிகளும் சைவம் என்று சிவநாதமும் தமிழ்ச்சால்பும் பொருந்திய பெயர் மாற்றம் பெற்று; தமிழையும் சைவத்தையும் இலங்கையில் சுமார்த்தரிடம் இருந்து பாதுகாக்குமா? இல்லை இலங்கையில் தமிழ் எக்கேடு கெட்டால் எனக்கென்ன என்று இருந்த திமுக போல் இருப்பதில் பெருமை கொள்வீரோ!!!!

சிலோனாக இருந்த இந்ததீவுக்கு சிறிலங்கா என்று பெயர் மாற்றம் ஏன் வந்தது? பெரும்பான்மை மக்கள் தமது மொழியில் கொண்டிருந்த பற்றால்; அந்நியமொழிச்சொல்லை தூக்கி எறித்தனர்!!!! அவர்களிடம் சென்று மொழிப்பற்று என்றால் என்ன என்று தமிழர் பழக வேண்டும். ஒரு நாட்டினது பெயரையே மொழிப்பற்றுக் கொண்டு மாற்றப்பட்டிருக்க; நாம் எமது சமய நிறுவனங்களுக்கும் கல்லூரிகளுக்கும் எமது சமயப்பெயரை சூட்டுவதில் ஏன் தாமதிக்க வேண்டும்? ஏன் இயலாது? சாக்குப்போக்கு சொல்வோரிடம் தயவுடன் வேண்டுவது "சுமார்த்த அடிவருடிகள்" என்பதை ஒத்துக் கொள்ளுங்கள்! உங்கள் அன்னை உங்களுக்கு ஊட்டியது சைவத்தமிழ்ப்பால் அல்ல என்று ஊருக்கு உண்மையை சொல்லிவிடுங்கள்!!!!

ஒரு சமயப் பெயர் அச்சமயத்தை பண்பும் பயனும் விளங்கும் உயிரோட்டமான அர்த்தம் பொதிந்ததாக இருத்தல் அவசியம். எள்ளில் எண்ணெய் இருப்பதுபோல் சமயப் பெயரில் சமயத் தத்துவங்கள் புலனாக வேண்டும். சைவம்-சிவம் என்பதே அழகு நிறைந்தது. தமிழருக்கு உரியது.

சி.வை.தாமோதரப்பிள்ளை "தேசப்பற்றும் மொழிப்பற்றும் சமயப் பற்றும் இல்லாதவர் பெருமையும் பெருமையா? " என்றார். தமிழ்ச்சாதியே என்ன செய்யப் போகிறாய்! பண்பாட்டை சிதைத்து சுய பண்பாடற்ற இனமாக மாற்றத்துடிக்கு சுமார்த்தத்துக்கு விலைபோக போகிறாயா?

The Saiva Philosophy is the choicest product of the Dravidian intellect. It is the most elaborate, influential and undoubtedly the most intrisically valuable of all religions of India. It is peculiarly the South Indian and Tamil Religion. - Dr.G.U. Pope

என்று மேல்நாட்டார் புகழ்ந்த சைவநெறிக்கு நாமே கலங்கத்தை உண்டுபண்ணலாமா?

ஓரினம் மண்ணில்லாம் ஆயிரம் ஆண்டுகளும் உயிர்பிழைத்து இருக்கலாம். யூதர்கள் அதற்கு சிறந்த உதாரணம்! ஆனால் பண்பாடும் தனித்துவ அடையாளங்களும் மறைக்கப்பட்டால் ஒருதசாப்தம்கூட அந்த இனம் உயிர் பிழைத்திருக்காது. உதாரணம் புத்தளத்தில் தமிழரின் நிலை! சிந்திக்க! செயலாற்றுக!

பிற்குறிப்பு:- தமிழ்நாட்டில் சைவம் என்றால் சாதரண பொதுசனத்துக்கு சாப்பாடுதான் நினைவுக்கு வரும். சைவம் என்கின்ற பெயரில் சமயம் ஒன்றுண்டு என்று அறிந்தோர் சைவசமயத்தைக் கற்றோர் மட்டுமே!!!!!! இப்படிப்பட்ட இழிநிலை விரைவில் எமது நாட்டிலும் உருவாகலாம்!!!!

மட்டக்களப்பு வெள்ளப்பெருக்கும் சைவ அமைப்புகளின் பங்கும்

2011-01-27T20:19:00.000+02:00

இலண்டன் சைவ ஆலயங்களின் ஒன்றியம் வெள்ளப்பெருக்கில் பாதிக்கப்பட்டோருக்கு உதவி வழங்கிவருகின்றமை பாராட்டுக்குரிய ஒன்றாகும். சைவ உலகமே பாராட்டுத் தெரிவுக்கும் என்பதில் மாற்றுக்கருத்து இருக்காது. உலக சைவப் பேரவையும் தமது உதவிகளை வழங்கி உலக சைவ மக்களின் பாராட்டைப் பெற்றமையையும் திருவருட்சம்மதம் என்க.

வெள்ளப் பெருக்கால் வாடிநின்ற மக்களுக்கு சைவ அமைப்பான மட்டக்களப்பு இந்து இளைஞர் பேரவை புலம்பெயர்ந்துள்ள தமிழ்மக்களின் சைவ அமைப்புகளைத் தொடர்ப்பு கொண்டு, இயலுமான உதவிகளை களத்தில் நின்று ஆற்றிவருகின்றமை பாராட்டுக்குரிய விடயமாகும்.

வாடும் பயிரைக் கண்டால் வாடுவது சைவரின் இயல்பு. ஒரு மாநிலமே வெள்ளத்துள் வாடிநின்றபோது பெருந்துயருக்குள் வீழ்ந்த சைவமக்களுக்கு இலங்கையில் உள்ள பல்வேறு சைவ அமைப்புகள்,நிறுவனங்கள் முன்னின்று உதவிகளை ஆற்றியமை ஆறுதலை ஏற்படுத்தியது. பணிகளின் ஈடுபட்ட சைவ அமைப்புகள் யாவற்றுக்கும் சைவ உலகம் நன்றியுடையதே!

என் கடன் பணி செய்து கிடப்பதே என்ற அப்பரின் வாழ்வு சைவர்களுக்கு போதிப்பது மக்கள் சேவையே மகேசன் சேவை என்பதையே! சைவநெறி மக்கள் இதை நன்குணர்ந்து தமது உதவிகளை உரிய அமைப்புகளுடாக வழங்கி சைவப்பணிக்கு தோள்கொடுத்து உதவவேண்டும் என்று பணிவுடன் வேண்டுகிறேன்.

தென்னாடுடைய சிவனே போற்றி

எந்நாட்டவர்க்கும் இறைவா போற்றி

இன்பமே சூழ்க எல்லோரும் வாழ்க

என் கடன் பணி செய்து கிடப்பதே
சிவத்தமிழோன்

தமிழ்வின் இணையத்தளத்தில் வெளியான செய்தி

கிழக்கு மாகாணத்தில் ஏற்பட்ட வெள்ளப்பெருக்கில் பெரிதும் பாதிக்கப்பட்ட மட்டக்களப்பு மாவட்ட மக்களுக்கு உதவுவதற்காக மட்டக்களப்பு மாவட்ட இந்து இளைஞர் பேரவை ஊடாக பல உதவிகளை லண்டன் சைவத் திருக்கோயில் ஒன்றியம் மேற்கொண்டு வருகின்றது.
இவ்வகையில் 25.01.2011ம் திகதி அன்று மட்டக்களப்பு மாவட்டத்தின் பிரதேச செயலாளர் பிரிவில் வந்தாறுமூலை மேற்கு பகுதி மக்கள் பெரும் வெள்ளப்பாதிப்பை எதிர்கொண்டமையால் 398 குடும்பங்களுக்கு 480000.00 ரூபாய் பெறுமதியான சமையல் பாத்திர உதவிகள் வழங்கப்பட்டது.

இவ்வேளை கோறளைப்பற்று பிரதேசத்தின் சுங்கான்கேணி கிராம அதிகாரி பிரிவில் 500 குடும்பங்களுக்கு 425000.00 ரூபா பெறுமதியான உலர் உணவுப் பொருட்கள் வழங்கப்பட்டன. இதில் அரிசி சீனி மா சோயாமீற் உருளைக்கிழங்கு பருப்பு தேயிலை அங்கர் போன்றவை சகல குடும்பங்களுக்கும் வழங்கப்பட்டது. தொடர்ந்து உதவி வழங்கும் நடவடிக்கை நடைபெற்றுக் கொண்டிருப்பதாக மட்டக்களப்பு மாவட்ட இந்து இளைஞர் பேரவை தலைவரும் கிழக்கு இந்து ஒன்றியத் தலைவரும் பாராளுமன்ற உறுப்பினருமான சீ.யோகேஸ்வரன் தெரிவித்தார். உதவி நல்க விரும்புபவர்கள் கீழ்வரும் வங்கி மூலம் உதவ முடியும் என்பதையும் தெரிவிக்கின்றார். உதவும் அமைப்பு தனிநபர் ஈமெயில் மூலம் தங்களது உதவித் தொகை பெயர் விலாசம் தொலைபேசி இலக்கம் போன்றவற்றை அனுப்பும் போது அவற்றின் மூலம் பற்றுச்சீட்டு புகைப்படங்கள் (உதவி வழங்கியமைக்கானது) ஏனைய ஆவணங்கள் அனுப்பி வைக்கப்படும்.

தற்போதைய சூழ்நிலையில் பாதிக்கப்பட்ட மக்கள் பெரும்பாலும் புலம்பெயர்ந்து வாழும் உறவுகளின் உதவியை நாடி நிற்கின்றனர் என்ற செய்தியையும் அன்பாக தெரிவிக்கின்றோம்.

நிதி அனுப்பவதற்குரிய விபரம்.
The fund should be drawn in favor of Federation of Young Men’s Hindu Association, Batticaloa District. People’s Bank, Kaluwanchikudy Branch, to the Account No. 190-165-020091-4.

தொடர்பு கொள்வதற்கு : 0094776034559 0094718049439 0094652228273 0094652228018 உதவுபவர்கள் தங்கள் விபரங்களை yoheswaran.mp@gmail.com / btdymha@gmail.com என்ற மின்னஞ்சல் முகவரிக்கு அனுப்ப முடியும்.

நிழற்படங்கள்:நன்றி தமிழ்வின்

2042இல் திருமுறைப் பணி

2011-01-08T03:07:00.000+02:00

ஏனைய சமயங்கள் மதம்பிடித்து தம்கடவுளை வழிபடாவிடின் நரகத்திற்கே இட்டுசெல்லும் என்றும் உருவவழிபாட்டை அழித்தல் இறைவனுக்கு பிரியமானது என்றும் போதித்து உலக அழிவுகளுக்கு காரணமாக இருக்க; சைவசமயம் "மேன்மைகொள் சைவநீதி விளங்குக உலகமெலாம்" என்று உரைப்பது முறையாகுமா? என்று சிலர் வினாவினர். சைவசமயத்துக்கு மதம் பிடித்துவிட்டதா என்று கேள்வி தொடுத்தனர்!

அன்பும் சிவமும் இரண்டென்பர் அறிவிலார்
அன்பே சிவமாவது யாரும் அறிகிலார்
அன்பே சிவமாவது யாரும் அறிந்தபின்
அன்பே சிவமாய் அமர்ந்திருந்தாரே

ஒன்றே குலமும் ஒருவனே தேவனும்
நன்றே நினைமின் நமனில்லை நாணாமே
சென்றே புகுங்கதி யில்லைநுஞ் சித்தத்து
நின்றே நிலைபெற நீர்நினைந் துய்ம்மினே

தோத்திரநூல்களில் சாத்திரத்துக்குரிய திருமந்திரத்தின் சாரம் ஒன்றே குலம் ஒருவனே தேவன் அன்பே சிவம் என்பதாகும்.

மனம் அது நினைய வாக்கு
வழுத்த மந்திரங்கள் சொல்ல
இனமலர் கையில் கொண்டங்(கு)
இச்சித்த தெய்வம்போற்றிச்
சினமுதல் அகற்றி வாழும்
செயல் அறமானால் யார்க்கும்
முனம் ஒரு தெய்வம் எங்கும்
செயற்குமுன்னிலையாம் அன்றே! - சைவசித்தாந்தம்(சிவஞானசித்தியார் நூலின் சுபக்கம் இரண்டாம் சூத்திரம் 24)

"தான் விரும்பும் தெய்வத்தை மனதில் நினைக்கவும் வாக்கினால் தவறாது மந்திரம் கூறவும் கையினால் நல்ல மலர்களை எடுத்துப் போற்றவும் இவற்றோடுகூட, சினம் முதலிய தீயகுணங்களை நீக்கி, வாழும் முறைப்படி வாழ்ந்தால், அவர் விரும்பிய தெய்வம் அவரின் செயல்களுக்கு துணையாக முன்வந்து நிற்கும்" என்றுரைக்கின்றது சைவசித்தாந்தம்.

சைவசித்தாந்தம் சைவநெறியின் தத்துவ விளக்கம். சைவசித்தாந்தம் பாரில் உள்ள சைவநெறி சாராதோருக்கும் அவர்களின் வினைகளுக்கு ஏற்ப இறைவன் அருள்பாலிக்கின்றார் என்று எடுத்துரைக்கின்றது.
.
இத்தகைய மேன்மை பொருந்திய "சைவநீதி'யைத்தான் உலகமெலாம் விளங்குக என்று கச்சியப்பர் பாடினாரே தவிர சைவசமயம் உலகமெலாம் விளங்குக என்று பாடவில்லை.

எனவே; இத்தகைய உலக சமாதானத்துக்கு உயிராக இருக்கக்கூடிய சைவநீதி உலகமெலாம் விளங்க வேண்டும் என்று கச்சியப்பசிவாச்சாரியார் வேண்டினாரே தவிர; சைவசமயம் உலகமெலாம் விளங்க வேண்டும் என்று குறுகிய சிந்தனையுடன் பாடவில்லை என்று பொருளுரைத்தேன். சமயம் என்பது வாழ்க்கையை நன்முறையில் சமைப்பது. நெறி என்பது நன்முறையில் நெறிப்படுத்துவது. எனவே; சைவநெறி(சைவசமயம்) மதம்பிடித்து; உலகம் முழுவதும் "தன்சமயம்" மட்டுமே விளங்க வேண்டுமென்று போதிக்கவில்லை என்பதை உணர்ந்து கொண்டதும் வினாத்தொடுத்தோர் சைவநெறியில் தாம் பிறந்தமைக்குரிய ஊழ்வினைப்பயனை எண்ணி பெருமை கொண்டனர். இத்தகைய உலக சமாதானத்துக்குரிய சைவநீதி உலகம் முழுவதும் பரவவில்லையே என்று வாடினர்.

"செய்தீ வினையிருக்கத் தெய்வத்தை நொந்தாக்கால் எய்த வருமோ இருநிதியம்" என்ற ஔவையின் நல்வழிப்பாடலை உள்ளத்தில் நினைவுபடுத்தி;பாரிலுள்ள மாந்தரின் நல்தீவினைக்கு ஏற்பவே யாவும் அரங்கேறும் என்பதை சிந்தையில் நிறுத்தி எளியேனும் மனதை சமாதானம் செய்து கொண்டேன்.

ஆனால் சிவனடியார் மறவன்புலவு க. சச்சிதானந்தன் ஐயாவிடம் இருந்து வந்த மின்னஞ்சல் "சைவநீதி" உலகமெலாம் பரவுவதற்கு காலம் கனிந்துவிட்டது என்பதை உணர்த்திற்று.

சைவ நூல்களாகிய திருமுறைகளும் சைவசித்தாந்த சாத்திரங்களும் ஏற்கனவே தேவாரம் மின்னம்பலத்தில் அழகுடன் தொகுக்கப்பட்டு ஆங்கில மொழிபெயர்புடனும் பல்வேறு மொழிகளின் ஒலிபெயர்ப்புடனும் ஐயாவின் பணியால் பாருக்கு வழங்கப்பட்டிருப்பது சைவநீதி உலகமெலாம் பரவுவதற்கு பிள்ளையார் சுழியை ஏற்படுத்தியது என்றால் மிகையில்லை. தற்போது; ஐயாவின் பணியால் தேவார மின்னம்பலம் மேலும் பலமொழிகளில் அழகுபடுத்தப்படவிருக்கும் செய்தி தேன்போல் இன்பத்தை ஊட்டிற்று.

ஐயாவின் மின்னஞ்சல் செய்தி

2042இல் திருமுறைப் பணி

வணக்கம்
தமிழ்ப் புத்தாண்டும், தைப் பொங்கலும் அனைவருக்கும் ஒளிமயமான எதிர்காலத்தைத் தருவனவாக.

www.thevaaram.org தளத்தில் 2042 தொடங்கும் புத்தாண்டில் மேற்கொள்ளவுள்ள பணிகளைப் பட்டியலிடுகிறேன்.

1. தருமபுரம் ப. சுவாமிநாதன் திருமுறைக் குரலிசை முழுவதையும் (10,322 பாடல்கள்) தளத்தில் ஏற்றச் சிங்கப்பூர் அன்பர்கள் உதவுகிறார்கள். அடுத்த 3 மாதங்களில் தளத்தில் ஏற்றிடலாம்.

2. இதுவரை குரலிசை பெறாத திருக்கோவையார் 400, திருமந்திரம் 1,700, 11ஆம் திருமுறை 1,102 = 3,202 பாடல்களின் குரலிசைப் பதிவுக்குச் சிங்கப்பூர் அன்பர்கள் உதவுகிறார்கள். இப்பதிவுடன் பன்னிரு திருமுறை முழுவதும் குரலிசையில் அனைவருக்கும் கிடைப்பதுடன் www.thevaaram.org தளத்தில் கேட்கவும் வழியுண்டு. அடுத்த 24 மாதங்களில் இப்பணி நிறைவாகும்.

3. ஒலிபெயர்ப்பாகப் பன்னிரு திருமுறையை உலக மொழிகள் பலவற்றில் வாசிக்கப் பேரா. புனல் க. முருகையன் வகுத்த வரைவுகளுக்கமைய எடுத்துச் செல்லல். www.thevaaram.org தளத்தில் அந்த முறையைச் செப்பனிடல், பெருக்குதல்.அடுத்த 6 மாதங்களில் முதற்கட்டப் பணி நிறைவாகும்.

4. தெலுங்குக்கு மொழிபெயர்த்துத் தளத்தில் ஏற்றியுள்ள 1ஆம் திருமுறையை அடுத்து ஏனைய திருமுறைகளைத் திருமலை திருப்பதி தேவத்தானத்தினர் 17.7.2010இல் ஒதுக்கிய ரூ. 1,316,760 பயன்படுத்தித் தெலுங்குக்கு மொழிபெயர்த்து அடுத்த 3 ஆண்டுகளில் பணி நிறைதல்.

5. கன்னடத்தில் 1, 9, 12 (ஒரு பகுதி) ஆகிய திருமுறைகளை மொழிபெயர்த்துத் தளத்தில் ஏற்றியதைத் தொடர்ந்து ஏனைய திருமுறைகளைக் கன்னடத்துக்கு மொழிபெயர்த்தல், அப்பணிக்கான நிதி ஆதாரம் தேடல்.

6. மலையாளத்தில் மொழிபெயர்ப்பான 8ஆம் திருமுறை திருவாசகத்தைத் தளத்தில் ஏற்றல், ஏனைய திருமுறைகளை மலையாளத்தில் மொழிபெயர்க்கும் பணிக்கு நிதி ஆதாரம் தேடல்.

7. இந்தியில் மொழிபெயர்ப்பான 7ஆம் திருமுறை, 8 திருவாசகம், 10 இரு தந்திரங்கள் ஆகியன தளத்தில் உள்ளன. 4, 5, 6, 10 ஆகிய திருமுறைகளைத் தளத்தில் தொடர்ந்து ஏற்றி வருதல். 1 ஆம் திருமுறை இந்தியைத் தட்டச்சாக்கித் தளத்தில் ஏற்றுதல், 2, 3, 9, 11, 12ஆம் திருமுறைகளை இந்திக்கு மொழிபெயர்த்தல், நிதி ஆதாரம் தேடல். தில்லி நடுவண் இந்தி இயக்ககத் துணை நாடல்.

8. வடமொழிக்கு மொழிபெயர்ப்பான 11ஆம் திருமுறைப் பகுதிகளைத் தளத்தில் ஏற்றல், ஏனைய திருமுறைகளை மொழிபெயர்க்கத் தில்லி இராஷ்டிர சமஸ்கிருத சமஸ்தானம் வழங்கக் கூடிய நிதி உதவியைப் பெறல். பணி தொடர்தல்.

9. மலாய்க்கு மொழிபெயர்ப்பாகும் 9ஆம் திருமுறையைத் தளத்தில் ஏற்றல், மலேசிய இந்து சங்கத்தின் ஆதரவுடன் ஏனைய திருமுறைகளையும் மலாய்க்கு மொழிபெயர்த்தல்.

10. பிரஞ்சுக்கு மொழிபெயர்க்கப் புதுச்சேரி பிரஞ்சு நிறுவன்ம், சீனத்துக்கு மொழிபெயர்க்கச் சிங்கப்பூர் அரசின் இந்து அறநிலையின் ஆதரவுடன் நன்யாங்கு பல்கலைக்கழகம், சிங்களத்துக்கு மொழிபெயர்க்க அகில இலங்கை இந்து மாமன்றம் ஆகியவற்றுடன் இதுவரை மேற்கொண்ட தொடர்புகளை வலுவாக்கல்.

11. கணிணி நிகழ்ச்சித் தொகுப்பாளர் வல்லமையுடன் மாறிவரும் தொழினுட்பத்திற்கேற்பத் தளத்தின் பயன்பாட்டை மேம்படுத்தல்.

12. மாதத்துக்குச் சராசரியாக 4இலட்சம் சொடுக்குகள் உள்ள நிலையை மேம்படுத்தப் பரப்புரையும் பிற மொழியாளருக்கு விளம்பரமும் செய்தல்.

பட்டியலிட்ட பணிகளை 2042இல் நிறைவாக்கக் கூடியவற்றை நிறைவாக்க இறைவனின் துணையையும் உங்களின் ஒத்துழைப்பையும் ஆதரவையும் நாடுகிறேன்.

நன்றி

--
மறவன்புலவு க. சச்சிதானந்தன்
Maravanpulavu K. Sachithananthan

ஐயாவின் பணி சிரமமானது. எழுத்துகளின் துணைகொண்டு ஐயாவின் பணியில் உள்ள சிரமத்தை எடுத்து விளக்க முடியாது. சேக்கிழார் பெருமான் சைவ உலகிற்கு கிடைத்த பயனால் பெரியபுராணத்தினூடாக சிவனடியார்கள் தமது சிவப்பணியை செவ்வனே செய்வதற்காகப்பட்ட சிரமத்தை உணரக்கூடியதாயிற்று.பெரியபுராணத்தின் துணைகொண்டு சிவனடியார்கள் தமது சிவப்பணியில் எதிர்நோக்கிய சிரமங்களை உணர்ந்தோர்; சிவனடியார் மறவன்புலவு க.சச்சிதானந்தன் ஐயாவின் பணியிலுள்ள சிரமத்தை ஓரளவேனும் உணரமுற்படுவர். ஐயாவின் பணியில் உள்ள சிரமங்களை உணர்ந்தோர்; ஐயாவுக்கு இயன்றளவு தங்கள் உதவிகளை வழங்குமாறு பணிவுடன் வேண்டுகிறேன்.

ஐயாவின் பணிக்கு தோள்கொடுக்க எளிமையான வழிகளில் ஒன்று தேவாரம் மின்னம்பலத்துக்கு இணைப்புக்கொடுத்து உதவுதலாகும்.பணரீதியிலும் தொழில்நுட்பரீதியிலும் ஏனைய வழிகளிலும் உதவக்கூடிய வல்லமையை இறைவனின் திருவருட்சம்மதமாகப் பெற்றோர் காந்தளம் பதிப்பகத்தினூடாக ஐயாவைத் தொடர்பு கொள்ளமுடியும்.

முகவரி
68, அண்ணா சாலை,
சென்னை 600 005

தொலைபேசி: 9444455281

ஐயாவின் கட்டுரை:
பொன்னம்பலத்திலிருந்து மின்னம்பலத்திற்கு
http://pathippuththozhil.blogspot.com/2006/11/blog-post.html

ஐயாவைப்பற்றி மேலும் அறிந்துகொள்வதற்கு:
http://sachithananthan.blogspot.com/2005/09/kanapathipillai-sachithananthan.html

http://sivathamiloan.blogspot.com/2010/07/blog-post.html

தேவாரம் மின்னம்பலம்:-http://www.thevaaram.org/